| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၃၀-၃၂. သမတိတ္တိကာဒိသိက္ခာပဒဝဏ္ဏနာ
30-32. Samatittikādisikkhāpadavaṇṇanā
သမတိတ္တိကန္တိ ဘာဝနပုံသကနိဒ္ဒေသော, သမတိတ္တိကံ ကတ္ဝာတိ အတ္ထော။ ဧဝမညေသုပိ ဤဒိသေသု ဌာနေသု အတ္ထော ဒဋ္ဌဗ္ဗော။ သမပုဏ္ဏန္တိ (သာရတ္ထ. ဋီ. ပာစိတ္တိယ ၃.၆၀၅) ပတ္တသ္သ အန္တောမုခဝဋ္ဋိလေခာသမပုဏ္ဏံ။ သမဘရိတန္တိ ဧတ္ထာပိ ဧသေဝ နယော။ တဉ္စ ခော အဓိဋ္ဌာနုပဂပတ္တသ္သေဝ, နေတရသ္သ။ တေနာဟ ‘‘အဓိဋ္ဌာနုပဂပတ္တသ္သာ’’တိအာဒိ။ ရစိတန္တိ ကတံ, ပက္ခိတ္တံ ပူရိတန္တိ အတ္ထော။ ယံ ကိဉ္စိ ယာဝကာလိကန္တိ ယာဂုဘတ္တဖလာဖလာဒိံ ယံ ကိဉ္စိ အာမိသဇာတိကံ။ ယတ္ထ ကတ္ထစီတိ အဓိဋ္ဌာနုပဂော ဝာ ဟောတု, အနဓိဋ္ဌာနုပဂော ဝာ ယတ္ထ ကတ္ထစိ ပတ္တေ ။ ထူပီကတာနီတိ ထူပံ ဝိယ ကတာနိ, အဓိဋ္ဌာနုပဂသ္သ ပတ္တသ္သ အန္တောမုခဝဋ္ဋိလေခံ အတိက္ကမိတ္ဝာ ကတာနီတိ အတ္ထော။ ဣဒဉ္စ ‘‘ယာမကာလိကာဒီနီ’’တိ ဣမသ္သ ဝသေန ဝုတ္တံ, ‘‘ယာဝကာလိက’’န္တိ ဣမသ္သ ပန ဝသေန ဝစနဗ္ယတ္တယံ ကတ္ဝာ ‘‘ထူပီကတမ္ပိ ဝဋ္ဋတီ’’တိ ယောဇေတဗ္ဗံ။ ပိ-သဒ္ဒေန အထူပီကတာနိ ဝဋ္ဋန္တီတိ ဧတ္ထ ကထာဝ နတ္ထီတိ ဒသ္သေတိ။ ဟေဋ္ဌာ ဩရောဟတီတိ သမန္တာ ဩကာသသဗ္ဘာဝတော စာလိယမာနံ ဟေဋ္ဌာ ဘသ္သတိ ။ တက္ကောလဝဋံသကာဒယောတိ ဧတ္ထ မတ္ထကေ ဌပိတတက္ကောလမေဝ ဝဋံသကသဒိသတ္တာ တက္ကောလဝဋံသကံ။ အာဒိသဒ္ဒေန ပုပ္ဖဝဋံသကကဋုကဖလာဒိဝဋံသကာနံ (ပာစိ. အဋ္ဌ. ၆၀၅) ဂဟဏံ, န တံ ထူပီကတံ နာမ ဟောတိ ပာဋေက္ကံ ဘာဇနတ္တာ ပဏ္ဏာဒီနံ။
Samatittikanti bhāvanapuṃsakaniddeso, samatittikaṃ katvāti attho. Evamaññesupi īdisesu ṭhānesu attho daṭṭhabbo. Samapuṇṇanti (sārattha. ṭī. pācittiya 3.605) pattassa antomukhavaṭṭilekhāsamapuṇṇaṃ. Samabharitanti etthāpi eseva nayo. Tañca kho adhiṭṭhānupagapattasseva, netarassa. Tenāha ‘‘adhiṭṭhānupagapattassā’’tiādi. Racitanti kataṃ, pakkhittaṃ pūritanti attho. Yaṃ kiñci yāvakālikanti yāgubhattaphalāphalādiṃ yaṃ kiñci āmisajātikaṃ. Yattha katthacīti adhiṭṭhānupago vā hotu, anadhiṭṭhānupago vā yattha katthaci patte . Thūpīkatānīti thūpaṃ viya katāni, adhiṭṭhānupagassa pattassa antomukhavaṭṭilekhaṃ atikkamitvā katānīti attho. Idañca ‘‘yāmakālikādīnī’’ti imassa vasena vuttaṃ, ‘‘yāvakālika’’nti imassa pana vasena vacanabyattayaṃ katvā ‘‘thūpīkatampi vaṭṭatī’’ti yojetabbaṃ. Pi-saddena athūpīkatāni vaṭṭantīti ettha kathāva natthīti dasseti. Heṭṭhā orohatīti samantā okāsasabbhāvato cāliyamānaṃ heṭṭhā bhassati . Takkolavaṭaṃsakādayoti ettha matthake ṭhapitatakkolameva vaṭaṃsakasadisattā takkolavaṭaṃsakaṃ. Ādisaddena pupphavaṭaṃsakakaṭukaphalādivaṭaṃsakānaṃ (pāci. aṭṭha. 605) gahaṇaṃ, na taṃ thūpīkataṃ nāma hoti pāṭekkaṃ bhājanattā paṇṇādīnaṃ.
သမတိတ္တိကာဒိသိက္ခာပဒဝဏ္ဏနာ နိဋ္ဌိတာ။
Samatittikādisikkhāpadavaṇṇanā niṭṭhitā.
