| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
8. сагалигасуд̇д̇аван̣н̣анаа
8. Sakalikasuttavaṇṇanā
38. д̇анд̇и уяяаанам̣ сан̇кам̣ г̇ад̇анд̇и самб̣анд̇хо. д̇ханунаа сарзна г̇аханд̇и бот̇аяанд̇и б̣аад̇хзнд̇ийд̇и д̇хануг̇г̇ахаа. д̇ам̣ самбадижчийд̇и д̇ассаа силааяа хздтаабхааг̇зна уг̇г̇анд̇ваа самбадижчи. сад̇т̇у бун̃н̃аанубхаавзна убахад̇ад̇д̇аа саяамби барибад̇анд̇ий ваад̇ам̣ убад̇т̇амбхзд̇и. абхихани сад̇т̇аараа анааваж̇ж̇ид̇ад̇д̇аа. д̇ан̃жа ко гаммапалавасзнаад̇и д̣̇адтаб̣б̣ам̣. д̇ад̇о зва д̇ад̇о бадтааяа бхаг̇авад̇о апаасу ж̇аад̇анд̇и зд̇знаби убаад̣̇ин̣н̣агасарийрз наама анидтааби сампассагаа бад̇анд̇и зва д̇ат̇ааруубзна гаммунаа гад̇огаасзд̇и д̣̇ассзд̇и. аяам̣ вихаарод̇и г̇иж̇жхагуудавихааро. уж̇ж̇ан̇г̇ало на гад̇д̇аб̣б̣абаро. висамод̇и бхуумибхааг̇авасзна висамо. сивигаагаарзна саж̇ж̇ид̇о ман̃жо зва ман̃жасивигаа.
38.Tanti uyyānaṃ saṅkhaṃ gatanti sambandho. Dhanunā sarena gahanti pothayanti bādhentīti dhanuggahā. Taṃ sampaṭicchīti tassā silāya heṭṭhābhāgena uggantvā sampaṭicchi. Satthu puññānubhāvena upahatattā sayampi paripatantī vātaṃ upatthambheti. Abhihani satthārā anāvajjitattā. Tañca kho kammaphalavasenāti daṭṭhabbaṃ. Tato eva tato paṭṭhāya bhagavato aphāsu jātanti etenapi upādiṇṇakasarīre nāma aniṭṭhāpi samphassakā patanti eva tathārūpena kammunā katokāseti dasseti. Ayaṃvihāroti gijjhakūṭavihāro. Ujjaṅgalo na kattabbaparo. Visamoti bhūmibhāgavasena visamo. Sivikākārena sajjito mañco eva mañcasivikā.
бхусаад̇и д̣̇ал̣хаа. д̣̇угкаад̇и д̣̇угкамаа д̣̇уд̇д̇ид̇игкаа. караад̇и гаггасаа. гадугаад̇и анидтаа. асаад̇аад̇и на саад̇аа аббияаа. на аббзд̇ийд̇и на убзд̇и. на аббааяанд̇ийд̇и на каманд̇и. взд̣̇анаад̇хиваасанаканд̇ияаа сад̇исамбаж̇ан̃н̃аяуд̇д̇ад̇д̇аа саб̣б̣асад̇д̇адтид̇аахаарасамуд̣̇аяавад̇т̇уж̇аад̇асса аад̣̇ийнаваниссаран̣аанам̣ баг̇зва суббадивид̣̇ид̇ад̇д̇аа яат̇аа самуд̣̇аажааро жид̇д̇ам̣ наабхибхавад̇и, звам̣ саммад̣̇зва убадтаабид̇асад̇исамбаж̇ан̃н̃ад̇д̇аа вуд̇д̇ам̣ ‘‘взд̣̇анаад̇хиваасана…бз… худ̇ваа’’д̇и. абийл̣ияамаанод̇и аб̣аад̇хияамаано. гаамам̣ анидтааяа взд̣̇анааяа пудто д̇ааяа абийл̣ияамаано наама над̇т̇и, барин̃н̃аад̇авад̇т̇угад̇д̇аа бана д̇ассаа васз авад̇д̇амаано ‘‘авихан̃н̃амаано’’д̇и вуд̇д̇о. д̇знааха ‘‘самбаривад̇д̇асааяид̇ааяа взд̣̇анаанам̣ васам̣ аг̇ажчанд̇о’’д̇и.
