| Library / Tipiṭaka / තිපිටක • Tipiṭaka / කඞ්ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
30-32. සමතිත්තිකාදිසික්ඛාපදවණ්ණනා
30-32. Samatittikādisikkhāpadavaṇṇanā
සමතිත්තිකන්ති භාවනපුංසකනිද්දෙසො, සමතිත්තිකං කත්වාති අත්ථො. එවමඤ්ඤෙසුපි ඊදිසෙසු ඨානෙසු අත්ථො දට්ඨබ්බො. සමපුණ්ණන්ති (සාරත්ථ. ටී. පාචිත්තිය 3.605) පත්තස්ස අන්තොමුඛවට්ටිලෙඛාසමපුණ්ණං. සමභරිතන්ති එත්ථාපි එසෙව නයො. තඤ්ච ඛො අධිට්ඨානුපගපත්තස්සෙව, නෙතරස්ස. තෙනාහ ‘‘අධිට්ඨානුපගපත්තස්සා’’තිආදි. රචිතන්ති කතං, පක්ඛිත්තං පූරිතන්ති අත්ථො. යං කිඤ්චි යාවකාලිකන්ති යාගුභත්තඵලාඵලාදිං යං කිඤ්චි ආමිසජාතිකං. යත්ථ කත්ථචීති අධිට්ඨානුපගො වා හොතු, අනධිට්ඨානුපගො වා යත්ථ කත්ථචි පත්තෙ . ථූපීකතානීති ථූපං විය කතානි, අධිට්ඨානුපගස්ස පත්තස්ස අන්තොමුඛවට්ටිලෙඛං අතික්කමිත්වා කතානීති අත්ථො. ඉදඤ්ච ‘‘යාමකාලිකාදීනී’’ති ඉමස්ස වසෙන වුත්තං, ‘‘යාවකාලික’’න්ති ඉමස්ස පන වසෙන වචනබ්යත්තයං කත්වා ‘‘ථූපීකතම්පි වට්ටතී’’ති යොජෙතබ්බං. පි-සද්දෙන අථූපීකතානි වට්ටන්තීති එත්ථ කථාව නත්ථීති දස්සෙති. හෙට්ඨා ඔරොහතීති සමන්තා ඔකාසසබ්භාවතො චාලියමානං හෙට්ඨා භස්සති . තක්කොලවටංසකාදයොති එත්ථ මත්ථකෙ ඨපිතතක්කොලමෙව වටංසකසදිසත්තා තක්කොලවටංසකං. ආදිසද්දෙන පුප්ඵවටංසකකටුකඵලාදිවටංසකානං (පාචි. අට්ඨ. 605) ගහණං, න තං ථූපීකතං නාම හොති පාටෙක්කං භාජනත්තා පණ්ණාදීනං.
Samatittikanti bhāvanapuṃsakaniddeso, samatittikaṃ katvāti attho. Evamaññesupi īdisesu ṭhānesu attho daṭṭhabbo. Samapuṇṇanti (sārattha. ṭī. pācittiya 3.605) pattassa antomukhavaṭṭilekhāsamapuṇṇaṃ. Samabharitanti etthāpi eseva nayo. Tañca kho adhiṭṭhānupagapattasseva, netarassa. Tenāha ‘‘adhiṭṭhānupagapattassā’’tiādi. Racitanti kataṃ, pakkhittaṃ pūritanti attho. Yaṃ kiñci yāvakālikanti yāgubhattaphalāphalādiṃ yaṃ kiñci āmisajātikaṃ. Yattha katthacīti adhiṭṭhānupago vā hotu, anadhiṭṭhānupago vā yattha katthaci patte . Thūpīkatānīti thūpaṃ viya katāni, adhiṭṭhānupagassa pattassa antomukhavaṭṭilekhaṃ atikkamitvā katānīti attho. Idañca ‘‘yāmakālikādīnī’’ti imassa vasena vuttaṃ, ‘‘yāvakālika’’nti imassa pana vasena vacanabyattayaṃ katvā ‘‘thūpīkatampi vaṭṭatī’’ti yojetabbaṃ. Pi-saddena athūpīkatāni vaṭṭantīti ettha kathāva natthīti dasseti. Heṭṭhā orohatīti samantā okāsasabbhāvato cāliyamānaṃ heṭṭhā bhassati . Takkolavaṭaṃsakādayoti ettha matthake ṭhapitatakkolameva vaṭaṃsakasadisattā takkolavaṭaṃsakaṃ. Ādisaddena pupphavaṭaṃsakakaṭukaphalādivaṭaṃsakānaṃ (pāci. aṭṭha. 605) gahaṇaṃ, na taṃ thūpīkataṃ nāma hoti pāṭekkaṃ bhājanattā paṇṇādīnaṃ.
සමතිත්තිකාදිසික්ඛාපදවණ්ණනා නිට්ඨිතා.
Samatittikādisikkhāpadavaṇṇanā niṭṭhitā.
