| Library / Tipiṭaka / തിപിടക • Tipiṭaka / പരിവാരപാളി • Parivārapāḷi |
൮. സഹധമ്മികവഗ്ഗോ
8. Sahadhammikavaggo
൧൭൨. ഭിക്ഖൂഹി സഹധമ്മികം വുച്ചമാനോ – ‘‘ന താവാഹം, ആവുസോ, ഏതസ്മിം സിക്ഖാപദേ സിക്ഖിസ്സാമി യാവ ന അഞ്ഞം ഭിക്ഖും ബ്യത്തം വിനയധരം പരിപുച്ഛിസ്സാമീ’’തി ഭണന്തോ ദ്വേ ആപത്തിയോ ആപജ്ജതി. ഭണതി, പയോഗേ ദുക്കടം; ഭണിതേ ആപത്തി പാചിത്തിയസ്സ.
172. Bhikkhūhi sahadhammikaṃ vuccamāno – ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchissāmī’’ti bhaṇanto dve āpattiyo āpajjati. Bhaṇati, payoge dukkaṭaṃ; bhaṇite āpatti pācittiyassa.
വിനയം വിവണ്ണേന്തോ ദ്വേ ആപത്തിയോ ആപജ്ജതി. വിവണ്ണേതി, പയോഗേ ദുക്കടം; വിവണ്ണിതേ ആപത്തി പാചിത്തിയസ്സ.
Vinayaṃ vivaṇṇento dve āpattiyo āpajjati. Vivaṇṇeti, payoge dukkaṭaṃ; vivaṇṇite āpatti pācittiyassa.
മോഹേന്തോ ദ്വേ ആപത്തിയോ ആപജ്ജതി. അനാരോപിതേ മോഹേ മോഹേതി, ആപത്തി ദുക്കടസ്സ; ആരോപിതേ മോഹേ മോഹേതി, ആപത്തി പാചിത്തിയസ്സ.
Mohento dve āpattiyo āpajjati. Anāropite mohe moheti, āpatti dukkaṭassa; āropite mohe moheti, āpatti pācittiyassa.
ഭിക്ഖുസ്സ കുപിതോ അനത്തമനോ പഹാരം ദേന്തോ ദ്വേ ആപത്തിയോ ആപജ്ജതി. പഹരതി, പയോഗേ ദുക്കടം; പഹതേ ആപത്തി പാചിത്തിയസ്സ .
Bhikkhussa kupito anattamano pahāraṃ dento dve āpattiyo āpajjati. Paharati, payoge dukkaṭaṃ; pahate āpatti pācittiyassa .
ഭിക്ഖുസ്സ കുപിതോ അനത്തമനോ തലസത്തികം ഉഗ്ഗിരന്തോ ദ്വേ ആപത്തിയോ ആപജ്ജതി. ഉഗ്ഗിരതി, പയോഗേ ദുക്കടം; ഉഗ്ഗിരിതേ ആപത്തി പാചിത്തിയസ്സ.
Bhikkhussa kupito anattamano talasattikaṃ uggiranto dve āpattiyo āpajjati. Uggirati, payoge dukkaṭaṃ; uggirite āpatti pācittiyassa.
ഭിക്ഖും അമൂലകേന സങ്ഘാദിസേസേന അനുദ്ധംസേന്തോ ദ്വേ ആപത്തിയോ ആപജ്ജതി. അനുദ്ധംസേതി, പയോഗേ ദുക്കടം; അനുദ്ധംസിതേ ആപത്തി പാചിത്തിയസ്സ.
Bhikkhuṃ amūlakena saṅghādisesena anuddhaṃsento dve āpattiyo āpajjati. Anuddhaṃseti, payoge dukkaṭaṃ; anuddhaṃsite āpatti pācittiyassa.
ഭിക്ഖുസ്സ സഞ്ചിച്ച കുക്കുച്ചം ഉപദഹന്തോ ദ്വേ ആപത്തിയോ ആപജ്ജതി. ഉപദഹതി, പയോഗേ ദുക്കടം; ഉപദഹിതേ ആപത്തി പാചിത്തിയസ്സ.
Bhikkhussa sañcicca kukkuccaṃ upadahanto dve āpattiyo āpajjati. Upadahati, payoge dukkaṭaṃ; upadahite āpatti pācittiyassa.
ഭിക്ഖൂനം ഭണ്ഡനജാതാനം കലഹജാതാനം വിവാദാപന്നാനം ഉപസ്സുതിം തിട്ഠന്തോ ദ്വേ ആപത്തിയോ ആപജ്ജതി. ‘‘സോസ്സാമീ’’തി ഗച്ഛതി, ആപത്തി ദുക്കടസ്സ; യത്ഥ ഠിതോ സുണാതി, ആപത്തി പാചിത്തിയസ്സ.
Bhikkhūnaṃ bhaṇḍanajātānaṃ kalahajātānaṃ vivādāpannānaṃ upassutiṃ tiṭṭhanto dve āpattiyo āpajjati. ‘‘Sossāmī’’ti gacchati, āpatti dukkaṭassa; yattha ṭhito suṇāti, āpatti pācittiyassa.
ധമ്മികാനം കമ്മാനം ഛന്ദം ദത്വാ പച്ഛാ ഖീയനധമ്മം ആപജ്ജന്തോ ദ്വേ ആപത്തിയോ ആപജ്ജതി. ഖിയ്യതി, പയോഗേ ദുക്കടം; ഖിയ്യിതേ ആപത്തി പാചിത്തിയസ്സ.
Dhammikānaṃ kammānaṃ chandaṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
സങ്ഘേ വിനിച്ഛയകഥായ വത്തമാനായ ഛന്ദം അദത്വാ ഉട്ഠായാസനാ പക്കമന്തോ ദ്വേ ആപത്തിയോ ആപജ്ജതി. പരിസായ ഹത്ഥപാസം വിജഹന്തസ്സ ആപത്തി ദുക്കടസ്സ; വിജഹിതേ ആപത്തി പാചിത്തിയസ്സ.
Saṅghe vinicchayakathāya vattamānāya chandaṃ adatvā uṭṭhāyāsanā pakkamanto dve āpattiyo āpajjati. Parisāya hatthapāsaṃ vijahantassa āpatti dukkaṭassa; vijahite āpatti pācittiyassa.
സമഗ്ഗേന സങ്ഘേന ചീവരം ദത്വാ പച്ഛാ ഖീയനധമ്മം ആപജ്ജന്തോ ദ്വേ ആപത്തിയോ ആപജ്ജതി. ഖിയ്യതി, പയോഗേ ദുക്കടം; ഖിയ്യിതേ ആപത്തി പാചിത്തിയസ്സ.
Samaggena saṅghena cīvaraṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
ജാനം സങ്ഘികം ലാഭം പരിണതം പുഗ്ഗലസ്സ പരിണാമേന്തോ ദ്വേ ആപത്തിയോ ആപജ്ജതി. പരിണാമേതി, പയോഗേ ദുക്കടം; പരിണാമിതേ ആപത്തി പാചിത്തിയസ്സ.
Jānaṃ saṅghikaṃ lābhaṃ pariṇataṃ puggalassa pariṇāmento dve āpattiyo āpajjati. Pariṇāmeti, payoge dukkaṭaṃ; pariṇāmite āpatti pācittiyassa.
സഹധമ്മികവഗ്ഗോ അട്ഠമോ.
Sahadhammikavaggo aṭṭhamo.
