| Library / Tipiṭaka / তিপিটক • Tipiṭaka / জাতক-অট্ঠকথা • Jātaka-aṭṭhakathā |
[৩০৮] ৮. সকুণজাতকৰণ্ণনা
[308] 8. Sakuṇajātakavaṇṇanā
অকরম্হস তে কিচ্চন্তি ইদং সত্থা জেতৰনে ৰিহরন্তো দেৰদত্তস্স অকতঞ্ঞুতং আরব্ভ কথেসি। ‘‘ন, ভিক্খৰে, ইদানেৰ, পুব্বেপি দেৰদত্তো অকতঞ্ঞূযেৰা’’তি ৰত্ৰা অতীতং আহরি।
Akaramhasa te kiccanti idaṃ satthā jetavane viharanto devadattassa akataññutaṃ ārabbha kathesi. ‘‘Na, bhikkhave, idāneva, pubbepi devadatto akataññūyevā’’ti vatvā atītaṃ āhari.
অতীতে বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তপদেসে রুক্খকোট্টকসকুণো হুত্ৰা নিব্বত্তি। অথেকস্স সীহস্স মংসং খাদন্তস্স অট্ঠি গলে লগ্গি, গলো উদ্ধুমাযি, গোচরং গণ্হিতুং ন সক্কোতি, খরা ৰেদনা পৰত্ততি। অথ নং সো সকুণো গোচরপ্পসুতো দিস্ৰা সাখায নিলীনো ‘‘কিং তে, সম্ম, দুক্খ’’ন্তি পুচ্ছি। সো তমত্থং আচিক্খি। ‘‘অহং তে, সম্ম, এতং অট্ঠিং অপনেয্যং, ভযেন পন তে মুখং পৰিসিতুং ন ৰিসহামি, খাদেয্যাসিপি ম’’ন্তি। ‘‘মা ভাযি, সম্ম, নাহং তং খাদামি, জীৰিতং মে দেহী’’তি। সো ‘‘সাধূ’’তি তং ৰামপস্সেন নিপজ্জাপেত্ৰা ‘‘কো জানাতি, কিম্পেস করিস্সতী’’তি চিন্তেত্ৰা যথা মুখং পিদহিতুং ন সক্কোতি, তথা তস্স অধরোট্ঠে চ উত্তরোট্ঠে চ দণ্ডকং ঠপেত্ৰা মুখং পৰিসিত্ৰা অট্ঠিকোটিং তুণ্ডেন পহরি, অট্ঠি পতিত্ৰা গতং। সো অট্ঠিং পাতেত্ৰা সীহস্স মুখতো নিক্খমন্তো দণ্ডকং তুণ্ডেন পহরিত্ৰা পাতেন্তোৰ নিক্খমিত্ৰা সাখগ্গে নিলীযি। সীহো নিরোগো হুত্ৰা একদিৰসং একং ৰনমহিংসং ৰধিত্ৰা খাদতি। সকুণো ‘‘ৰীমংসিস্সামি ন’’ন্তি তস্স উপরিভাগে সাখায নিলীযিত্ৰা তেন সদ্ধিং সল্লপন্তো পঠমং গাথমাহ –
Atīte bārāṇasiyaṃ brahmadatte rajjaṃ kārente bodhisatto himavantapadese rukkhakoṭṭakasakuṇo hutvā nibbatti. Athekassa sīhassa maṃsaṃ khādantassa aṭṭhi gale laggi, galo uddhumāyi, gocaraṃ gaṇhituṃ na sakkoti, kharā vedanā pavattati. Atha naṃ so sakuṇo gocarappasuto disvā sākhāya nilīno ‘‘kiṃ te, samma, dukkha’’nti pucchi. So tamatthaṃ ācikkhi. ‘‘Ahaṃ te, samma, etaṃ aṭṭhiṃ apaneyyaṃ, bhayena pana te mukhaṃ pavisituṃ na visahāmi, khādeyyāsipi ma’’nti. ‘‘Mā bhāyi, samma, nāhaṃ taṃ khādāmi, jīvitaṃ me dehī’’ti. So ‘‘sādhū’’ti taṃ vāmapassena nipajjāpetvā ‘‘ko jānāti, kimpesa karissatī’’ti cintetvā yathā mukhaṃ pidahituṃ na sakkoti, tathā tassa adharoṭṭhe ca uttaroṭṭhe ca daṇḍakaṃ ṭhapetvā mukhaṃ pavisitvā aṭṭhikoṭiṃ tuṇḍena pahari, aṭṭhi patitvā gataṃ. So aṭṭhiṃ pātetvā sīhassa mukhato nikkhamanto daṇḍakaṃ tuṇḍena paharitvā pātentova nikkhamitvā sākhagge nilīyi. Sīho nirogo hutvā ekadivasaṃ ekaṃ vanamahiṃsaṃ vadhitvā khādati. Sakuṇo ‘‘vīmaṃsissāmi na’’nti tassa uparibhāge sākhāya nilīyitvā tena saddhiṃ sallapanto paṭhamaṃ gāthamāha –
২৯.
