১. সমণসঞ্ঞাসুত্তং

1. Samaṇasaññāsuttaṃ

১০১. ‘‘তিস্সো ইমা, ভিক্খৰে, সমণসঞ্ঞা ভাৰিতা বহুলীকতা সত্ত ধম্মে পরিপূরেন্তি। কতমা তিস্সো? ৰেৰণ্ণিযম্হি অজ্ঝুপগতো, পরপটিবদ্ধা মে জীৰিকা, অঞ্ঞো মে আকপ্পো করণীযোতি – ইমা খো, ভিক্খৰে, তিস্সো সমণসঞ্ঞা ভাৰিতা বহুলীকতা সত্ত ধম্মে পরিপূরেন্তি।

101. ‘‘Tisso imā, bhikkhave, samaṇasaññā bhāvitā bahulīkatā satta dhamme paripūrenti. Katamā tisso? Vevaṇṇiyamhi ajjhupagato, parapaṭibaddhā me jīvikā, añño me ākappo karaṇīyoti – imā kho, bhikkhave, tisso samaṇasaññā bhāvitā bahulīkatā satta dhamme paripūrenti.

‘‘কতমে সত্ত? সন্ততকারী ¹ হোতি সন্ততৰুত্তি ² সীলেসু, অনভিজ্ঝালু হোতি, অব্যাপজ্জো হোতি, অনতিমানী হোতি, সিক্খাকামো হোতি , ইদমত্থংতিস্স হোতি জীৰিতপরিক্খারেসু, আরদ্ধৰীরিযো চ ³ ৰিহরতি। ইমা খো, ভিক্খৰে, তিস্সো সমণসঞ্ঞা ভাৰিতা বহুলীকতা ইমে সত্ত ধম্মে পরিপূরেন্তী’’তি। পঠমং।

‘‘Katame satta? Santatakārī ⁴ hoti santatavutti ⁵ sīlesu, anabhijjhālu hoti, abyāpajjo hoti, anatimānī hoti, sikkhākāmo hoti , idamatthaṃtissa hoti jīvitaparikkhāresu, āraddhavīriyo ca ⁶ viharati. Imā kho, bhikkhave, tisso samaṇasaññā bhāvitā bahulīkatā ime satta dhamme paripūrentī’’ti. Paṭhamaṃ.

Next: ২. বোজ্ঝঙ্গসুত্তং • 2. Bojjhaṅgasuttaṃ

Footnotes:

1. সততকারী (স্যা॰ পী॰ ক॰)

2. সততৰুত্তি (স্যা॰ পী॰)

3. আরদ্ধৰিরিযো চ (সী॰ পী॰), আরদ্ধৰিরিযো (স্যা॰)

4. satatakārī (syā. pī. ka.)

5. satatavutti (syā. pī.)

6. āraddhaviriyo ca (sī. pī.), āraddhaviriyo (syā.)

Related texts:

অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১. সমণসঞ্ঞাসুত্তৰণ্ণনা • 1. Samaṇasaññāsuttavaṇṇanā

টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-১২. সমণসঞ্ঞাসুত্তাদিৰণ্ণনা • 1-12. Samaṇasaññāsuttādivaṇṇanā

© 1991-2026 Titi Tudorancea Yoga Bulletin | Titi Tudorancea^® is a Registered Trademark | Terms of use and privacy policy
Contact