| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၃. ဈာနသံယုတ္တံ
13. Jhānasaṃyuttaṃ
၁. သမာဓိမူလကသမာပတ္တိသုတ္တဝဏ္ဏနာ
1. Samādhimūlakasamāpattisuttavaṇṇanā
၆၆၂. သမာဓိကုသလောတိ သမာဓိသ္မိံ ကုသလော။ တယိဒံ သမာဓိကောသလ္လတ္တံ သဟ ဈာနင္ဂယောဂေန စတုဗ္ဗိဓော ဈာနသမာဓိ, တသ္မာ တံ တံ ဝိဘာဂံ ဇာနန္တသ္သ သိဒ္ဓံ ဟောတီတိ အာဟ – ‘‘ပဌမံ ဈာန’’န္တိအာဒိ။ တတ္ထ ဝိတက္ကဝိစာရပီတိသုခေကဂ္ဂတာဝသေန ပဌမံ ပဉ္စင္ဂိကံ, ပီတိသုခေကဂ္ဂတာဝသေန ဒုတိယံ တိဝင္ဂိကံ, သုခေကဂ္ဂတာဝသေန တတိယံ ဒုဝင္ဂိကံ, ဥပေက္ခေကဂ္ဂတာဝသေန စတုတ္ထံ ဒုဝင္ဂိကမေဝာတိ ဧဝံ တသ္မိံ တသ္မိံ ဈာနေ တံတံအင္ဂာနံ ဝဝတ္ထာနေ ကုသလော။ သမာပတ္တိကုသလောတိ သမာပဇ္ဇနေ ကုသလော။ ဟာသေတ္ဝာတိ တောသေတ္ဝာ။ ကလ္လံ ကတ္ဝာတိ သမာဓာနသ္သ ပဋိပက္ခဓမ္မာနံ ဒူရီကရဏေန သဟကာရီကာရဏဉ္စ သမာဓာနေန သမာပဇ္ဇနေ စိတ္တံ သမတ္ထံ ကတ္ဝာ။ သေသပဒာနီတိ သေသာ တယော ကောဋ္ဌာသာ။ တတိယာဒီသု နယေသု အကုသလောပိ ဈာနတ္ထာယ ပဋိပန္နတ္တာ ‘‘ဈာယီတေဝာ’’တိ ဝုတ္တော။
662.Samādhikusaloti samādhismiṃ kusalo. Tayidaṃ samādhikosallattaṃ saha jhānaṅgayogena catubbidho jhānasamādhi, tasmā taṃ taṃ vibhāgaṃ jānantassa siddhaṃ hotīti āha – ‘‘paṭhamaṃ jhāna’’ntiādi. Tattha vitakkavicārapītisukhekaggatāvasena paṭhamaṃ pañcaṅgikaṃ, pītisukhekaggatāvasena dutiyaṃ tivaṅgikaṃ, sukhekaggatāvasena tatiyaṃ duvaṅgikaṃ, upekkhekaggatāvasena catutthaṃ duvaṅgikamevāti evaṃ tasmiṃ tasmiṃ jhāne taṃtaṃaṅgānaṃ vavatthāne kusalo. Samāpattikusaloti samāpajjane kusalo. Hāsetvāti tosetvā. Kallaṃ katvāti samādhānassa paṭipakkhadhammānaṃ dūrīkaraṇena sahakārīkāraṇañca samādhānena samāpajjane cittaṃ samatthaṃ katvā. Sesapadānīti sesā tayo koṭṭhāsā. Tatiyādīsu nayesu akusalopi jhānatthāya paṭipannattā ‘‘jhāyītevā’’ti vutto.
သမာဓိမူလကသမာပတ္တိသုတ္တဝဏ္ဏနာ နိဋ္ဌိတာ။
Samādhimūlakasamāpattisuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. သမာဓိမူလကသမာပတ္တိသုတ္တံ • 1. Samādhimūlakasamāpattisuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. သမာဓိမူလကသမာပတ္တိသုတ္တဝဏ္ဏနာ • 1. Samādhimūlakasamāpattisuttavaṇṇanā
