| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
13. ஸமணகப்பனித்³தே³ஸவண்ணனா
13. Samaṇakappaniddesavaṇṇanā
125. பூ⁴தானங் ஜாதானங் நிப்³ப³த்தானங் கா³மோ பூ⁴தகா³மோ (பாசி॰ 91; பாசி॰ அட்ட²॰ 91; கங்கா²॰ அட்ட²॰ பூ⁴தகா³மஸிக்கா²பத³வண்ணனா). ஸமாரம்போ⁴தி சே²த³னபா²லனபசனாதி³, தஸ்மிங் பூ⁴தகா³மஸமாரம்பே⁴ பூ⁴தகா³மஸமாரம்ப⁴ஹேது பாசித்தி ஹோதீதி அத்தோ². கதகப்பியங் (கங்கா²॰ அட்ட²॰ பூ⁴தகா³மஸிக்கா²பத³வண்ணனா) பன ஸமணகப்பியங் ப⁴வேதி ஸம்ப³ந்தோ⁴. ஸமணானங் கப்பியங் ஸமணகப்பியங் . இதா³னி யேன கதங் கப்பியங் ஸமணகப்பியங் ஹோதி, தங் த³ஸ்ஸேதுங் ‘‘நகே²ன வா’’திஆதி³மாஹ. ‘‘அனுஜானாமி, பி⁴க்க²வே, பஞ்சஹி ஸமணகப்பேஹி ப²லங் பரிபு⁴ஞ்ஜிதுங், அக்³கி³பரிஜிதங் ஸத்த²பரிஜிதங் நக²பரிஜிதங் அபீ³ஜங் நிப்³ப³ட்டபீ³ஜஞ்ஞேவ பஞ்சம’’ந்தி (சூளவ॰ 250) ஹி வுத்தங்.
125. Bhūtānaṃ jātānaṃ nibbattānaṃ gāmo bhūtagāmo (pāci. 91; pāci. aṭṭha. 91; kaṅkhā. aṭṭha. bhūtagāmasikkhāpadavaṇṇanā). Samārambhoti chedanaphālanapacanādi, tasmiṃ bhūtagāmasamārambhe bhūtagāmasamārambhahetu pācitti hotīti attho. Katakappiyaṃ (kaṅkhā. aṭṭha. bhūtagāmasikkhāpadavaṇṇanā) pana samaṇakappiyaṃ bhaveti sambandho. Samaṇānaṃ kappiyaṃ samaṇakappiyaṃ. Idāni yena kataṃ kappiyaṃ samaṇakappiyaṃ hoti, taṃ dassetuṃ ‘‘nakhena vā’’tiādimāha. ‘‘Anujānāmi, bhikkhave, pañcahi samaṇakappehi phalaṃ paribhuñjituṃ, aggiparijitaṃ satthaparijitaṃ nakhaparijitaṃ abījaṃ nibbaṭṭabījaññeva pañcama’’nti (cūḷava. 250) hi vuttaṃ.
126. இதா³னி தங் பூ⁴தகா³மங் த³ஸ்ஸேதுங் ‘‘ஸமூலா’’திஆதி³மாஹ. தத்த² (பாசி॰ 91; பாசி॰ அட்ட²॰ 91) ஸ-இதி ஸோ பூ⁴தகா³மோ நாமாதி அத்தோ², மூலபீ³ஜாதீ³ஹி பஞ்சஹி பீ³ஜேஹி பபா⁴விதோ ஹோதீதி வுத்தங் ஹோதி. தத்த² மூலபீ³ஜங் நாம ஹலித்³தி³ஸிங்கி³வேராதி³. க²ந்த⁴பீ³ஜங் நாம அஸ்ஸத்தோ² நிக்³ரோதோ⁴தி ஏவமாதி³. அக்³க³பீ³ஜங் நாம அஜ்ஜுகப²ணிஜ்ஜகாதி³. ப²ளுபீ³ஜங் நாம உச்சு²வேளுனளாதி³. ‘‘பீ³ஜபீ³ஜங் நாம புப்³ப³ண்ணங் அபரண்ணங், யானி வா பனஞ்ஞானிபி அத்தி² பீ³ஜே ஜாயந்தி பீ³ஜே ஸஞ்ஜாயந்தி, ஏதங் பீ³ஜபீ³ஜங் நாமா’’தி வுத்தங். இதா³னி ‘‘பீ³ஜகா³மபூ⁴தகா³மஸமாரம்பா⁴ படிவிரதோ ஹோதீ’’தி (தீ³॰ நி॰ 1.10, 195; ம॰ நி॰ 1.293, 411; 2.11; அ॰ நி॰ 10.99; பு॰ ப॰ 179) வுத்தத்தா த⁴ம்மானுலோமேன ஆக³தங் பீ³ஜகா³மஸமாரம்ப⁴ங் த³ஸ்ஸேதுங் ‘‘ஆரம்பே⁴ து³க்கட’’ந்திஆதி³மாஹ. தஸ்மா ஏதங் பட²மங் ‘‘கப்பியங் கரோஹீ’’தி பூ⁴தகா³மபரிமோசனங் காரெத்வா பீ³ஜகா³மபரிமோசனத்த²ங் புன கப்பியங் காரேதப்³ப³ங்.
