| Library / Tipiṭaka / තිපිටක • Tipiṭaka / චරියාපිටකපාළි • Cariyāpiṭakapāḷi |
2. සඞ්ඛචරියා
2. Saṅkhacariyā
11.
11.
‘‘පුනාපරං යදා හොමි, බ්රාහ්මණො සඞ්ඛසව්හයො;
‘‘Punāparaṃ yadā homi, brāhmaṇo saṅkhasavhayo;
මහාසමුද්දං තරිතුකාමො, උපගච්ඡාමි පට්ටනං.
Mahāsamuddaṃ taritukāmo, upagacchāmi paṭṭanaṃ.
12.
12.
‘‘තත්ථද්දසං පටිපථෙ, සයම්භුං අපරාජිතං;
‘‘Tatthaddasaṃ paṭipathe, sayambhuṃ aparājitaṃ;
කන්තාරද්ධානං පටිපන්නං 1, තත්තාය කඨිනභූමියා.
Kantāraddhānaṃ paṭipannaṃ 2, tattāya kaṭhinabhūmiyā.
13.
13.
‘‘තමහං පටිපථෙ දිස්වා, ඉමමත්ථං විචින්තයිං;
‘‘Tamahaṃ paṭipathe disvā, imamatthaṃ vicintayiṃ;
‘ඉදං ඛෙත්තං අනුප්පත්තං, පුඤ්ඤකාමස්ස ජන්තුනො.
‘Idaṃ khettaṃ anuppattaṃ, puññakāmassa jantuno.
14.
14.
‘‘‘යථා කස්සකො පුරිසො, ඛෙත්තං දිස්වා මහාගමං;
‘‘‘Yathā kassako puriso, khettaṃ disvā mahāgamaṃ;
තත්ථ බීජං න රොපෙති, න සො ධඤ්ඤෙන අත්ථිකො.
Tattha bījaṃ na ropeti, na so dhaññena atthiko.
15.
15.
‘‘‘එවමෙවාහං පුඤ්ඤකාමො, දිස්වා ඛෙත්තවරුත්තමං;
‘‘‘Evamevāhaṃ puññakāmo, disvā khettavaruttamaṃ;
යදි තත්ථ කාරං න කරොමි, නාහං පුඤ්ඤෙන අත්ථිකො.
Yadi tattha kāraṃ na karomi, nāhaṃ puññena atthiko.
16.
16.
‘‘‘යථා අමච්චො මුද්දිකාමො, රඤ්ඤො අන්තෙපුරෙ ජනෙ;
‘‘‘Yathā amacco muddikāmo, rañño antepure jane;
න දෙති තෙසං ධනධඤ්ඤං, මුද්දිතො පරිහායති.
Na deti tesaṃ dhanadhaññaṃ, muddito parihāyati.
17.
17.
‘‘‘එවමෙවාහං පුඤ්ඤකාමො, විපුලං දිස්වාන දක්ඛිණං;
‘‘‘Evamevāhaṃ puññakāmo, vipulaṃ disvāna dakkhiṇaṃ;
යදි තස්ස දානං න දදාමි, පරිහායිස්සාමි පුඤ්ඤතො’.
Yadi tassa dānaṃ na dadāmi, parihāyissāmi puññato’.
18.
18.
‘‘එවාහං චින්තයිත්වාන, ඔරොහිත්වා උපාහනා;
‘‘Evāhaṃ cintayitvāna, orohitvā upāhanā;
තස්ස පාදානි වන්දිත්වා, අදාසිං ඡත්තුපාහනං.
Tassa pādāni vanditvā, adāsiṃ chattupāhanaṃ.
19.
19.
‘‘තෙනෙවාහං සතගුණතො, සුඛුමාලො සුඛෙධිතො;
‘‘Tenevāhaṃ sataguṇato, sukhumālo sukhedhito;
අපි ච දානං පරිපූරෙන්තො, එවං තස්ස අදාසහ’’න්ති.
Api ca dānaṃ paripūrento, evaṃ tassa adāsaha’’nti.
සඞ්ඛචරියං දුතියං.
Saṅkhacariyaṃ dutiyaṃ.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / චරියාපිටක-අට්ඨකථා • Cariyāpiṭaka-aṭṭhakathā / 2. සඞ්ඛබ්රාහ්මණචරියාවණ්ණනා • 2. Saṅkhabrāhmaṇacariyāvaṇṇanā
