| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
46. සංවරනිද්දෙසවණ්ණනා
46. Saṃvaraniddesavaṇṇanā
453. සංවරණං චක්ඛුද්වාරාදීනං සතිකවාටෙන පිදහනං සංවරො. තත්ථ කිඤ්චාපි චක්ඛුන්ද්රියෙ සංවරො නත්ථි, න හි චක්ඛුපසාදං නිස්සාය සති උප්පජ්ජති, නෙව භවඞ්ගසමයෙ ආවජ්ජනාදීනං අඤ්ඤතරසමයෙ, ජවනක්ඛණෙ පන උප්පජ්ජතීති තදා සංවරො හොති, එවං හොන්තෙ පන සො චක්ඛුද්වාරාදීනං සංවරොති වුච්චති. චක්ඛුසොතාදිභෙදෙහීති චක්ඛු ච සොතඤ්ච, තානි ආදි යෙසං, තෙව භෙදා චාති සමාසො, තෙහි ද්වාරෙහි. අභිජ්ඣාදිප්පවත්තියා අච්චන්තොපකාරකත්තා කරණත්ථෙ චෙත්ථ තතියා. එතෙන චක්ඛුසොතඝානජිව්හාකායමනසඞ්ඛාතානි ද්වාරානි වුත්තානි. රූපසද්දාදිගොචරෙති රූපසද්දගන්ධරසඵොට්ඨබ්බධම්මසඞ්ඛාතෙ විසයෙ. අභිජ්ඣාදොමනස්සාදිප්පවත්තින්ති එත්ථ පරසම්පත්තිං අභිමුඛං ඣායතීති අභිජ්ඣා, බලවතණ්හා. ආදි-සද්දෙන මිච්ඡාදිට්ඨිආදයො අනෙකෙ අකුසලා ධම්මා සඞ්ගහිතා.
453. Saṃvaraṇaṃ cakkhudvārādīnaṃ satikavāṭena pidahanaṃ saṃvaro. Tattha kiñcāpi cakkhundriye saṃvaro natthi, na hi cakkhupasādaṃ nissāya sati uppajjati, neva bhavaṅgasamaye āvajjanādīnaṃ aññatarasamaye, javanakkhaṇe pana uppajjatīti tadā saṃvaro hoti, evaṃ honte pana so cakkhudvārādīnaṃ saṃvaroti vuccati. Cakkhusotādibhedehīti cakkhu ca sotañca, tāni ādi yesaṃ, teva bhedā cāti samāso, tehi dvārehi. Abhijjhādippavattiyā accantopakārakattā karaṇatthe cettha tatiyā. Etena cakkhusotaghānajivhākāyamanasaṅkhātāni dvārāni vuttāni. Rūpasaddādigocareti rūpasaddagandharasaphoṭṭhabbadhammasaṅkhāte visaye. Abhijjhādomanassādippavattinti ettha parasampattiṃ abhimukhaṃ jhāyatīti abhijjhā, balavataṇhā. Ādi-saddena micchādiṭṭhiādayo aneke akusalā dhammā saṅgahitā.
454. සකං චිත්තං කිට්ඨාදිං දුප්පසුං විය නිග්ගණ්හෙය්යාති සම්බන්ධො. කිට්ඨන්ති කිට්ඨට්ඨානෙ උප්පන්නං සස්සං ගහිතං. කිට්ඨං අදතීති කිට්ඨාදි, තං. සම්පජානොති සාත්ථකසප්පායගොචරඅසම්මොහසඞ්ඛාතෙන චතුසම්පජඤ්ඤෙන සම්මා පජානො. ඉමිනා ඉන්ද්රියසංවරසීලං කථිතං.
454. Sakaṃ cittaṃ kiṭṭhādiṃ duppasuṃ viya niggaṇheyyāti sambandho. Kiṭṭhanti kiṭṭhaṭṭhāne uppannaṃ sassaṃ gahitaṃ. Kiṭṭhaṃ adatīti kiṭṭhādi, taṃ. Sampajānoti sātthakasappāyagocaraasammohasaṅkhātena catusampajaññena sammā pajāno. Iminā indriyasaṃvarasīlaṃ kathitaṃ.
සංවරනිද්දෙසවණ්ණනා නිට්ඨිතා.
Saṃvaraniddesavaṇṇanā niṭṭhitā.