126. Idāni taṃ bhūtagāmaṃ dassetuṃ ‘‘samūlā’’tiādimāha. Tattha (pāci. 91; pāci. aṭṭha. 91) sa-iti so bhūtagāmo nāmāti attho, mūlabījādīhi pañcahi bījehi pabhāvito hotīti vuttaṃ hoti. Tattha mūlabījaṃ nāma haliddisiṅgiverādi. Khandhabījaṃ nāma assattho nigrodhoti evamādi. Aggabījaṃ nāma ajjukaphaṇijjakādi. Phaḷubījaṃ nāma ucchuveḷunaḷādi. ‘‘Bījabījaṃ nāma pubbaṇṇaṃ aparaṇṇaṃ, yāni vā panaññānipi atthi bīje jāyanti bīje sañjāyanti, etaṃ bījabījaṃ nāmā’’ti vuttaṃ. Idāni ‘‘bījagāmabhūtagāmasamārambhā paṭivirato hotī’’ti (dī. ni. 1.10, 195; ma. ni. 1.293, 411; 2.11; a. ni. 10.99; pu. pa. 179) vuttattā dhammānulomena āgataṃ bījagāmasamārambhaṃ dassetuṃ ‘‘ārambhe dukkaṭa’’ntiādimāha. Tasmā etaṃ paṭhamaṃ ‘‘kappiyaṃ karohī’’ti bhūtagāmaparimocanaṃ kāretvā bījagāmaparimocanatthaṃ puna kappiyaṃ kāretabbaṃ.
127. நிப்³ப³ட்டபீ³ஜங் (பாசி॰ அட்ட²॰ 92; கங்கா²॰ அட்ட²॰ பு⁴தகா³மஸிக்கா²பத³வண்ணனா) நாம அம்ப³பனஸாதி³. நோபீ³ஜங் நாம தருணம்ப³ப²லாதி³, ஏதங் பன ஸப்³ப³ங் அகப்பியம்பி வட்டதீதி அத்தோ². கடாஹப³த்³த⁴பீ³ஜானி கபித்த²ப²லாதீ³னி. ப³ஹித்³தா⁴ வாபி காரயேதி கபாலேபி காதுங் வட்டதி, ஸசே ஏகாப³த்³தா⁴னீதி அத்தோ². கடாஹமுத்தங் பன பி⁴ந்தி³த்வா காரேதப்³ப³ங்.
127.Nibbaṭṭabījaṃ (pāci. aṭṭha. 92; kaṅkhā. aṭṭha. bhutagāmasikkhāpadavaṇṇanā) nāma ambapanasādi. Nobījaṃ nāma taruṇambaphalādi, etaṃ pana sabbaṃ akappiyampi vaṭṭatīti attho. Kaṭāhabaddhabījāni kapitthaphalādīni. Bahiddhā vāpi kārayeti kapālepi kātuṃ vaṭṭati, sace ekābaddhānīti attho. Kaṭāhamuttaṃ pana bhinditvā kāretabbaṃ.
128. பா⁴ஜனே வா பூ⁴மியங் வா ஏகாப³த்³தே⁴ஸு பீ³ஜேஸு ஏகஸ்மிங் பீ³ஜே கப்பியே கதே ஸப்³பெ³ஸ்வேவ கதங் ப⁴வேதி அத்தோ². யதா² ச பீ³ஜே, ஏவங் ருக்க²ஸஹஸ்ஸங் வா உச்சு²ஸஹஸ்ஸங் வா சி²ந்தி³த்வா ஏகாப³த்³தே⁴ கதேபி வினிச்ச²யோ வேதி³தப்³போ³.
