9. Samādapakattheraapadānaṃ

44.

‘‘Nagare bandhumatiyā, mahāpūgagaṇo ahu;

Tesāhaṃ pavaro āsiṃ, mama baddhacarā ² ca te.

45.

‘‘Sabbe te sannipātetvā, puññakamme samādayiṃ;

Māḷaṃ kassāma saṅghassa, puññakkhettaṃ anuttaraṃ.

46.

‘‘Sādhūti te paṭissutvā, mama chandavasānugā;

Niṭṭhāpetvā ca taṃ māḷaṃ, vipassissa adamhase.

47.

‘‘Ekanavutito kappe, yaṃ māḷamadadiṃ tadā;

Duggatiṃ nābhijānāmi, māḷadānassidaṃ phalaṃ.

48.

‘‘Ekūnasattatikappe ⁴,

Eko āsi janādhipo.

Ādeyyo nāma nāmena, cakkavattī mahabbalo.

49.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā samādapako thero imā gāthāyo abhāsitthāti.

Samādapakattherassāpadānaṃ navamaṃ.