Bhusāti daḷhā. Dukkhāti dukkhamā duttitikkhā. Kharāti kakkasā. Kaṭukāti aniṭṭhā. Asātāti na sātā appiyā. Na appetīti na upeti. Na appāyantīti na khamanti. Vedanādhivāsanakhantiyā satisampajaññayuttattā sabbasattaṭṭhitāhārasamudayavatthujātassa ādīnavanissaraṇānaṃ pageva suppaṭividitattā yathā samudācāro cittaṃ nābhibhavati, evaṃ sammadeva upaṭṭhāpitasatisampajaññattā vuttaṃ ‘‘vedanādhivāsana…pe… hutvā’’ti. Apīḷiyamānoti abādhiyamāno. Kāmaṃ aniṭṭhāya vedanāya phuṭṭho tāya apīḷiyamāno nāma natthi, pariññātavatthukattā pana tassā vase avattamāno ‘‘avihaññamāno’’ti vutto. Tenāha ‘‘samparivattasāyitāya vedanānaṃ vasaṃ agacchanto’’ti.
сийхасзяяанд̇и зд̇т̇а саяанам̣ сзяяаа, сийхасса вияа сзяяаа сийхасзяяаа, д̇ам̣ сийхасзяяам̣. ат̇а ваа сийхасзяяанд̇и сздтасзяяам̣ уд̇д̇амасзяяам̣. свааяамад̇т̇о адтагат̇ааяамзва ааг̇амиссад̇и. ‘‘ваамзна бассзна сзнд̇ий’’д̇и звам̣ вуд̇д̇аа гаамабхог̇исзяяаа. д̣̇агкин̣абассзна саяаано наама над̇т̇и д̣̇агкин̣ахад̇т̇асса сарийраг̇г̇ахан̣аад̣̇ияог̇агкамад̇о. бурисавасзна жзд̇ам̣ вуд̇д̇ам̣. згзна бассзна саяид̇ум̣ на саггонд̇и д̣̇угкуббад̇д̇ид̇о. аяам̣ сийхасзяяаад̇и аяам̣ яат̇аавуд̇д̇аа сийхасзяяаа. д̇зж̇уссад̣̇ад̇д̇аад̇и иминаа сийхасса абхийд̇абхаавам̣ д̣̇ассзд̇и. бхийругаж̇аад̇игаа хи сзсамиг̇аа ад̇д̇ано аасаяам̣ бависид̇ваа уд̇раасаб̣ахулаа санд̇аасабуб̣б̣агам̣ яат̇аа д̇ат̇аа саяанд̇и, сийхо бана абхиругабхаавад̇о сад̇огаарий бхигку вияа сад̇им̣ убадтабзд̇ваава саяад̇и. д̇знааха ‘‘д̣̇вз буримабаад̣̇з’’д̇иаад̣̇и. буримабаад̣̇зд̇и д̣̇агкин̣абуримабаад̣̇з ваамасса буримабаад̣̇асса табанавасзна д̣̇вз буримабаад̣̇з згасмим̣ таанз табзд̇ваа. бажчимабаад̣̇зд̇и д̣̇вз бажчимабаад̣̇з. вуд̇д̇анаязнзва ид̇хааби згасмим̣ таанз табанам̣ взд̣̇ид̇аб̣б̣ам̣. тид̇огаасасаллагкан̣ам̣ абхийругабхаавзнзва. сийсам̣ бана угкибид̇ваад̇иаад̣̇инаа вуд̇д̇асийхагирияаа ануд̇раасабаб̣уж̇жханам̣ вияа абхийругабхаавасид̣̇д̇хаа д̇хаммад̇аавасзнзваад̇и взд̣̇ид̇аб̣б̣аа. сийхавиж̇амбхид̇авиж̇амбханам̣ ад̇ивзлам̣ згаагаарзна табид̇аанам̣ сарийрааваяаваанам̣ г̇аманаад̣̇игирияаасу яог̇г̇абхааваабаад̣̇анад̇т̇ам̣. д̇игкад̇д̇ум̣ сийханаад̣̇анад̣̇анам̣ аббзсагкамиг̇аж̇аад̇абарихаран̣ад̇т̇ам̣.
