| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
36. ஸமஸீஸட்ட²ஞாணனித்³தே³ஸவண்ணனா
36. Samasīsaṭṭhañāṇaniddesavaṇṇanā
87. ஸமஸீஸட்ட²ஞாணனித்³தே³ஸே பஞ்சக்க²ந்தா⁴திஆதீ³ஹி த³ஸஹி ராஸீஹி ஸப்³ப³த⁴ம்மஸங்க³ஹோ வேதி³தப்³போ³. ந ஹி ஏகேகஸ்ஸ வஸேன ஆயதனதா⁴துராஸிவஜ்ஜேஹி ஸேஸேஹி அட்ட²ஹி ராஸீஹி விஸுங் விஸுங் ஸப்³ப³த⁴ம்மோ ஸங்க³ய்ஹதீதி. யஸ்மா பன லோகுத்தரத⁴ம்மா ஹேதுஸமுச்சே²தே³ன ஸமுச்சி²ந்தி³தப்³பா³ ந ஹொந்தி, தஸ்மா ஸப்³ப³த⁴ம்மஸத்³தே³ன ஸங்க³ஹிதாபி லோகுத்தரத⁴ம்மா ஸமுச்சே²த³வஸேன ஸம்ப⁴வதோ இத⁴ ந க³ஹேதப்³பா³, ஹேதுஸமுச்சே²தே³ன ஸமுச்சி²ந்தி³தப்³பா³ ஏவ தேபூ⁴மகத⁴ம்மா க³ஹேதப்³பா³. ஸம்மா ஸமுச்சி²ந்த³தீதி யதா²யோக³ங் விக்க²ம்ப⁴னதத³ங்க³ஸமுச்சே²த³பஹானவஸேன பரியுட்டா²னங் அனுஸயஞ்ச நிரோதெ⁴ந்தோ ஸம்மா ஸமுச்சி²ந்த³தி. ஏவங் புக்³க³லாதி⁴ட்டா²னாய தே³ஸனாய ஸம்மா ஸமுச்சே²தோ³ நித்³தி³ட்டோ². நிரோதே⁴தீதி அனுப்பாத³னிரோதே⁴ன நிரோதே⁴தி. இமினா ஸமுச்சே²த³த்தோ² வுத்தோ. ந உபட்டா²தீதி ஏவங் நிரோதே⁴ கதே ஸோ ஸோ த⁴ம்மோ புன ந உபதிட்ட²தி, ந உப்பஜ்ஜதீதி அத்தோ². இமினா நிரோத⁴த்தோ² வுத்தோ. ஏவங் அனுபட்ட²ஹனத⁴ம்மவஸேன அனுபட்டா²னபா⁴வோ நித்³தி³ட்டோ². ஸமந்தி காமச்ச²ந்தா³தீ³னங் ஸமிதத்தா ஸமங். தானி பன நெக்க²ம்மாதீ³னி ஸத்த, ரூபாரூபஜ்ஜா²னானி அட்ட², மஹாவிபஸ்ஸனா அட்டா²ரஸ, அரியமக்³கா³ சத்தாரோதி ஸத்ததிங்ஸ ஹொந்தி.
