| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៥. សមណសុត្តំ
5. Samaṇasuttaṃ
៨៥. ‘‘‘សមណោ’តិ , ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស។ ‘ព្រាហ្មណោ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស។ ‘វេទគូ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស។ ‘ភិសក្កោ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស។ ‘និម្មលោ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស។ ‘វិមលោ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស។ ‘ញាណី’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស។ ‘វិមុត្តោ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្សា’’តិ។
85. ‘‘‘Samaṇo’ti , bhikkhave, tathāgatassetaṃ adhivacanaṃ arahato sammāsambuddhassa. ‘Brāhmaṇo’ti, bhikkhave, tathāgatassetaṃ adhivacanaṃ arahato sammāsambuddhassa. ‘Vedagū’ti, bhikkhave, tathāgatassetaṃ adhivacanaṃ arahato sammāsambuddhassa. ‘Bhisakko’ti, bhikkhave, tathāgatassetaṃ adhivacanaṃ arahato sammāsambuddhassa. ‘Nimmalo’ti, bhikkhave, tathāgatassetaṃ adhivacanaṃ arahato sammāsambuddhassa. ‘Vimalo’ti, bhikkhave, tathāgatassetaṃ adhivacanaṃ arahato sammāsambuddhassa. ‘Ñāṇī’ti, bhikkhave, tathāgatassetaṃ adhivacanaṃ arahato sammāsambuddhassa. ‘Vimutto’ti, bhikkhave, tathāgatassetaṃ adhivacanaṃ arahato sammāsambuddhassā’’ti.
‘‘យំ សមណេន បត្តព្ពំ, ព្រាហ្មណេន វុសីមតា;
‘‘Yaṃ samaṇena pattabbaṃ, brāhmaṇena vusīmatā;
យំ វេទគុនា បត្តព្ពំ, ភិសក្កេន អនុត្តរំ។
Yaṃ vedagunā pattabbaṃ, bhisakkena anuttaraṃ.
‘‘យំ និម្មលេន បត្តព្ពំ, វិមលេន សុចីមតា;
‘‘Yaṃ nimmalena pattabbaṃ, vimalena sucīmatā;
យំ ញាណិនា ច បត្តព្ពំ, វិមុត្តេន អនុត្តរំ។
Yaṃ ñāṇinā ca pattabbaṃ, vimuttena anuttaraṃ.
‘‘សោហំ វិជិតសង្គាមោ, មុត្តោ មោចេមិ ពន្ធនា;
‘‘Sohaṃ vijitasaṅgāmo, mutto mocemi bandhanā;
នាគោម្ហិ បរមទន្តោ, អសេខោ បរិនិព្ពុតោ’’តិ។ បញ្ចមំ;
Nāgomhi paramadanto, asekho parinibbuto’’ti. pañcamaṃ;
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៥. សមណសុត្តវណ្ណនា • 5. Samaṇasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១-១០. សទ្ធាសុត្តាទិវណ្ណនា • 1-10. Saddhāsuttādivaṇṇanā
