| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౧౩. ఝానసంయుత్తం
13. Jhānasaṃyuttaṃ
౧. సమాధిమూలకసమాపత్తిసుత్తం
1. Samādhimūlakasamāpattisuttaṃ
౬౬౨. సావత్థినిదానం . ‘‘చత్తారోమే, భిక్ఖవే, ఝాయీ. కతమే చత్తారో? ఇధ , భిక్ఖవే, ఏకచ్చో ఝాయీ సమాధిస్మిం సమాధికుసలో హోతి, న సమాధిస్మిం సమాపత్తికుసలో. ఇధ పన, భిక్ఖవే, ఏకచ్చో ఝాయీ సమాధిస్మిం సమాపత్తికుసలో హోతి, న సమాధిస్మిం సమాధికుసలో. ఇధ పన, భిక్ఖవే, ఏకచ్చో ఝాయీ నేవ సమాధిస్మిం సమాధికుసలో హోతి, న చ సమాధిస్మిం సమాపత్తికుసలో. ఇధ పన, భిక్ఖవే, ఏకచ్చో ఝాయీ సమాధిస్మిం సమాధికుసలో చ హోతి, సమాధిస్మిం సమాపత్తికుసలో చ. తత్ర, భిక్ఖవే, య్వాయం ఝాయీ సమాధిస్మిం సమాధికుసలో చ హోతి సమాధిస్మిం సమాపత్తికుసలో చ అయం ఇమేసం చతున్నం ఝాయీనం అగ్గో చ సేట్ఠో చ మోక్ఖో 1 చ ఉత్తమో చ పవరో చ. సేయ్యథాపి, భిక్ఖవే, గవా ఖీరం, ఖీరమ్హా దధి, దధిమ్హా నవనీతం, నవనీతమ్హా సప్పి, సప్పిమ్హా సప్పిమణ్డో తత్ర అగ్గమక్ఖాయతి; ఏవమేవ ఖో, భిక్ఖవే, య్వాయం ఝాయీ సమాధిస్మిం సమాధికుసలో చ హోతి సమాధిస్మిం సమాపత్తికుసలో చ అయం ఇమేసం చతున్నం ఝాయీనం అగ్గో చ సేట్ఠో చ మోక్ఖో చ ఉత్తమో చ పవరో చా’’తి. పఠమం.
662. Sāvatthinidānaṃ . ‘‘Cattārome, bhikkhave, jhāyī. Katame cattāro? Idha , bhikkhave, ekacco jhāyī samādhismiṃ samādhikusalo hoti, na samādhismiṃ samāpattikusalo. Idha pana, bhikkhave, ekacco jhāyī samādhismiṃ samāpattikusalo hoti, na samādhismiṃ samādhikusalo. Idha pana, bhikkhave, ekacco jhāyī neva samādhismiṃ samādhikusalo hoti, na ca samādhismiṃ samāpattikusalo. Idha pana, bhikkhave, ekacco jhāyī samādhismiṃ samādhikusalo ca hoti, samādhismiṃ samāpattikusalo ca. Tatra, bhikkhave, yvāyaṃ jhāyī samādhismiṃ samādhikusalo ca hoti samādhismiṃ samāpattikusalo ca ayaṃ imesaṃ catunnaṃ jhāyīnaṃ aggo ca seṭṭho ca mokkho 2 ca uttamo ca pavaro ca. Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo tatra aggamakkhāyati; evameva kho, bhikkhave, yvāyaṃ jhāyī samādhismiṃ samādhikusalo ca hoti samādhismiṃ samāpattikusalo ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā’’ti. Paṭhamaṃ.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౧. సమాధిమూలకసమాపత్తిసుత్తవణ్ణనా • 1. Samādhimūlakasamāpattisuttavaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౧. సమాధిమూలకసమాపత్తిసుత్తవణ్ణనా • 1. Samādhimūlakasamāpattisuttavaṇṇanā