Sīhaseyyanti ettha sayanaṃ seyyā, sīhassa viya seyyā sīhaseyyā, taṃ sīhaseyyaṃ. Atha vā sīhaseyyanti seṭṭhaseyyaṃ uttamaseyyaṃ. Svāyamattho aṭṭhakathāyameva āgamissati. ‘‘Vāmena passena sentī’’ti evaṃ vuttā kāmabhogiseyyā. Dakkhiṇapassena sayāno nāma natthi dakkhiṇahatthassa sarīraggahaṇādiyogakkhamato. Purisavasena cetaṃ vuttaṃ. Ekena passena sayituṃ na sakkonti dukkhuppattito. Ayaṃ sīhaseyyāti ayaṃ yathāvuttā sīhaseyyā. Tejussadattāti iminā sīhassa abhītabhāvaṃ dasseti. Bhīrukajātikā hi sesamigā attano āsayaṃ pavisitvā utrāsabahulā santāsapubbakaṃ yathā tathā sayanti, sīho pana abhirukabhāvato satokārī bhikkhu viya satiṃ upaṭṭhapetvāva sayati. Tenāha ‘‘dve purimapāde’’tiādi. Purimapādeti dakkhiṇapurimapāde vāmassa purimapādassa ṭhapanavasena dve purimapāde ekasmiṃ ṭhāne ṭhapetvā. Pacchimapādeti dve pacchimapāde. Vuttanayeneva idhāpi ekasmiṃ ṭhāne ṭhapanaṃ veditabbaṃ. Ṭhitokāsasallakkhaṇaṃ abhīrukabhāveneva. Sīsaṃ pana ukkhipitvātiādinā vuttasīhakiriyā anutrāsapabujjhanaṃ viya abhīrukabhāvasiddhā dhammatāvasenevāti veditabbā. Sīhavijambhitavijambhanaṃ ativelaṃ ekākārena ṭhapitānaṃ sarīrāvayavānaṃ gamanādikiriyāsu yoggabhāvāpādanatthaṃ. Tikkhattuṃ sīhanādanadanaṃ appesakkhamigajātapariharaṇatthaṃ.
сзд̇и аб̣яаавадабхаавзна бавад̇д̇ад̇и зд̇т̇аад̇и сзяяаа, жад̇уд̇т̇аж̇жхаанамзва сзяяаа жад̇уд̇т̇аж̇жхаанасзяяаа. гим̣ банзд̇т̇а д̇ам̣ жад̇уд̇т̇аж̇жхаананд̇и? аанаабаанажад̇уд̇т̇аж̇жхаанам̣. д̇ад̇о хи вудтахид̇ваа вибассанам̣ вад̣дхзд̇ваа ануггамзна аг̇г̇амаг̇г̇ам̣ ад̇хиг̇анд̇ваа д̇ат̇ааг̇ад̇о ж̇аад̇од̇и. ‘‘д̇аяид̣̇ам̣ бад̣̇адтаанам̣ наама, на сзяяаа, д̇ат̇ааби яасмаа ‘жад̇уд̇т̇аж̇жхаанаа вудтахид̇ваа самананд̇арам̣ бхаг̇аваа бариниб̣б̣ааяий’д̇и махаабариниб̣б̣аанз (д̣̇ий. ни. 2.219) ааг̇ад̇ам̣. д̇асмаа логияажад̇уд̇т̇аж̇жхаанасамаабад̇д̇и зва д̇ат̇ааг̇ад̇асзяяаа’’д̇и гзжи. звам̣ сад̇и бариниб̣б̣аанагаалигаава д̇ат̇ааг̇ад̇асзяяаад̇и аабаж̇ж̇ад̇и; на жа д̇ат̇ааг̇ад̇о логияажад̇уд̇т̇аж̇жхаанасамаабаж̇ж̇анаб̣ахуло вихааси. аг̇г̇апалавасзна бавад̇д̇ам̣ банзд̇т̇а жад̇уд̇т̇аж̇жхаанам̣ взд̣̇ид̇аб̣б̣ам̣. д̇ад̇т̇а яат̇аа сад̇д̇аанам̣ нид̣̇д̣̇убаг̇амалагкан̣аа сзяяаа бхаван̇г̇ажид̇д̇авасзна ход̇и, саа жа нзсам̣ батамам̣ ж̇аад̇исаманваяаа язбхуяяавуд̇д̇игаа, звам̣ бхаг̇авад̇о арияаж̇аад̇исаманваяам̣ язбхуяяавуд̇д̇игам̣ аг̇г̇апалабхууд̇ам̣ жад̇уд̇т̇аж̇жхаанам̣ д̇ат̇ааг̇ад̇асзяяаад̇и взд̣̇ид̇аб̣б̣аа. сийхасзяяаа наама сздтасзяяаад̇и ааха ‘‘уд̇д̇амасзяяаа’’д̇и.
