| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៤. សាលកល្យាណិកង្គបញ្ហោ
4. Sālakalyāṇikaṅgapañho
៤. ‘‘ភន្តេ នាគសេន, ‘សាលកល្យាណិកាយ ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, សាលកល្យាណិកា នាម អន្តោបថវិយំ យេវ អភិវឌ្ឍតិ ហត្ថសតម្បិ ភិយ្យោបិ, ឯវមេវ ខោ, មហារាជ, យោគិនា យោគាវចរេន ចត្តារិ សាមញ្ញផលានិ ចតស្សោ បដិសម្ភិទា ឆឡភិញ្ញាយោ កេវលញ្ច សមណធម្មំ សុញ្ញាគារេ យេវ បរិបូរយិតព្ពំ។ ឥទំ, មហារាជ, សាលកល្យាណិកាយ ឯកំ អង្គំ គហេតព្ពំ។ ភាសិតម្បេតំ, មហារាជ, ថេរេន រាហុលេន –
4. ‘‘Bhante nāgasena, ‘sālakalyāṇikāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, sālakalyāṇikā nāma antopathaviyaṃ yeva abhivaḍḍhati hatthasatampi bhiyyopi, evameva kho, mahārāja, yoginā yogāvacarena cattāri sāmaññaphalāni catasso paṭisambhidā chaḷabhiññāyo kevalañca samaṇadhammaṃ suññāgāre yeva paripūrayitabbaṃ. Idaṃ, mahārāja, sālakalyāṇikāya ekaṃ aṅgaṃ gahetabbaṃ. Bhāsitampetaṃ, mahārāja, therena rāhulena –
‘‘‘សាលកល្យាណិកា នាម, បាទបោ ធរណីរុហោ;
‘‘‘Sālakalyāṇikā nāma, pādapo dharaṇīruho;
អន្តោបថវិយំ យេវ, សតហត្ថោបិ វឌ្ឍតិ។
Antopathaviyaṃ yeva, satahatthopi vaḍḍhati.
‘‘‘យថា កាលម្ហិ សម្បត្តេ, បរិបាកេន សោ ទុមោ;
‘‘‘Yathā kālamhi sampatte, paripākena so dumo;
ឧគ្គញ្ឆិត្វាន ឯកាហំ, សតហត្ថោបិ វឌ្ឍតិ។
Uggañchitvāna ekāhaṃ, satahatthopi vaḍḍhati.
‘‘‘ឯវមេវាហំ មហាវីរ, សាលកល្យាណិកា វិយ;
‘‘‘Evamevāhaṃ mahāvīra, sālakalyāṇikā viya;
អព្ភន្តរេ សុញ្ញាគារេ, ធម្មតោ អភិវឌ្ឍយិ’’’ន្តិ។
Abbhantare suññāgāre, dhammato abhivaḍḍhayi’’’nti.
សាលកល្យាណិកង្គបញ្ហោ ចតុត្ថោ។
Sālakalyāṇikaṅgapañho catuttho.
