| Library / Tipiṭaka / तिपिटक • Tipiṭaka / थेरीगाथा-अट्ठकथा • Therīgāthā-aṭṭhakathā |
१८. सङ्घाथेरीगाथावण्णना
18. Saṅghātherīgāthāvaṇṇanā
हित्वा घरे पब्बजित्वाति सङ्घाय थेरिया गाथा। तस्सा वत्थु धीराथेरिया वत्थुसदिसं। गाथा पन –
Hitvā ghare pabbajitvāti saṅghāya theriyā gāthā. Tassā vatthu dhīrātheriyā vatthusadisaṃ. Gāthā pana –
१८.
18.
‘‘हित्वा घरे पब्बजित्वा, हित्वा पुत्तं पसुं पियं।
‘‘Hitvā ghare pabbajitvā, hitvā puttaṃ pasuṃ piyaṃ;
हित्वा रागञ्च दोसञ्च, अविज्जञ्च विराजिय।
Hitvā rāgañca dosañca, avijjañca virājiya;
समूलं तण्हमब्बुय्ह, उपसन्ताम्हि निब्बुता’’ति॥ – गाथं अभासि।
Samūlaṃ taṇhamabbuyha, upasantāmhi nibbutā’’ti. – gāthaṃ abhāsi;
तत्थ हित्वाति छड्डेत्वा। घरेति गेहं। घरसद्दो हि एकस्मिम्पि अभिधेय्ये कदाचि बहूसु बीजं विय रूळ्हिवसेन वोहरीयति। हित्वा पुत्तं पसुं पियन्ति पियायितब्बे पुत्ते चेव गोमहिंसादिके पसू च तप्पटिबद्धछन्दरागप्पहानेन पहाय। हित्वा रागञ्च दोसञ्चाति रज्जनसभावं रागं, दुस्सनसभावं दोसञ्च अरियमग्गेन समुच्छिन्दित्वा। अविज्जञ्च विराजियाति सब्बाकुसलेसु पुब्बङ्गमं मोहञ्च विराजेत्वा मग्गेन समुग्घाटेत्वा इच्चेव अत्थो। सेसं वुत्तनयमेव।
Tattha hitvāti chaḍḍetvā. Ghareti gehaṃ. Gharasaddo hi ekasmimpi abhidheyye kadāci bahūsu bījaṃ viya rūḷhivasena voharīyati. Hitvā puttaṃ pasuṃ piyanti piyāyitabbe putte ceva gomahiṃsādike pasū ca tappaṭibaddhachandarāgappahānena pahāya. Hitvā rāgañca dosañcāti rajjanasabhāvaṃ rāgaṃ, dussanasabhāvaṃ dosañca ariyamaggena samucchinditvā. Avijjañca virājiyāti sabbākusalesu pubbaṅgamaṃ mohañca virājetvā maggena samugghāṭetvā icceva attho. Sesaṃ vuttanayameva.
सङ्घाथेरीगाथावण्णना निट्ठिता।
Saṅghātherīgāthāvaṇṇanā niṭṭhitā.
एककनिपातवण्णना निट्ठिता।
Ekakanipātavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / थेरीगाथापाळि • Therīgāthāpāḷi / १८. सङ्घाथेरीगाथा • 18. Saṅghātherīgāthā