128. Bhājane vā bhūmiyaṃ vā ekābaddhesu bījesu ekasmiṃ bīje kappiye kate sabbesveva kataṃ bhaveti attho. Yathā ca bīje, evaṃ rukkhasahassaṃ vā ucchusahassaṃ vā chinditvā ekābaddhe katepi vinicchayo veditabbo.
129. கப்பியங் கத்வா நிக்கி²த்தே பீ³ஜகா³மே புன மூலபண்ணானி ஸசே ஜாயருங், புன கப்பியங் காரெய்யாதி அத்தோ². ததா³தி மூலே ச அங்குரே ச ஜாதேதி அத்தோ².
129. Kappiyaṃ katvā nikkhitte bījagāme puna mūlapaṇṇāni sace jāyaruṃ, puna kappiyaṃ kāreyyāti attho. Tadāti mūle ca aṅkure ca jāteti attho.
130. உத³கஸம்ப⁴வோதி உத³கஜாதோ. சேதியாதீ³ஸூதி எத்த² ஆதி³-ஸத்³தே³ன கே³ஹப்பமுக²பாகாரவேதி³காதீ³ஸு நிப்³ப³த்தா க³ஹிதா. நிப்³ப³த்தத்³வத்திபத்தகோ பூ⁴தகா³மோவ, அனிப்³ப³த்தகோ அக்³க³பீ³ஜே ஸங்க³ஹங் க³ச்ச²தி. பீ³ஜம்பி யாவ மூலங் வா பண்ணங் வா ந நிக்க²மதி, தாவ பீ³ஜகா³மோவ, மூலே ச நிக்க²ந்தே பண்ணே ச ஹரிதே ஜாதே பூ⁴தகா³மோவ ஹோதீதி அத்தோ².
130.Udakasambhavoti udakajāto. Cetiyādīsūti ettha ādi-saddena gehappamukhapākāravedikādīsu nibbattā gahitā. Nibbattadvattipattako bhūtagāmova, anibbattako aggabīje saṅgahaṃ gacchati. Bījampi yāva mūlaṃ vā paṇṇaṃ vā na nikkhamati, tāva bījagāmova, mūle ca nikkhante paṇṇe ca harite jāte bhūtagāmova hotīti attho.
131. மகுளந்தி அபு²ல்லங். அஹிச²த்தகங் நாம ருக்கே² ஜாதங் அஹிச²த்தகங்.
131.Makuḷanti aphullaṃ. Ahichattakaṃ nāma rukkhe jātaṃ ahichattakaṃ.
132. அல்லருக்கே² க³ண்ஹதோதி ஸம்ப³ந்தோ⁴. தத்தா²தி அல்லருக்கே² சி²ந்த³தோ வாபீதி ஸம்ப³ந்தோ⁴.
132. Allarukkhe gaṇhatoti sambandho. Tatthāti allarukkhe chindato vāpīti sambandho.
134. ‘‘இமங் ருக்க²ங், இமங் லதங், இமங் கந்த³ங் சி²ந்த³, பி⁴ந்தா³’’திஆதி³னா நயேன நியமெத்வா பா⁴ஸிதுங் ந வட்டதி. ‘‘இத³ங், ஏத’’ந்தி அவத்வா கேவலங் ‘‘ருக்க²ங் சி²ந்தா³’’திஆதி³னா (பாசி॰ அட்ட²॰ 92; கங்கா²॰ அட்ட²॰ பூ⁴தகா³மஹிக்கா²பத³வண்ணனா) நயேன வத்துங் வட்டதீதி. ஸமணகப்பவினிச்ச²யோ.
134. ‘‘Imaṃ rukkhaṃ, imaṃ lataṃ, imaṃ kandaṃ chinda, bhindā’’tiādinā nayena niyametvā bhāsituṃ na vaṭṭati. ‘‘Idaṃ, eta’’nti avatvā kevalaṃ ‘‘rukkhaṃ chindā’’tiādinā (pāci. aṭṭha. 92; kaṅkhā. aṭṭha. bhūtagāmahikkhāpadavaṇṇanā) nayena vattuṃ vaṭṭatīti. Samaṇakappavinicchayo.
ஸமணகப்பனித்³தே³ஸவண்ணனா நிட்டி²தா.
Samaṇakappaniddesavaṇṇanā niṭṭhitā.
