| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
(១៤) ៤. បុគ្គលវគ្គោ
(14) 4. Puggalavaggo
១. សំយោជនសុត្តវណ្ណនា
1. Saṃyojanasuttavaṇṇanā
១៣១. ចតុត្ថស្ស បឋមេ ឧបបត្តិបដិលាភិយានីតិ យេហិ អនន្តរា ឧបបត្តិំ បដិលភតិ។ ភវបដិលាភិយានីតិ ឧបបត្តិភវស្ស បដិលាភាយ បច្ចយានិ។ សកទាគាមិស្សាតិ ឥទំ អប្បហីនសំយោជនេសុ អរិយេសុ ឧត្តមកោដិយា គហិតំ។ យស្មា បន អន្តរាបរិនិព្ពាយិស្ស អន្តរា ឧបបត្តិ នត្ថិ, យំ បន សោ តត្ថ ឈានំ សមាបជ្ជតិ, តំ កុសលត្តា ‘‘ឧបបត្តិភវស្ស បច្ចយោ’’ តេវ សង្ខ្យំ គច្ឆតិ។ តស្មាស្ស ‘‘ឧបបត្តិបដិលាភិយានិ សំយោជនានិ បហីនានិ, ភវបដិលាភិយានិ សំយោជនានិ អប្បហីនានី’’តិ វុត្តំ។ ឱរម្ភាគិយេសុ ច អប្បហីនំ ឧបាទាយ សកទាគាមិស្ស អវិសេសេន ‘‘ឱរម្ភាគិយានិ សំយោជនានិ អប្បហីនានី’’តិ វុត្តំ។ សេសមេត្ថ ឧត្តានមេវ។
131. Catutthassa paṭhame upapattipaṭilābhiyānīti yehi anantarā upapattiṃ paṭilabhati. Bhavapaṭilābhiyānīti upapattibhavassa paṭilābhāya paccayāni. Sakadāgāmissāti idaṃ appahīnasaṃyojanesu ariyesu uttamakoṭiyā gahitaṃ. Yasmā pana antarāparinibbāyissa antarā upapatti natthi, yaṃ pana so tattha jhānaṃ samāpajjati, taṃ kusalattā ‘‘upapattibhavassa paccayo’’ teva saṅkhyaṃ gacchati. Tasmāssa ‘‘upapattipaṭilābhiyāni saṃyojanāni pahīnāni, bhavapaṭilābhiyāni saṃyojanāni appahīnānī’’ti vuttaṃ. Orambhāgiyesu ca appahīnaṃ upādāya sakadāgāmissa avisesena ‘‘orambhāgiyāni saṃyojanāni appahīnānī’’ti vuttaṃ. Sesamettha uttānameva.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១. សំយោជនសុត្តំ • 1. Saṃyojanasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១. សំយោជនសុត្តវណ្ណនា • 1. Saṃyojanasuttavaṇṇanā
