| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
२६. समानासनिकनिद्देसवण्णना
26. Samānāsanikaniddesavaṇṇanā
१९५. तिण्णं वस्सानं अन्तरं तिवस्सन्तरं। ‘‘अनुजानामि, भिक्खवे, तिवस्सन्तरेन सह निसीदितु’’न्ति (चूळव॰ ३२०) हि वुत्तं। यो द्वीहि वस्सेहि (चूळव॰ अट्ठ॰ ३२०) वुड्ढो वा नवो वा, सो तिवस्सन्तरो नाम।
195. Tiṇṇaṃ vassānaṃ antaraṃ tivassantaraṃ. ‘‘Anujānāmi, bhikkhave, tivassantarena saha nisīditu’’nti (cūḷava. 320) hi vuttaṃ. Yo dvīhi vassehi (cūḷava. aṭṭha. 320) vuḍḍho vā navo vā, so tivassantaro nāma.
१९६. मुनीति बुद्धमुनि। सब्बेहेवाति अनुपसम्पन्नेहिपि।
196.Munīti buddhamuni. Sabbehevāti anupasampannehipi.
१९७. अन्तन्ति पच्छिमं। ‘‘अनुजानामि, भिक्खवे, यं तिण्णं पहोति, एत्तकं पच्छिमं दीघासन’’न्ति (चूळव॰ ३२०) वुत्तत्ता यं तिण्णं पहोति, एतं संहारिमं वा होतु असंहारिमं वा, तथारूपेसु फलकखण्डेसुपि निसीदितुं वट्टति। द्विन्नन्ति द्विन्नं समानासनिकानं। ‘‘अनुजानामि, भिक्खवे, दुवग्गस्स मञ्चं दुवग्गस्स पीठ’’न्ति (चुळव॰ ३२०) वुत्तत्ता द्वे समानासनिका सह निसीदितुं लभन्ति। अञ्ञेहि असमानासनिकेहि, अनुपसम्पन्नादीहि वा द्वे हुत्वापि निसीदितुं न लभन्ति। समानासनिकविनिच्छयो।
197.Antanti pacchimaṃ. ‘‘Anujānāmi, bhikkhave, yaṃ tiṇṇaṃ pahoti, ettakaṃ pacchimaṃ dīghāsana’’nti (cūḷava. 320) vuttattā yaṃ tiṇṇaṃ pahoti, etaṃ saṃhārimaṃ vā hotu asaṃhārimaṃ vā, tathārūpesu phalakakhaṇḍesupi nisīdituṃ vaṭṭati. Dvinnanti dvinnaṃ samānāsanikānaṃ. ‘‘Anujānāmi, bhikkhave, duvaggassa mañcaṃ duvaggassa pīṭha’’nti (cuḷava. 320) vuttattā dve samānāsanikā saha nisīdituṃ labhanti. Aññehi asamānāsanikehi, anupasampannādīhi vā dve hutvāpi nisīdituṃ na labhanti. Samānāsanikavinicchayo.
समानासनिकनिद्देसवण्णना निट्ठिता।
Samānāsanikaniddesavaṇṇanā niṭṭhitā.
