| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૧૩. ઝાનસંયુત્તં
13. Jhānasaṃyuttaṃ
૧. સમાધિમૂલકસમાપત્તિસુત્તં
1. Samādhimūlakasamāpattisuttaṃ
૬૬૨. સાવત્થિનિદાનં . ‘‘ચત્તારોમે, ભિક્ખવે, ઝાયી. કતમે ચત્તારો? ઇધ , ભિક્ખવે, એકચ્ચો ઝાયી સમાધિસ્મિં સમાધિકુસલો હોતિ, ન સમાધિસ્મિં સમાપત્તિકુસલો. ઇધ પન, ભિક્ખવે, એકચ્ચો ઝાયી સમાધિસ્મિં સમાપત્તિકુસલો હોતિ, ન સમાધિસ્મિં સમાધિકુસલો. ઇધ પન, ભિક્ખવે, એકચ્ચો ઝાયી નેવ સમાધિસ્મિં સમાધિકુસલો હોતિ, ન ચ સમાધિસ્મિં સમાપત્તિકુસલો. ઇધ પન, ભિક્ખવે, એકચ્ચો ઝાયી સમાધિસ્મિં સમાધિકુસલો ચ હોતિ, સમાધિસ્મિં સમાપત્તિકુસલો ચ. તત્ર, ભિક્ખવે, ય્વાયં ઝાયી સમાધિસ્મિં સમાધિકુસલો ચ હોતિ સમાધિસ્મિં સમાપત્તિકુસલો ચ અયં ઇમેસં ચતુન્નં ઝાયીનં અગ્ગો ચ સેટ્ઠો ચ મોક્ખો 1 ચ ઉત્તમો ચ પવરો ચ. સેય્યથાપિ, ભિક્ખવે, ગવા ખીરં, ખીરમ્હા દધિ, દધિમ્હા નવનીતં, નવનીતમ્હા સપ્પિ, સપ્પિમ્હા સપ્પિમણ્ડો તત્ર અગ્ગમક્ખાયતિ; એવમેવ ખો, ભિક્ખવે, ય્વાયં ઝાયી સમાધિસ્મિં સમાધિકુસલો ચ હોતિ સમાધિસ્મિં સમાપત્તિકુસલો ચ અયં ઇમેસં ચતુન્નં ઝાયીનં અગ્ગો ચ સેટ્ઠો ચ મોક્ખો ચ ઉત્તમો ચ પવરો ચા’’તિ. પઠમં.
662. Sāvatthinidānaṃ . ‘‘Cattārome, bhikkhave, jhāyī. Katame cattāro? Idha , bhikkhave, ekacco jhāyī samādhismiṃ samādhikusalo hoti, na samādhismiṃ samāpattikusalo. Idha pana, bhikkhave, ekacco jhāyī samādhismiṃ samāpattikusalo hoti, na samādhismiṃ samādhikusalo. Idha pana, bhikkhave, ekacco jhāyī neva samādhismiṃ samādhikusalo hoti, na ca samādhismiṃ samāpattikusalo. Idha pana, bhikkhave, ekacco jhāyī samādhismiṃ samādhikusalo ca hoti, samādhismiṃ samāpattikusalo ca. Tatra, bhikkhave, yvāyaṃ jhāyī samādhismiṃ samādhikusalo ca hoti samādhismiṃ samāpattikusalo ca ayaṃ imesaṃ catunnaṃ jhāyīnaṃ aggo ca seṭṭho ca mokkho 2 ca uttamo ca pavaro ca. Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo tatra aggamakkhāyati; evameva kho, bhikkhave, yvāyaṃ jhāyī samādhismiṃ samādhikusalo ca hoti samādhismiṃ samāpattikusalo ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā’’ti. Paṭhamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧. સમાધિમૂલકસમાપત્તિસુત્તવણ્ણના • 1. Samādhimūlakasamāpattisuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧. સમાધિમૂલકસમાપત્તિસુત્તવણ્ણના • 1. Samādhimūlakasamāpattisuttavaṇṇanā
