| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൪. സങ്ഗണികാരാമസുത്തം
4. Saṅgaṇikārāmasuttaṃ
൬൮. ‘‘‘സോ വത, ഭിക്ഖവേ, ഭിക്ഖു സങ്ഗണികാരാമോ സങ്ഗണികരതോ സങ്ഗണികാരാമതം അനുയുത്തോ, ഗണാരാമോ ഗണരതോ ഗണാരാമതം അനുയുത്തോ, ഏകോ പവിവേകേ അഭിരമിസ്സതീ’തി നേതം ഠാനം വിജ്ജതി. ‘ഏകോ പവിവേകേ അനഭിരമന്തോ ചിത്തസ്സ നിമിത്തം ഗഹേസ്സതീ’തി നേതം ഠാനം വിജ്ജതി. ‘ചിത്തസ്സ നിമിത്തം അഗണ്ഹന്തോ സമ്മാദിട്ഠിം പരിപൂരേസ്സതീ’തി നേതം ഠാനം വിജ്ജതി. ‘സമ്മാദിട്ഠിം അപരിപൂരേത്വാ സമ്മാസമാധിം പരിപൂരേസ്സതീ’തി നേതം ഠാനം വിജ്ജതി. ‘സമ്മാസമാധിം അപരിപൂരേത്വാ സംയോജനാനി പജഹിസ്സതീ’തി നേതം ഠാനം വിജ്ജതി. ‘സംയോജനാനി അപ്പഹായ നിബ്ബാനം സച്ഛികരിസ്സതീ’തി നേതം ഠാനം വിജ്ജതി.
68. ‘‘‘So vata, bhikkhave, bhikkhu saṅgaṇikārāmo saṅgaṇikarato saṅgaṇikārāmataṃ anuyutto, gaṇārāmo gaṇarato gaṇārāmataṃ anuyutto, eko paviveke abhiramissatī’ti netaṃ ṭhānaṃ vijjati. ‘Eko paviveke anabhiramanto cittassa nimittaṃ gahessatī’ti netaṃ ṭhānaṃ vijjati. ‘Cittassa nimittaṃ agaṇhanto sammādiṭṭhiṃ paripūressatī’ti netaṃ ṭhānaṃ vijjati. ‘Sammādiṭṭhiṃ aparipūretvā sammāsamādhiṃ paripūressatī’ti netaṃ ṭhānaṃ vijjati. ‘Sammāsamādhiṃ aparipūretvā saṃyojanāni pajahissatī’ti netaṃ ṭhānaṃ vijjati. ‘Saṃyojanāni appahāya nibbānaṃ sacchikarissatī’ti netaṃ ṭhānaṃ vijjati.
‘‘‘സോ വത, ഭിക്ഖവേ, ഭിക്ഖു ന സങ്ഗണികാരാമോ ന സങ്ഗണികരതോ ന സങ്ഗണികാരാമതം അനുയുത്തോ, ന ഗണാരാമോ ന ഗണരതോ ന ഗണാരാമതം അനുയുത്തോ, ഏകോ പവിവേകേ അഭിരമിസ്സതീ’തി ഠാനമേതം വിജ്ജതി. ‘ഏകോ പവിവേകേ അഭിരമന്തോ ചിത്തസ്സ നിമിത്തം ഗഹേസ്സതീ’തി ഠാനമേതം വിജ്ജതി. ‘ചിത്തസ്സ നിമിത്തം ഗണ്ഹന്തോ സമ്മാദിട്ഠിം പരിപൂരേസ്സതീ’തി ഠാനമേതം വിജ്ജതി. ‘സമ്മാദിട്ഠിം പരിപൂരേത്വാ സമ്മാസമാധിം പരിപൂരേസ്സതീ’തി ഠാനമേതം വിജ്ജതി. ‘സമ്മാസമാധിം പരിപൂരേത്വാ സംയോജനാനി പജഹിസ്സതീ’തി ഠാനമേതം വിജ്ജതി. ‘സംയോജനാനി പഹായ നിബ്ബാനം സച്ഛികരിസ്സതീ’തി ഠാനമേതം വിജ്ജതീ’’തി. ചതുത്ഥം.
‘‘‘So vata, bhikkhave, bhikkhu na saṅgaṇikārāmo na saṅgaṇikarato na saṅgaṇikārāmataṃ anuyutto, na gaṇārāmo na gaṇarato na gaṇārāmataṃ anuyutto, eko paviveke abhiramissatī’ti ṭhānametaṃ vijjati. ‘Eko paviveke abhiramanto cittassa nimittaṃ gahessatī’ti ṭhānametaṃ vijjati. ‘Cittassa nimittaṃ gaṇhanto sammādiṭṭhiṃ paripūressatī’ti ṭhānametaṃ vijjati. ‘Sammādiṭṭhiṃ paripūretvā sammāsamādhiṃ paripūressatī’ti ṭhānametaṃ vijjati. ‘Sammāsamādhiṃ paripūretvā saṃyojanāni pajahissatī’ti ṭhānametaṃ vijjati. ‘Saṃyojanāni pahāya nibbānaṃ sacchikarissatī’ti ṭhānametaṃ vijjatī’’ti. Catutthaṃ.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൪. സങ്ഗണികാരാമസുത്തവണ്ണനാ • 4. Saṅgaṇikārāmasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൪-൫. സങ്ഗണികാരാമസുത്താദിവണ്ണനാ • 4-5. Saṅgaṇikārāmasuttādivaṇṇanā
