| Library / Tipiṭaka / তিপিটক • Tipiṭaka / নেত্তিৰিভাৰিনী • Nettivibhāvinī |
১৬. সমারোপনহারসম্পাতৰিভাৰনা
16. Samāropanahārasampātavibhāvanā
৭৮. ‘‘তস্মা রক্খিতচিত্তস্সা’’তি পদেন যং রক্খিতচিত্তং ৰুত্তং, তং রক্খিতচিত্তং তিণ্ণং সুচরিতানং কম্মানং পদট্ঠানং। সম্মাদিট্ঠিযা ভাৰিতায অরিযো অট্ঠঙ্গিকো মগ্গো ভাৰিতো ভৰতি একতো ভাৰিতব্বত্তা, পদট্ঠানকারণত্তা চ। তেন ৰুত্তং – ‘‘সম্মাদিট্ঠিতো হী’’তিআদি। যস্স অরহতো সমাধিৰিমুত্তি ভৰতি, অযং অরহা অনুপাদিসেসো পুগ্গলো, অযং সমাধিৰিমুত্তি অনুপাদিসেসা নিব্বানধাতু।
78.‘‘Tasmārakkhitacittassā’’ti padena yaṃ rakkhitacittaṃ vuttaṃ, taṃ rakkhitacittaṃ tiṇṇaṃ sucaritānaṃ kammānaṃ padaṭṭhānaṃ. Sammādiṭṭhiyā bhāvitāya ariyo aṭṭhaṅgiko maggo bhāvito bhavati ekato bhāvitabbattā, padaṭṭhānakāraṇattā ca. Tena vuttaṃ – ‘‘sammādiṭṭhito hī’’tiādi. Yassa arahato samādhivimutti bhavati, ayaṃ arahā anupādiseso puggalo, ayaṃ samādhivimutti anupādisesā nibbānadhātu.
‘‘দেসনাহারসম্পাতাদিকো হারসম্পাতো যেন সোল়সপ্পভেদভাৰেন সুত্তপ্পদেসত্থে নিদ্ধারেত্ৰা যুজ্জিতো, সোল়সপ্পভেদভাৰো কেন অম্হেহি সদ্দহিতব্বো’’তি ৰত্তব্বত্তা ‘‘তেনাহা’’তিআদি ৰুত্তং। তেন সোল়সপ্পভেদভাৰেন আযস্মা মহাকচ্চানো ‘‘সোল়স…পে॰… সুত্ত’’ন্তি যং ৰচনং আহ, তেন ৰচনেন সোল়সপ্পভেদভাৰো তুম্হেহি সদ্দহিতব্বো।
‘‘Desanāhārasampātādiko hārasampāto yena soḷasappabhedabhāvena suttappadesatthe niddhāretvā yujjito, soḷasappabhedabhāvo kena amhehi saddahitabbo’’ti vattabbattā ‘‘tenāhā’’tiādi vuttaṃ. Tena soḷasappabhedabhāvena āyasmā mahākaccāno ‘‘soḷasa…pe… sutta’’nti yaṃ vacanaṃ āha, tena vacanena soḷasappabhedabhāvo tumhehi saddahitabbo.
‘‘এত্তকোৰ হারসম্পাতো পরিপুণ্ণো’’তি ৰত্তব্বত্তা ‘‘নিযুত্তো হারসম্পাতো’’তি ৰুত্তং। যেন যেন সংৰণ্ণনাৰিসেসভূতেন দেসনাহারসম্পাতেন সুত্তপ্পদেসত্থা নিদ্ধারিতা, সো সো সংৰণ্ণনাৰিসেসভূতো দেসনাহারসম্পাতাদিহারসম্পাতো নিযুত্তো যথারহং নিদ্ধারেত্ৰা যুজ্জিতব্বোতি অত্থো গহেতব্বো, অট্ঠকথাযঞ্চ (নেত্তি॰ অট্ঠ॰ ৭৩, ৭৬) তথা নিদ্ধারেত্ৰা যুজ্জিতোতি।
‘‘Ettakova hārasampāto paripuṇṇo’’ti vattabbattā ‘‘niyutto hārasampāto’’ti vuttaṃ. Yena yena saṃvaṇṇanāvisesabhūtena desanāhārasampātena suttappadesatthā niddhāritā, so so saṃvaṇṇanāvisesabhūto desanāhārasampātādihārasampāto niyutto yathārahaṃ niddhāretvā yujjitabboti attho gahetabbo, aṭṭhakathāyañca (netti. aṭṭha. 73, 76) tathā niddhāretvā yujjitoti.
ইতি দেসনাহারসম্পাতাদিহারসম্পাতে সত্তিবলানুরূপা
Iti desanāhārasampātādihārasampāte sattibalānurūpā
রচিতা ৰিভাৰনা নিট্ঠিতা।
Racitā vibhāvanā niṭṭhitā.
পণ্ডিতেহি পন অট্ঠকথাটীকানুসারেন গম্ভীরত্থো ৰিত্থারতো ৰিভজিত্ৰা গহেতব্বোতি।
Paṇḍitehi pana aṭṭhakathāṭīkānusārena gambhīrattho vitthārato vibhajitvā gahetabboti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ১৬. সমারোপনহারসম্পাতো • 16. Samāropanahārasampāto
