| Library / Tipiṭaka / တိပိဋက • Tipiṭaka / ဝဇိရဗုဒ္ဓိ-ဋီကာ • Vajirabuddhi-ṭīkā |
၄. သက္ကစ္စဝဂ္ဂဝဏ္ဏနာ
4. Sakkaccavaggavaṇṇanā
၆၀၉. သူပောဒနဝိညတ္တိသိက္ခာပဒေ ‘‘သူပော နာမ ဒ္ဝေ သူပာ’’တိ န ဝုတ္တံ သူပဂ္ဂဟဏေန ပဏီတဘောဇနေဟိ အဝသေသာနံ သဗ္ဗဘောဇနာနံ သင္ဂဏ္ဟနတ္ထံ။ အနာပတ္တိဝာရေ စသ္သ ‘‘ဉာတကာနံ ပဝာရိတာနံ အညသ္သတ္ထာယ အတ္တနော ဓနေနာ’’တိ ဣဒံ အဓိကံ။ ကတ္ထစိ ပောတ္ထကေ ‘‘အနာပတ္တိ အသဉ္စိစ္စ အသတိယာ အဇာနန္တသ္သ ဂိလာနသ္သ အာပဒာသူ’’တိ ဧတ္တကမေဝ ဝုတ္တံ, တံ န, ‘‘သမသူပကံ ပိဏ္ဍပာတံ ဘုဉ္ဇိသ္သာမီ’’တိ ဣမသ္သ အနာပတ္တိဝာရေ ‘‘အညသ္သတ္ထာယာ’’တိ ကတ္ထစိ လိခိတံ, တဉ္စ ပမာဒဝသေန လိခိတံ။ ‘‘မုခေ ပက္ခိပိတ္ဝာ ပုန ဝိပ္ပဋိသာရီ ဟုတ္ဝာ ဩဂိလိတုကာမသ္သပိ သဟသာ စေ ပဝိသတိ, ဧတ္ထ ‘အသဉ္စိစ္စာ’တိ ဝုစ္စတိ။ ဝိညတ္တမ္ပိ အဝိညတ္တမ္ပိ ဧကသ္မိံ ဌာနေ ဌိတံ သဟသာ အနုပဓာရေတ္ဝာ ဂဟေတ္ဝာ ဘုဉ္ဇန္တော ‘အသတိယာ’တိ ဝုစ္စတီ’’တိ လိခိတံ, အနာပတ္တိဝာရေ ဧကစ္စေသု ပောတ္ထကေသု ‘‘ရသရသေတိ လိခိတံ, တံ ဂဟေတဗ္ဗ’’န္တိ ဝုတ္တံ။
609.Sūpodanaviññattisikkhāpade ‘‘sūpo nāma dve sūpā’’ti na vuttaṃ sūpaggahaṇena paṇītabhojanehi avasesānaṃ sabbabhojanānaṃ saṅgaṇhanatthaṃ. Anāpattivāre cassa ‘‘ñātakānaṃ pavāritānaṃ aññassatthāya attano dhanenā’’ti idaṃ adhikaṃ. Katthaci potthake ‘‘anāpatti asañcicca asatiyā ajānantassa gilānassa āpadāsū’’ti ettakameva vuttaṃ, taṃ na, ‘‘samasūpakaṃ piṇḍapātaṃ bhuñjissāmī’’ti imassa anāpattivāre ‘‘aññassatthāyā’’ti katthaci likhitaṃ, tañca pamādavasena likhitaṃ. ‘‘Mukhe pakkhipitvā puna vippaṭisārī hutvā ogilitukāmassapi sahasā ce pavisati, ettha ‘asañciccā’ti vuccati. Viññattampi aviññattampi ekasmiṃ ṭhāne ṭhitaṃ sahasā anupadhāretvā gahetvā bhuñjanto ‘asatiyā’ti vuccatī’’ti likhitaṃ, anāpattivāre ekaccesu potthakesu ‘‘rasaraseti likhitaṃ, taṃ gahetabba’’nti vuttaṃ.
သက္ကစ္စဝဂ္ဂဝဏ္ဏနာ နိဋ္ဌိတာ။
Sakkaccavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၄. သက္ကစ္စဝဂ္ဂော • 4. Sakkaccavaggo
