| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
१२. सहायकसुत्तं
12. Sahāyakasuttaṃ
२४६. सावत्थियं विहरति। अथ खो द्वे भिक्खू सहायका आयस्मतो महाकप्पिनस्स सद्धिविहारिनो येन भगवा तेनुपसङ्कमिंसु। अद्दसा खो भगवा ते भिक्खू दूरतोव आगच्छन्ते। दिस्वान भिक्खू आमन्तेसि – ‘‘पस्सथ नो तुम्हे, भिक्खवे, एते भिक्खू सहायके आगच्छन्ते कप्पिनस्स सद्धिविहारिनो’’ति? ‘‘एवं, भन्ते’’। ‘‘एते खो ते भिक्खू महिद्धिका महानुभावा। न च सा समापत्ति सुलभरूपा, या तेहि भिक्खूहि असमापन्नपुब्बा। यस्स चत्थाय कुलपुत्ता सम्मदेव अगारस्मा अनगारियं पब्बजन्ति तदनुत्तरं ब्रह्मचरियपरियोसानं दिट्ठेव धम्मे सयं अभिञ्ञा सच्छिकत्वा उपसम्पज्ज विहरन्ती’’ति।
246. Sāvatthiyaṃ viharati. Atha kho dve bhikkhū sahāyakā āyasmato mahākappinassa saddhivihārino yena bhagavā tenupasaṅkamiṃsu. Addasā kho bhagavā te bhikkhū dūratova āgacchante. Disvāna bhikkhū āmantesi – ‘‘passatha no tumhe, bhikkhave, ete bhikkhū sahāyake āgacchante kappinassa saddhivihārino’’ti? ‘‘Evaṃ, bhante’’. ‘‘Ete kho te bhikkhū mahiddhikā mahānubhāvā. Na ca sā samāpatti sulabharūpā, yā tehi bhikkhūhi asamāpannapubbā. Yassa catthāya kulaputtā sammadeva agārasmā anagāriyaṃ pabbajanti tadanuttaraṃ brahmacariyapariyosānaṃ diṭṭheva dhamme sayaṃ abhiññā sacchikatvā upasampajja viharantī’’ti.
इदमवोच भगवा। इदं वत्वान सुगतो अथापरं एतदवोच सत्था –
Idamavoca bhagavā. Idaṃ vatvāna sugato athāparaṃ etadavoca satthā –
‘‘सहाया वतिमे भिक्खू, चिररत्तं समेतिका।
‘‘Sahāyā vatime bhikkhū, cirarattaṃ sametikā;
समेति नेसं सद्धम्मो, धम्मे बुद्धप्पवेदिते॥
Sameti nesaṃ saddhammo, dhamme buddhappavedite.
‘‘सुविनीता कप्पिनेन, धम्मे अरियप्पवेदिते।
‘‘Suvinītā kappinena, dhamme ariyappavedite;
धारेन्ति अन्तिमं देहं, जेत्वा मारं सवाहिनि’’न्ति॥ द्वादसमं।
Dhārenti antimaṃ dehaṃ, jetvā māraṃ savāhini’’nti. dvādasamaṃ;
भिक्खुसंयुत्तं समत्तं।
Bhikkhusaṃyuttaṃ samattaṃ.
तस्सुद्दानं –
Tassuddānaṃ –
कोलितो उपतिस्सो च, घटो चापि पवुच्चति।
Kolito upatisso ca, ghaṭo cāpi pavuccati;
नवो सुजातो भद्दि च, विसाखो नन्दो तिस्सो च।
Navo sujāto bhaddi ca, visākho nando tisso ca;
थेरनामो च कप्पिनो, सहायेन च द्वादसाति॥
Theranāmo ca kappino, sahāyena ca dvādasāti.
निदानवग्गो दुतियो।
Nidānavaggo dutiyo.
तस्सुद्दानं –
Tassuddānaṃ –
निदानाभिसमयधातु, अनमतग्गेन कस्सपं।
Nidānābhisamayadhātu, anamataggena kassapaṃ;
सक्कारराहुललक्खणो, ओपम्म-भिक्खुना वग्गो॥
Sakkārarāhulalakkhaṇo, opamma-bhikkhunā vaggo.
दुतियो तेन पवुच्चतीति।
Dutiyo tena pavuccatīti.
निदानवग्गसंयुत्तपाळि निट्ठिता।
Nidānavaggasaṃyuttapāḷi niṭṭhitā.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १२. सहायकसुत्तवण्णना • 12. Sahāyakasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १२. सहायकसुत्तवण्णना • 12. Sahāyakasuttavaṇṇanā
