| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៣៧. សល្លេខដ្ឋញាណនិទ្ទេសោ
37. Sallekhaṭṭhañāṇaniddeso
៨៨. កថំ បុថុនានត្តេកត្តតេជបរិយាទានេ បញ្ញា សល្លេខដ្ឋេ 1 ញាណំ? បុថូតិ – រាគោ បុថុ, ទោសោ បុថុ, មោហោ បុថុ, កោធោ…បេ.… ឧបនាហោ… មក្ខោ… បឡាសោ… ឥស្សា… មច្ឆរិយំ… មាយា… សាឋេយ្យំ… ថម្ភោ… សារម្ភោ… មានោ… អតិមានោ… មទោ… បមាទោ… សព្ពេ កិលេសា… សព្ពេ ទុច្ចរិតា… សព្ពេ អភិសង្ខារា… សព្ពេ ភវគាមិកម្មា។
88. Kathaṃ puthunānattekattatejapariyādāne paññā sallekhaṭṭhe 2 ñāṇaṃ? Puthūti – rāgo puthu, doso puthu, moho puthu, kodho…pe… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe abhisaṅkhārā… sabbe bhavagāmikammā.
នានត្តេកត្តន្តិ កាមច្ឆន្ទោ នានត្តំ, នេក្ខម្មំ ឯកត្តំ។ ព្យាបាទោ នានត្តំ, អព្យាបាទោ ឯកត្តំ។ ថិនមិទ្ធំ នានត្តំ, អាលោកសញ្ញា ឯកត្តំ។ ឧទ្ធច្ចំ នានត្តំ, អវិក្ខេបោ ឯកត្តំ។ វិចិកិច្ឆា នានត្តំ, ធម្មវវត្ថានំ ឯកត្តំ។ អវិជ្ជា នានត្តំ, ញាណំ ឯកត្តំ។ អរតិ នានត្តំ, បាមោជ្ជំ ឯកត្តំ។ នីវរណា នានត្តំ, បឋមំ ឈានំ ឯកត្តំ…បេ.… សព្ពេ កិលេសា នានត្តំ, អរហត្តមគ្គោ ឯកត្តំ។
Nānattekattanti kāmacchando nānattaṃ, nekkhammaṃ ekattaṃ. Byāpādo nānattaṃ, abyāpādo ekattaṃ. Thinamiddhaṃ nānattaṃ, ālokasaññā ekattaṃ. Uddhaccaṃ nānattaṃ, avikkhepo ekattaṃ. Vicikicchā nānattaṃ, dhammavavatthānaṃ ekattaṃ. Avijjā nānattaṃ, ñāṇaṃ ekattaṃ. Arati nānattaṃ, pāmojjaṃ ekattaṃ. Nīvaraṇā nānattaṃ, paṭhamaṃ jhānaṃ ekattaṃ…pe… sabbe kilesā nānattaṃ, arahattamaggo ekattaṃ.
តេជោតិ បញ្ច តេជា – ចរណតេជោ, គុណតេជោ, បញ្ញាតេជោ, បុញ្ញតេជោ, ធម្មតេជោ។ ចរណតេជេន តេជិតត្តា ទុស្សីល្យតេជំ បរិយាទិយតិ។ គុណតេជេន តេជិតត្តា អគុណតេជំ បរិយាទិយតិ។ បញ្ញាតេជេន តេជិតត្តា ទុប្បញ្ញតេជំ បរិយាទិយតិ។ បុញ្ញតេជេន តេជិតត្តា អបុញ្ញតេជំ បរិយាទិយតិ។ ធម្មតេជេន តេជិតត្តា អធម្មតេជំ បរិយាទិយតិ។
Tejoti pañca tejā – caraṇatejo, guṇatejo, paññātejo, puññatejo, dhammatejo. Caraṇatejena tejitattā dussīlyatejaṃ pariyādiyati. Guṇatejena tejitattā aguṇatejaṃ pariyādiyati. Paññātejena tejitattā duppaññatejaṃ pariyādiyati. Puññatejena tejitattā apuññatejaṃ pariyādiyati. Dhammatejena tejitattā adhammatejaṃ pariyādiyati.
សល្លេខោតិ កាមច្ឆន្ទោ អសល្លេខោ, នេក្ខម្មំ សល្លេខោ ។ ព្យាបាទោ អសល្លេខោ, អព្យាបាទោ សល្លេខោ។ ថិនមិទ្ធំ អសល្លេខោ, អាលោកសញ្ញា សល្លេខោ។ ឧទ្ធច្ចំ អសល្លេខោ, អវិក្ខេបោ សល្លេខោ។ វិចិកិច្ឆា អសល្លេខោ, ធម្មវវត្ថានំ សល្លេខោ។ អវិជ្ជា អសល្លេខោ, ញាណំ សល្លេខោ។ អរតិ អសល្លេខោ, បាមោជ្ជំ សល្លេខោ។ នីវរណា អសល្លេខោ, បឋមំ ឈានំ សល្លេខោ…បេ.… សព្ពកិលេសា អសល្លេខោ, អរហត្តមគ្គោ សល្លេខោ។ តំ ញាតដ្ឋេន ញាណំ, បជាននដ្ឋេន បញ្ញា។ តេន វុច្ចតិ – ‘‘បុថុនានត្តតេជបរិយាទានេ បញ្ញា សល្លេខដ្ឋេ ញាណំ’’។
Sallekhoti kāmacchando asallekho, nekkhammaṃ sallekho . Byāpādo asallekho, abyāpādo sallekho. Thinamiddhaṃ asallekho, ālokasaññā sallekho. Uddhaccaṃ asallekho, avikkhepo sallekho. Vicikicchā asallekho, dhammavavatthānaṃ sallekho. Avijjā asallekho, ñāṇaṃ sallekho. Arati asallekho, pāmojjaṃ sallekho. Nīvaraṇā asallekho, paṭhamaṃ jhānaṃ sallekho…pe… sabbakilesā asallekho, arahattamaggo sallekho. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘puthunānattatejapariyādāne paññā sallekhaṭṭhe ñāṇaṃ’’.
សល្លេខដ្ឋញាណនិទ្ទេសោ សត្តតិំសតិមោ។
Sallekhaṭṭhañāṇaniddeso sattatiṃsatimo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / ៣៧. សល្លេខដ្ឋញាណនិទ្ទេសវណ្ណនា • 37. Sallekhaṭṭhañāṇaniddesavaṇṇanā
