| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂. သက္ကနာမသုတ္တဝဏ္ဏနာ
2. Sakkanāmasuttavaṇṇanā
၂၃၆. သက္ကနာမကောတိ ဗလိပုတ္တော ဝိယ သက္ကသ္သ ဝသေန ဂဟိတနာမော။ ‘‘ဧသော ကိရာ’’တိ ပာဌော။ ‘‘ဧကော ကိရာ’’တိပိ လိခန္တိ။ မာရသ္သ ပက္ခေ ဂတော မာရပက္ခိကော။ ယဒညန္တိ ဧတ္ထ ယန္တိ ကိရိယာပရာမသနံ, တသ္မာ ယံ အညသ္သ အနုသာသနံ, တံ သမဏသ္သ န သာဓူတိ ယောဇနာ။ ကာရဏေနာတိ ကာရဏမတ္တေန သံဝာသော ဇာယတိ။ ယေန ကေနစိ ဂဟဋ္ဌေန ဝာ ပဗ္ဗဇိတေန ဝာ။ တံ ကာရဏန္တရံ သမာဂတံ ပုရိသံ သပ္ပညော သမ္ဗုဒ္ဓော အနုကမ္ပိတုံ နာရဟတိ ဝိသေသာဓိဂမာဘာဝာ, သတိ ပန တသ္မိံ သဝိသေသံ ပသာဒော ဟောတီတိ။ မနသာ စေ။ပေ.။ န တေန ဟောတိ သံယုတ္တော သိနေဟဝသေန အနုကမ္ပာ အနုဒ္ဒယာ တသ္သာ အသံကိလိဋ္ဌသဘာဝတ္တာ။
236.Sakkanāmakoti baliputto viya sakkassa vasena gahitanāmo. ‘‘Eso kirā’’ti pāṭho. ‘‘Eko kirā’’tipi likhanti. Mārassa pakkhe gato mārapakkhiko. Yadaññanti ettha yanti kiriyāparāmasanaṃ, tasmā yaṃ aññassa anusāsanaṃ, taṃ samaṇassa na sādhūti yojanā. Kāraṇenāti kāraṇamattena saṃvāso jāyati. Yena kenaci gahaṭṭhena vā pabbajitena vā. Taṃ kāraṇantaraṃ samāgataṃ purisaṃ sappañño sambuddho anukampituṃ nārahati visesādhigamābhāvā, sati pana tasmiṃ savisesaṃ pasādo hotīti. Manasā ce…pe… na tena hoti saṃyutto sinehavasena anukampā anuddayā tassā asaṃkiliṭṭhasabhāvattā.
သက္ကနာမသုတ္တဝဏ္ဏနာ နိဋ္ဌိတာ။
Sakkanāmasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. သက္ကနာမသုတ္တံ • 2. Sakkanāmasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. သက္ကနာမသုတ္တဝဏ္ဏနာ • 2. Sakkanāmasuttavaṇṇanā