87. Samasīsaṭṭhañāṇaniddese pañcakkhandhātiādīhi dasahi rāsīhi sabbadhammasaṅgaho veditabbo. Na hi ekekassa vasena āyatanadhāturāsivajjehi sesehi aṭṭhahi rāsīhi visuṃ visuṃ sabbadhammo saṅgayhatīti. Yasmā pana lokuttaradhammā hetusamucchedena samucchinditabbā na honti, tasmā sabbadhammasaddena saṅgahitāpi lokuttaradhammā samucchedavasena sambhavato idha na gahetabbā, hetusamucchedena samucchinditabbā eva tebhūmakadhammā gahetabbā. Sammā samucchindatīti yathāyogaṃ vikkhambhanatadaṅgasamucchedapahānavasena pariyuṭṭhānaṃ anusayañca nirodhento sammā samucchindati. Evaṃ puggalādhiṭṭhānāya desanāya sammā samucchedo niddiṭṭho. Nirodhetīti anuppādanirodhena nirodheti. Iminā samucchedattho vutto. Na upaṭṭhātīti evaṃ nirodhe kate so so dhammo puna na upatiṭṭhati, na uppajjatīti attho. Iminā nirodhattho vutto. Evaṃ anupaṭṭhahanadhammavasena anupaṭṭhānabhāvo niddiṭṭho. Samanti kāmacchandādīnaṃ samitattā samaṃ. Tāni pana nekkhammādīni satta, rūpārūpajjhānāni aṭṭha, mahāvipassanā aṭṭhārasa, ariyamaggā cattāroti sattatiṃsa honti.
தேரஸ ஸீஸானி ஸீஸபூ⁴தானங் ஸப்³பே³ஸங் ஸங்க³ஹவஸேன வுத்தானி. இத⁴ பன ஸத்³தா⁴தீ³னி அட்டே²வ ஸீஸானி யுஜ்ஜந்தி. ந ஹி அரஹதோ தண்ஹாதீ³னி பஞ்ச ஸீஸானி ஸந்தி. பலிபோ³த⁴ஸீஸந்தி பலிபு³ந்த⁴னங் பலிபோ³தோ⁴, நிப்³பா³னமக்³கா³வரணந்தி அத்தோ². ஸீஸந்தி பதா⁴னங், அதி⁴கந்தி அத்தோ². பலிபோ³தோ⁴யேவ ஸீஸங், தங்ஸம்பயுத்தாதி³ஸப்³ப³பலிபோ³தே⁴ஸு வா ஸீஸந்தி பலிபோ³த⁴ஸீஸங். ஏஸ நயோ ஸேஸேஸு. விஸேஸதோ பன வினிப³ந்த⁴னந்தி உன்னதிவஸேன ஸங்ஸாரே ப³ந்த⁴னங். பராமாஸோதி அபி⁴னிவேஸோ. விக்கே²போதி விப்பகிண்ணதா. கிலேஸோதி கிலிஸ்ஸனங். அதி⁴மொக்கோ²தி அதி⁴முச்சனங். பக்³க³ஹோதி உஸ்ஸாஹனங். உபட்டா²னந்தி அபிலாபனங். அவிக்கே²போதி அவிப்பகிண்ணதா. த³ஸ்ஸனந்தி யதா²ஸபா⁴வபடிவேதோ⁴. பவத்தந்தி உபாதி³ன்னக்க²ந்த⁴பவத்தங். கோ³சரோதி ஆரம்மணங். இமேஸு த்³வாத³ஸஸுபி வாரேஸு பதா⁴னட்டோ² ஸீஸட்டோ². விமொக்கோ²தி விக்க²ம்ப⁴னதத³ங்க³ஸமுச்சே²த³படிப்பஸ்ஸத்³தி⁴னிஸ்ஸரணவிமுத்தீஸு பஞ்சஸு நிஸ்ஸரணவிமுத்தி நிப்³பா³னங். ஸங்கா²ரஸீஸந்தி ஸப்³ப³ஸங்க²தஸங்கா²ரானங் ஸீஸங், கோடி அவஸானந்தி அத்தோ². ஏதேன அனுபாதி³ஸேஸபரினிப்³பா³னங் வுத்தங். ஸங்கா²ராபா⁴வமத்தவஸேன வா க²ந்த⁴பரினிப்³பா³னமேவ வுத்தங் ஹோதி. நெக்க²ம்மாதி³கங் ஸமஞ்ச ஸத்³தா⁴தி³கங் ஸீஸஞ்ச, ஸமஸீஸங் வா அஸ்ஸ அத்தீ²தி ஸமஸீஸீதி. அத² வா தேரஸன்னங் ஸீஸானங் தண்ஹாதீ³னி பஞ்ச ஸீஸானி ஸமுத³யஸச்சங், ஸத்³தா⁴தீ³னி பஞ்ச மக்³க³ஸச்சங், பவத்தஸீஸங் ஜீவிதிந்த்³ரியங் து³க்க²ஸச்சங், கோ³சரஸீஸஞ்ச ஸங்கா²ரஸீஸஞ்ச நிரோத⁴ஸச்சந்தி இமேஸங் சதுன்னங் அரியஸச்சானங் ஏகஸ்மிங் ரோகே³ வா ஏகஸ்மிங் இரியாபதே² வா ஏகஸ்மிங் ஸபா⁴க³ஜீவிதிந்த்³ரியே வா அபி⁴ஸமயோ ச அனுபாதி³ஸேஸபரினிப்³பா³னஞ்ச யஸ்ஸ ஹோதி, ஸோ புப்³பே³ வுத்தஸமானஞ்ச இமேஸஞ்ச ஸீஸானங் அத்தி²தாய ஸமஸீஸீதி வுச்சதி.