Seti abyāvaṭabhāvena pavattati etthāti seyyā, catutthajjhānameva seyyā catutthajjhānaseyyā. Kiṃ panettha taṃ catutthajjhānanti? Ānāpānacatutthajjhānaṃ. Tato hi vuṭṭhahitvā vipassanaṃ vaḍḍhetvā anukkamena aggamaggaṃ adhigantvā tathāgato jātoti. ‘‘Tayidaṃ padaṭṭhānaṃ nāma, na seyyā, tathāpi yasmā ‘catutthajjhānā vuṭṭhahitvā samanantaraṃ bhagavā parinibbāyī’ti mahāparinibbāne (dī. ni. 2.219) āgataṃ. Tasmā lokiyacatutthajjhānasamāpatti eva tathāgataseyyā’’ti keci. Evaṃ sati parinibbānakālikāva tathāgataseyyāti āpajjati; na ca tathāgato lokiyacatutthajjhānasamāpajjanabahulo vihāsi. Aggaphalavasena pavattaṃ panettha catutthajjhānaṃ veditabbaṃ. Tattha yathā sattānaṃ niddupagamalakkhaṇā seyyā bhavaṅgacittavasena hoti, sā ca nesaṃ paṭhamaṃ jātisamanvayā yebhuyyavuttikā, evaṃ bhagavato ariyajātisamanvayaṃ yebhuyyavuttikaṃ aggaphalabhūtaṃ catutthajjhānaṃ tathāgataseyyāti veditabbā. Sīhaseyyā nāma seṭṭhaseyyāti āha ‘‘uttamaseyyā’’ti.
‘‘гаалабарижчзд̣̇ам̣ гад̇ваа яат̇аабарижчзд̣̇ам̣ удтахиссаамий’’д̇и звам̣ д̇ад̣̇аа манасигаарасса агад̇ад̇д̇аа баал̣ияам̣ ‘‘удтаанасан̃н̃ам̣ манасигарид̇ваа’’д̇и на вуд̇д̇анд̇и ааха ‘‘удтаанасан̃н̃анд̇и банзд̇т̇а на вуд̇д̇а’’нд̇и. д̇ад̇т̇а гааран̣амааха ‘‘г̇илаанасзяяаа хзсаа’’д̇и. саа хи жирагаалаббавад̇д̇игаа ход̇и.
‘‘Kālaparicchedaṃ katvā yathāparicchedaṃ uṭṭhahissāmī’’ti evaṃ tadā manasikārassa akatattā pāḷiyaṃ ‘‘uṭṭhānasaññaṃ manasikaritvā’’ti na vuttanti āha ‘‘uṭṭhānasaññanti panettha na vutta’’nti. Tattha kāraṇamāha ‘‘gilānaseyyā hesā’’ti. Sā hi cirakālappavattikā hoti.
висум̣ висум̣ раасивасзна анааг̇анд̇ваа згаж̇жхам̣ бун̃ж̇авасзна ааг̇ад̇ад̇д̇аа вуд̇д̇ам̣ ‘‘саб̣б̣ааби д̇аа’’д̇и. д̇знааха ‘‘сад̇д̇асад̇аа’’д̇и. вигаарамад̇д̇амбийд̇и взд̣̇анааяа асаханавасзна бавад̇д̇анаагаарамад̇д̇амби. сусаммадтаган̃жанам̣ вияаад̇и саммадтасусаж̇ж̇ид̇асуван̣н̣ам̣ вияа.
Visuṃ visuṃ rāsivasena anāgantvā ekajjhaṃ puñjavasena āgatattā vuttaṃ ‘‘sabbāpi tā’’ti. Tenāha ‘‘sattasatā’’ti. Vikāramattampīti vedanāya asahanavasena pavattanākāramattampi. Susammaṭṭhakañcanaṃ viyāti sammaṭṭhasusajjitasuvaṇṇaṃ viya.
