| Library / Tipiṭaka / తిపిటక • Tipiṭaka / పఞ్చపకరణ-అట్ఠకథా • Pañcapakaraṇa-aṭṭhakathā |
౧౯. సమ్పయుత్తపచ్చయనిద్దేసవణ్ణనా
19. Sampayuttapaccayaniddesavaṇṇanā
౧౯. సమ్పయుత్తపచ్చయనిద్దేసే పాళి ఉత్తానత్థా ఏవ. అయం పన సమ్పయుత్తపచ్చయో నామ సఙ్ఖేపతో సబ్బేపి అరూపినో ఖన్ధా. పభేదతో పనేస జాతితో కుసలాదీనం, భూమితో చ కామావచరాదీనం వసేన అనేకధా భిజ్జతీతి ఏవమేత్థ నానప్పకారభేదతో విఞ్ఞాతబ్బో వినిచ్ఛయో. ఏవం భిన్నే పనేత్థ చతుభూమకేసుపి కుసలక్ఖన్ధేసు ఏకో ఖన్ధో తిణ్ణం ఖన్ధానం, తయో ఏకస్స, ద్వే ద్విన్నన్తి ఏవం సబ్బేపి అఞ్ఞమఞ్ఞం సమ్పయుత్తపచ్చయేన పచ్చయో. అకుసలవిపాకకిరియక్ఖన్ధేసుపి ఏసేవ నయోతి ఏవమేత్థ పచ్చయుప్పన్నతోపి విఞ్ఞాతబ్బో వినిచ్ఛయోతి.
19. Sampayuttapaccayaniddese pāḷi uttānatthā eva. Ayaṃ pana sampayuttapaccayo nāma saṅkhepato sabbepi arūpino khandhā. Pabhedato panesa jātito kusalādīnaṃ, bhūmito ca kāmāvacarādīnaṃ vasena anekadhā bhijjatīti evamettha nānappakārabhedato viññātabbo vinicchayo. Evaṃ bhinne panettha catubhūmakesupi kusalakkhandhesu eko khandho tiṇṇaṃ khandhānaṃ, tayo ekassa, dve dvinnanti evaṃ sabbepi aññamaññaṃ sampayuttapaccayena paccayo. Akusalavipākakiriyakkhandhesupi eseva nayoti evamettha paccayuppannatopi viññātabbo vinicchayoti.
సమ్పయుత్తపచ్చయనిద్దేసవణ్ణనా.
Sampayuttapaccayaniddesavaṇṇanā.
Related texts:
తిపిటక (మూల) • Tipiṭaka (Mūla) / అభిధమ్మపిటక • Abhidhammapiṭaka / పట్ఠానపాళి • Paṭṭhānapāḷi / (౨) పచ్చయనిద్దేసో • (2) Paccayaniddeso
