| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
သမုဋ္ဌာနသီသသင္ခေပော
Samuṭṭhānasīsasaṅkhepo
သမုဋ္ဌာနသ္သုဒ္ဒာနံ
Samuṭṭhānassuddānaṃ
၂၅၇.
257.
အနိစ္စာ သဗ္ဗေ သင္ခာရာ၊ ဒုက္ခာနတ္တာ စ သင္ခတာ။
Aniccā sabbe saṅkhārā, dukkhānattā ca saṅkhatā;
နိဗ္ဗာနဉ္စေဝ ပညတ္တိ၊ အနတ္တာ ဣတိ နိစ္ဆယာ။
Nibbānañceva paññatti, anattā iti nicchayā.
ဗုဒ္ဓစန္ဒေ အနုပ္ပန္နေ၊ ဗုဒ္ဓာဒိစ္စေ အနုဂ္ဂတေ။
Buddhacande anuppanne, buddhādicce anuggate;
တေသံ သဘာဂဓမ္မာနံ၊ နာမမတ္တံ န နာယတိ။
Tesaṃ sabhāgadhammānaṃ, nāmamattaṃ na nāyati.
ဒုက္ကရံ ဝိဝိဓံ ကတ္ဝာ၊ ပူရယိတ္ဝာန ပာရမီ။
Dukkaraṃ vividhaṃ katvā, pūrayitvāna pāramī;
ဥပ္ပဇ္ဇန္တိ မဟာဝီရာ၊ စက္ခုဘူတာ သဗ္ရဟ္မကေ။
Uppajjanti mahāvīrā, cakkhubhūtā sabrahmake.
တေ ဒေသယန္တိ သဒ္ဓမ္မံ၊ ဒုက္ခဟာနိံ သုခာဝဟံ။
Te desayanti saddhammaṃ, dukkhahāniṃ sukhāvahaṃ;
အင္ဂီရသော သက္ယမုနိ၊ သဗ္ဗဘူတာနုကမ္ပကော။
Aṅgīraso sakyamuni, sabbabhūtānukampako.
သဗ္ဗသတ္တုတ္တမော သီဟော၊ ပိဋကေ တီဏိ ဒေသယိ။
Sabbasattuttamo sīho, piṭake tīṇi desayi;
သုတ္တန္တမဘိဓမ္မဉ္စ၊ ဝိနယဉ္စ မဟာဂုဏံ။
Suttantamabhidhammañca, vinayañca mahāguṇaṃ.
ဧဝံ နီယတိ သဒ္ဓမ္မော၊ ဝိနယော ယဒိ တိဋ္ဌတိ။
Evaṃ nīyati saddhammo, vinayo yadi tiṭṭhati;
ဥဘတော စ ဝိဘင္ဂာနိ၊ ခန္ဓကာ ယာ စ မာတိကာ။
Ubhato ca vibhaṅgāni, khandhakā yā ca mātikā.
မာလာ သုတ္တဂုဏေနေဝ၊ ပရိဝာရေန ဂန္ထိတာ။
Mālā suttaguṇeneva, parivārena ganthitā;
တသ္သေဝ ပရိဝာရသ္သ၊ သမုဋ္ဌာနံ နိယတော ကတံ။
Tasseva parivārassa, samuṭṭhānaṃ niyato kataṃ.
သမ္ဘေဒံ နိဒာနံ စညံ၊ သုတ္တေ ဒိသ္သန္တိ ဥပရိ။
Sambhedaṃ nidānaṃ caññaṃ, sutte dissanti upari;
တသ္မာ သိက္ခေ ပရိဝာရံ၊ ဓမ္မကာမော သုပေသလောတိ။
Tasmā sikkhe parivāraṃ, dhammakāmo supesaloti.
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / သမုဋ္ဌာနသီသဝဏ္ဏနာ • Samuṭṭhānasīsavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / သမုဋ္ဌာနသီသဝဏ္ဏနာ • Samuṭṭhānasīsavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / သမုဋ္ဌာနသီသဝဏ္ဏနာ • Samuṭṭhānasīsavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / သမုဋ္ဌာနသီသဝဏ္ဏနာ • Samuṭṭhānasīsavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / သမုဋ္ဌာနသီသဝဏ္ဏနာ • Samuṭṭhānasīsavaṇṇanā