29.
‘‘অকরম্হস তে কিচ্চং, যং বলং অহুৰম্হসে।
‘‘Akaramhasa te kiccaṃ, yaṃ balaṃ ahuvamhase;
মিগরাজ নমো ত্যত্থু, অপি কিঞ্চি লভামসে’’তি॥
Migarāja namo tyatthu, api kiñci labhāmase’’ti.
তত্থ অকরম্হস তে কিচ্চন্তি ভো, সীহ, মযম্পি তৰ একং কিচ্চং অকরিম্হ। যং বলং অহুৰম্হসেতি যং অম্হাকং বলং অহোসি, তেন বলেন ততো কিঞ্চি অহাপেত্ৰা অকরিম্হযেৰ।
Tattha akaramhasa te kiccanti bho, sīha, mayampi tava ekaṃ kiccaṃ akarimha. Yaṃ balaṃ ahuvamhaseti yaṃ amhākaṃ balaṃ ahosi, tena balena tato kiñci ahāpetvā akarimhayeva.
তং সুত্ৰা সীহো দুতিযং গাথমাহ –
Taṃ sutvā sīho dutiyaṃ gāthamāha –
৩০.
30.
‘‘মম লোহিতভক্খস্স, নিচ্চং লুদ্দানি কুব্বতো।
‘‘Mama lohitabhakkhassa, niccaṃ luddāni kubbato;
দন্তন্তরগতো সন্তো, তং বহুং যম্পি জীৰসী’’তি॥
Dantantaragato santo, taṃ bahuṃ yampi jīvasī’’ti.
তং সুত্ৰা সকুণো ইতরা দ্ৰে গাথা অভাসি –
Taṃ sutvā sakuṇo itarā dve gāthā abhāsi –
৩১.
31.
‘‘অকতঞ্ঞুমকত্তারং, কতস্স অপ্পটিকারকং।
‘‘Akataññumakattāraṃ, katassa appaṭikārakaṃ;
যস্মিং কতঞ্ঞুতা নত্থি, নিরত্থা তস্স সেৰনা॥
Yasmiṃ kataññutā natthi, niratthā tassa sevanā.
৩২.
32.
‘‘যস্স সম্মুখচিণ্ণেন, মিত্তধম্মো ন লব্ভতি।
‘‘Yassa sammukhaciṇṇena, mittadhammo na labbhati;
অনুসূযমনক্কোসং, সণিকং তম্হা অপক্কমে’’ন্তি॥
Anusūyamanakkosaṃ, saṇikaṃ tamhā apakkame’’nti.
তত্থ অকতঞ্ঞুন্তি কতগুণং অজানন্তং। অকত্তারন্তি যংকিঞ্চি অকরোন্তং। সম্মুখচিণ্ণেনাতি সম্মুখে কতেন গুণেন। অনুসূযমনক্কোসন্তি তং পুগ্গলং ন উসূযন্তো ন অক্কোসন্তো সণিকং তম্হা পাপপুগ্গলা অপগচ্ছেয্যাতি। এৰং ৰত্ৰা সো সকুণো পক্কামি।
Tattha akataññunti kataguṇaṃ ajānantaṃ. Akattāranti yaṃkiñci akarontaṃ. Sammukhaciṇṇenāti sammukhe katena guṇena. Anusūyamanakkosanti taṃ puggalaṃ na usūyanto na akkosanto saṇikaṃ tamhā pāpapuggalā apagaccheyyāti. Evaṃ vatvā so sakuṇo pakkāmi.
সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা সীহো দেৰদত্তো অহোসি, সকুণো পন অহমেৰ অহোসি’’ন্তি।
Satthā imaṃ dhammadesanaṃ āharitvā jātakaṃ samodhānesi – ‘‘tadā sīho devadatto ahosi, sakuṇo pana ahameva ahosi’’nti.
সকুণজাতকৰণ্ণনা অট্ঠমা।
Sakuṇajātakavaṇṇanā aṭṭhamā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / জাতকপাল়ি • Jātakapāḷi / ৩০৮. সকুণজাতকং • 308. Sakuṇajātakaṃ