д̇хаммаалабананд̇и асан̇кааригасамуббаннасабхааваалабанам̣. самуллабид̇ан̃хи аагаарасамаанаважанамзд̇ам̣. нааг̇о вияа ваад̇и бавад̇д̇ад̇ийд̇и нааг̇аво. д̇асса бхааво нааг̇авад̇аа. вибхад̇д̇илобзна хзса нид̣̇д̣̇зсо, махаанааг̇ахад̇т̇исад̣̇исад̇ааяаад̇и ад̇т̇о. б̣яад̇д̇убарижаран̣адтзнаад̇и б̣яад̇д̇ам̣ убаруубари ад̇д̇ано гирияаажаран̣зна. ааж̇аанийяод̇и саммаабад̇ид̇ам̣ д̣̇угкам̣ саханд̇о ад̇д̇анаа гаад̇аб̣б̣агирияам̣ д̇хийро худ̇ваа нид̇т̇аараго. гааран̣аагааран̣аж̇аананзнаад̇и нияяаанигаанияяаанигагаран̣ан̃аад̇ад̇ааяа. д̇знзвадтзнаад̇и аббадисамадтзнзва. ‘‘муд̇д̇о можзяяа’’нд̇иаад̣̇и д̇хураваахадтзна. ниб̣б̣исзванадтзнаад̇и рааг̇аад̣̇ивисавиг̇ад̇абхаавзна.
Dhammālapananti asaṅkhārikasamuppannasabhāvālapanaṃ. Samullapitañhi ākārasamānavacanametaṃ. Nāgo viya vāti pavattatīti nāgavo. Tassa bhāvo nāgavatā. Vibhattilopena hesa niddeso, mahānāgahatthisadisatāyāti attho. Byattuparicaraṇaṭṭhenāti byattaṃ uparūpari attano kiriyācaraṇena. Ājānīyoti sammāpatitaṃ dukkhaṃ sahanto attanā kātabbakiriyaṃ dhīro hutvā nitthārako. Kāraṇākāraṇajānanenāti niyyānikāniyyānikakaraṇañātatāya. Tenevaṭṭhenāti appaṭisamaṭṭheneva. ‘‘Mutto moceyya’’ntiādi dhuravāhaṭṭhena. Nibbisevanaṭṭhenāti rāgādivisavigatabhāvena.
анияамид̇аан̣ад̇д̇ийд̇и ануд̣̇д̣̇зсигам̣ аан̣аабанам̣. сааман̃н̃агад̇оби самаад̇хисад̣̇д̣̇о багаран̣ад̇о ид̇ха висзсад̇т̇од̇и ааха ‘‘самаад̇хинд̇и арахад̇д̇апаласамаад̇хи’’нд̇и. бадиббассад̣̇д̇хивасзна саб̣б̣агилзсзхи судту вимуд̇д̇анд̇и сувимуд̇д̇ам̣. абхинад̇ам̣ наама аарамман̣з абхимукабхаавзна бавад̇д̇ияаа. абанад̇ам̣ абаг̇аманавасзна бавад̇д̇ияаа, вимукад̇ааяаад̇и ад̇т̇о. логияаж̇жхаанажид̇д̇ам̣ вияа вибассанаа вияа жа сасан̇каарзна саббаяог̇зна д̇ад̣̇ан̇г̇аббахаанавигкамбханабахаанавасзна жа вигкамбхзд̇ваа на ад̇хиг̇ад̇ам̣ на табид̇ам̣, гин̃жарахи гилзсаанам̣ саб̣б̣асо чиннад̇ааяаад̇и ааха ‘‘чиннад̇д̇аа вад̇ам̣ паласамаад̇хинаа самаахид̇а’’нд̇и. ад̇иггамид̇аб̣б̣анд̇и аажаараад̇иггамавасзна лан̇гхид̇аб̣б̣ам̣. саа бана лан̇гханаа аасаад̣̇анаа гхадданаад̇и ааха ‘‘гхаддзд̇аб̣б̣а’’нд̇и.