Terasa sīsāni sīsabhūtānaṃ sabbesaṃ saṅgahavasena vuttāni. Idha pana saddhādīni aṭṭheva sīsāni yujjanti. Na hi arahato taṇhādīni pañca sīsāni santi. Palibodhasīsanti palibundhanaṃ palibodho, nibbānamaggāvaraṇanti attho. Sīsanti padhānaṃ, adhikanti attho. Palibodhoyeva sīsaṃ, taṃsampayuttādisabbapalibodhesu vā sīsanti palibodhasīsaṃ. Esa nayo sesesu. Visesato pana vinibandhananti unnativasena saṃsāre bandhanaṃ. Parāmāsoti abhiniveso. Vikkhepoti vippakiṇṇatā. Kilesoti kilissanaṃ. Adhimokkhoti adhimuccanaṃ. Paggahoti ussāhanaṃ. Upaṭṭhānanti apilāpanaṃ. Avikkhepoti avippakiṇṇatā. Dassananti yathāsabhāvapaṭivedho. Pavattanti upādinnakkhandhapavattaṃ. Gocaroti ārammaṇaṃ. Imesu dvādasasupi vāresu padhānaṭṭho sīsaṭṭho. Vimokkhoti vikkhambhanatadaṅgasamucchedapaṭippassaddhinissaraṇavimuttīsu pañcasu nissaraṇavimutti nibbānaṃ. Saṅkhārasīsanti sabbasaṅkhatasaṅkhārānaṃ sīsaṃ, koṭi avasānanti attho. Etena anupādisesaparinibbānaṃ vuttaṃ. Saṅkhārābhāvamattavasena vā khandhaparinibbānameva vuttaṃ hoti. Nekkhammādikaṃ samañca saddhādikaṃ sīsañca, samasīsaṃ vā assa atthīti samasīsīti. Atha vā terasannaṃ sīsānaṃ taṇhādīni pañca sīsāni samudayasaccaṃ, saddhādīni pañca maggasaccaṃ, pavattasīsaṃ jīvitindriyaṃ dukkhasaccaṃ, gocarasīsañca saṅkhārasīsañca nirodhasaccanti imesaṃ catunnaṃ ariyasaccānaṃ ekasmiṃ roge vā ekasmiṃ iriyāpathe vā ekasmiṃ sabhāgajīvitindriye vā abhisamayo ca anupādisesaparinibbānañca yassa hoti, so pubbe vuttasamānañca imesañca sīsānaṃ atthitāya samasīsīti vuccati.
ஸமஸீஸட்ட²ஞாணனித்³தே³ஸவண்ணனா நிட்டி²தா.
Samasīsaṭṭhañāṇaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 36. ஸமஸீஸட்ட²ஞாணனித்³தே³ஸோ • 36. Samasīsaṭṭhañāṇaniddeso
