| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೪. ಸಾಲಕಲ್ಯಾಣಿಕಙ್ಗಪಞ್ಹೋ
4. Sālakalyāṇikaṅgapañho
೪. ‘‘ಭನ್ತೇ ನಾಗಸೇನ, ‘ಸಾಲಕಲ್ಯಾಣಿಕಾಯ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ಸಾಲಕಲ್ಯಾಣಿಕಾ ನಾಮ ಅನ್ತೋಪಥವಿಯಂ ಯೇವ ಅಭಿವಡ್ಢತಿ ಹತ್ಥಸತಮ್ಪಿ ಭಿಯ್ಯೋಪಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಚತ್ತಾರಿ ಸಾಮಞ್ಞಫಲಾನಿ ಚತಸ್ಸೋ ಪಟಿಸಮ್ಭಿದಾ ಛಳಭಿಞ್ಞಾಯೋ ಕೇವಲಞ್ಚ ಸಮಣಧಮ್ಮಂ ಸುಞ್ಞಾಗಾರೇ ಯೇವ ಪರಿಪೂರಯಿತಬ್ಬಂ। ಇದಂ, ಮಹಾರಾಜ, ಸಾಲಕಲ್ಯಾಣಿಕಾಯ ಏಕಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ರಾಹುಲೇನ –
4. ‘‘Bhante nāgasena, ‘sālakalyāṇikāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, sālakalyāṇikā nāma antopathaviyaṃ yeva abhivaḍḍhati hatthasatampi bhiyyopi, evameva kho, mahārāja, yoginā yogāvacarena cattāri sāmaññaphalāni catasso paṭisambhidā chaḷabhiññāyo kevalañca samaṇadhammaṃ suññāgāre yeva paripūrayitabbaṃ. Idaṃ, mahārāja, sālakalyāṇikāya ekaṃ aṅgaṃ gahetabbaṃ. Bhāsitampetaṃ, mahārāja, therena rāhulena –
‘‘‘ಸಾಲಕಲ್ಯಾಣಿಕಾ ನಾಮ, ಪಾದಪೋ ಧರಣೀರುಹೋ।
‘‘‘Sālakalyāṇikā nāma, pādapo dharaṇīruho;
ಅನ್ತೋಪಥವಿಯಂ ಯೇವ, ಸತಹತ್ಥೋಪಿ ವಡ್ಢತಿ॥
Antopathaviyaṃ yeva, satahatthopi vaḍḍhati.
‘‘‘ಯಥಾ ಕಾಲಮ್ಹಿ ಸಮ್ಪತ್ತೇ, ಪರಿಪಾಕೇನ ಸೋ ದುಮೋ।
‘‘‘Yathā kālamhi sampatte, paripākena so dumo;
ಉಗ್ಗಞ್ಛಿತ್ವಾನ ಏಕಾಹಂ, ಸತಹತ್ಥೋಪಿ ವಡ್ಢತಿ॥
Uggañchitvāna ekāhaṃ, satahatthopi vaḍḍhati.
‘‘‘ಏವಮೇವಾಹಂ ಮಹಾವೀರ, ಸಾಲಕಲ್ಯಾಣಿಕಾ ವಿಯ।
‘‘‘Evamevāhaṃ mahāvīra, sālakalyāṇikā viya;
ಅಬ್ಭನ್ತರೇ ಸುಞ್ಞಾಗಾರೇ, ಧಮ್ಮತೋ ಅಭಿವಡ್ಢಯಿ’’’ನ್ತಿ॥
Abbhantare suññāgāre, dhammato abhivaḍḍhayi’’’nti.
ಸಾಲಕಲ್ಯಾಣಿಕಙ್ಗಪಞ್ಹೋ ಚತುತ್ಥೋ।
Sālakalyāṇikaṅgapañho catuttho.