Aniyamitāṇattīti anuddesikaṃ āṇāpanaṃ. Sāmaññakatopi samādhisaddo pakaraṇato idha visesatthoti āha ‘‘samādhinti arahattaphalasamādhi’’nti. Paṭippassaddhivasena sabbakilesehi suṭṭhu vimuttanti suvimuttaṃ. Abhinataṃ nāma ārammaṇe abhimukhabhāvena pavattiyā. Apanataṃ apagamanavasena pavattiyā, vimukhatāyāti attho. Lokiyajjhānacittaṃ viya vipassanā viya ca sasaṅkhārena sappayogena tadaṅgappahānavikkhambhanapahānavasena ca vikkhambhetvā na adhigataṃ na ṭhapitaṃ, kiñcarahi kilesānaṃ sabbaso chinnatāyāti āha ‘‘chinnattā vataṃ phalasamādhinā samāhita’’nti. Atikkamitabbanti ācārātikkamavasena laṅghitabbaṃ. Sā pana laṅghanā āsādanā ghaṭṭanāti āha ‘‘ghaṭṭetabba’’nti.
бан̃жавзд̣̇аа наама – ирувзд̣̇о, яаж̇увзд̣̇о, саамавзд̣̇о, аат̇аб̣б̣ан̣авзд̣̇о, ид̇ихаасо жаад̇и звам̣ ид̇ихаасабан̃жамаанам̣ взд̣̇аанам̣. ‘‘жара’’нд̇и важанавибаллаасзна вуд̇д̇анд̇и ааха ‘‘жаранд̇аа’’д̇и, д̇абанд̇аад̇и ад̇т̇о. хийнад̇д̇аруубаад̇и хийнаад̇химуд̇д̇игад̇ааяа нихийнажид̇д̇асабхааваа. вимуд̇д̇игад̇ааяа абхаавад̇о ниб̣б̣аанан̇г̇амаа на хонд̇и. арахад̇д̇аад̇хиг̇амагаммасса абхаб̣б̣ад̇ааяа барихийнад̇т̇аа. аж̇жход̇т̇адаад̇и абхибхууд̇аа. д̇аад̣̇исзхзва сийлзхийд̇и г̇осийлаад̣̇ийхи. б̣ад̣̇д̇хаад̇и самаад̣̇абзд̇ваа бавад̇д̇анавасзна ануб̣ад̣̇д̇хаа. луукам̣ д̇абанд̇и ад̇д̇агиламат̇аануяог̇ам̣. д̇ам̣ бана згад̣̇зсзна д̣̇ассзнд̇о ‘‘бан̃жаад̇абад̇аабана’’нд̇иаад̣̇имааха. ‘‘звам̣ бадибаннасса могко над̇т̇и, звам̣ бадибаннасса ваддад̇о муд̇д̇и ад̇т̇ий’’д̇и вад̣̇анд̇ий саа ад̇д̇ад̇о саасанасса нияяаанабхааво гат̇ид̇о наама ход̇ийд̇и ааха ‘‘саасанасса нияяаанигабхаавам̣ гат̇знд̇ий’’д̇и. аад̣̇инд̇и г̇аат̇аад̣̇ваяам̣.
Pañcavedā nāma – iruvedo, yajuvedo, sāmavedo, āthabbaṇavedo, itihāso cāti evaṃ itihāsapañcamānaṃ vedānaṃ. ‘‘Cara’’nti vacanavipallāsena vuttanti āha ‘‘carantā’’ti, tapantāti attho. Hīnattarūpāti hīnādhimuttikatāya nihīnacittasabhāvā. Vimuttikatāya abhāvato nibbānaṅgamā na honti. Arahattādhigamakammassa abhabbatāya parihīnatthā. Ajjhotthaṭāti abhibhūtā. Tādiseheva sīlehīti gosīlādīhi. Baddhāti samādapetvā pavattanavasena anubaddhā. Lūkhaṃ tapanti attakilamathānuyogaṃ. Taṃ pana ekadesena dassento ‘‘pañcātapatāpana’’ntiādimāha. ‘‘Evaṃ paṭipannassa mokkho natthi, evaṃ paṭipannassa vaṭṭato mutti atthī’’ti vadantī sā attato sāsanassa niyyānabhāvo kathito nāma hotīti āha ‘‘sāsanassa niyyānikabhāvaṃ kathentī’’ti. Ādinti gāthādvayaṃ.
сагалигасуд̇д̇аван̣н̣анаа нидтид̇аа.
Sakalikasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 8. сагалигасуд̇д̇ам̣ • 8. Sakalikasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 8. сагалигасуд̇д̇аван̣н̣анаа • 8. Sakalikasuttavaṇṇanā
