| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
8. සහධම්මිකවග්ගො
8. Sahadhammikavaggo
172. භික්ඛූහි සහධම්මිකං වුච්චමානො – ‘‘න තාවාහං, ආවුසො, එතස්මිං සික්ඛාපදෙ සික්ඛිස්සාමි යාව න අඤ්ඤං භික්ඛුං බ්යත්තං විනයධරං පරිපුච්ඡිස්සාමී’’ති භණන්තො ද්වෙ ආපත්තියො ආපජ්ජති. භණති, පයොගෙ දුක්කටං; භණිතෙ ආපත්ති පාචිත්තියස්ස.
172. Bhikkhūhi sahadhammikaṃ vuccamāno – ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchissāmī’’ti bhaṇanto dve āpattiyo āpajjati. Bhaṇati, payoge dukkaṭaṃ; bhaṇite āpatti pācittiyassa.
විනයං විවණ්ණෙන්තො ද්වෙ ආපත්තියො ආපජ්ජති. විවණ්ණෙති, පයොගෙ දුක්කටං; විවණ්ණිතෙ ආපත්ති පාචිත්තියස්ස.
Vinayaṃ vivaṇṇento dve āpattiyo āpajjati. Vivaṇṇeti, payoge dukkaṭaṃ; vivaṇṇite āpatti pācittiyassa.
මොහෙන්තො ද්වෙ ආපත්තියො ආපජ්ජති. අනාරොපිතෙ මොහෙ මොහෙති, ආපත්ති දුක්කටස්ස; ආරොපිතෙ මොහෙ මොහෙති, ආපත්ති පාචිත්තියස්ස.
Mohento dve āpattiyo āpajjati. Anāropite mohe moheti, āpatti dukkaṭassa; āropite mohe moheti, āpatti pācittiyassa.
භික්ඛුස්ස කුපිතො අනත්තමනො පහාරං දෙන්තො ද්වෙ ආපත්තියො ආපජ්ජති. පහරති, පයොගෙ දුක්කටං; පහතෙ ආපත්ති පාචිත්තියස්ස .
Bhikkhussa kupito anattamano pahāraṃ dento dve āpattiyo āpajjati. Paharati, payoge dukkaṭaṃ; pahate āpatti pācittiyassa .
භික්ඛුස්ස කුපිතො අනත්තමනො තලසත්තිකං උග්ගිරන්තො ද්වෙ ආපත්තියො ආපජ්ජති. උග්ගිරති, පයොගෙ දුක්කටං; උග්ගිරිතෙ ආපත්ති පාචිත්තියස්ස.
Bhikkhussa kupito anattamano talasattikaṃ uggiranto dve āpattiyo āpajjati. Uggirati, payoge dukkaṭaṃ; uggirite āpatti pācittiyassa.
භික්ඛුං අමූලකෙන සඞ්ඝාදිසෙසෙන අනුද්ධංසෙන්තො ද්වෙ ආපත්තියො ආපජ්ජති. අනුද්ධංසෙති, පයොගෙ දුක්කටං; අනුද්ධංසිතෙ ආපත්ති පාචිත්තියස්ස.
Bhikkhuṃ amūlakena saṅghādisesena anuddhaṃsento dve āpattiyo āpajjati. Anuddhaṃseti, payoge dukkaṭaṃ; anuddhaṃsite āpatti pācittiyassa.
භික්ඛුස්ස සඤ්චිච්ච කුක්කුච්චං උපදහන්තො ද්වෙ ආපත්තියො ආපජ්ජති. උපදහති, පයොගෙ දුක්කටං; උපදහිතෙ ආපත්ති පාචිත්තියස්ස.
Bhikkhussa sañcicca kukkuccaṃ upadahanto dve āpattiyo āpajjati. Upadahati, payoge dukkaṭaṃ; upadahite āpatti pācittiyassa.
භික්ඛූනං භණ්ඩනජාතානං කලහජාතානං විවාදාපන්නානං උපස්සුතිං තිට්ඨන්තො ද්වෙ ආපත්තියො ආපජ්ජති. ‘‘සොස්සාමී’’ති ගච්ඡති, ආපත්ති දුක්කටස්ස; යත්ථ ඨිතො සුණාති, ආපත්ති පාචිත්තියස්ස.
Bhikkhūnaṃ bhaṇḍanajātānaṃ kalahajātānaṃ vivādāpannānaṃ upassutiṃ tiṭṭhanto dve āpattiyo āpajjati. ‘‘Sossāmī’’ti gacchati, āpatti dukkaṭassa; yattha ṭhito suṇāti, āpatti pācittiyassa.
ධම්මිකානං කම්මානං ඡන්දං දත්වා පච්ඡා ඛීයනධම්මං ආපජ්ජන්තො ද්වෙ ආපත්තියො ආපජ්ජති. ඛිය්යති, පයොගෙ දුක්කටං; ඛිය්යිතෙ ආපත්ති පාචිත්තියස්ස.
Dhammikānaṃ kammānaṃ chandaṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
සඞ්ඝෙ විනිච්ඡයකථාය වත්තමානාය ඡන්දං අදත්වා උට්ඨායාසනා පක්කමන්තො ද්වෙ ආපත්තියො ආපජ්ජති. පරිසාය හත්ථපාසං විජහන්තස්ස ආපත්ති දුක්කටස්ස; විජහිතෙ ආපත්ති පාචිත්තියස්ස.
Saṅghe vinicchayakathāya vattamānāya chandaṃ adatvā uṭṭhāyāsanā pakkamanto dve āpattiyo āpajjati. Parisāya hatthapāsaṃ vijahantassa āpatti dukkaṭassa; vijahite āpatti pācittiyassa.
සමග්ගෙන සඞ්ඝෙන චීවරං දත්වා පච්ඡා ඛීයනධම්මං ආපජ්ජන්තො ද්වෙ ආපත්තියො ආපජ්ජති. ඛිය්යති, පයොගෙ දුක්කටං; ඛිය්යිතෙ ආපත්ති පාචිත්තියස්ස.
Samaggena saṅghena cīvaraṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
ජානං සඞ්ඝිකං ලාභං පරිණතං පුග්ගලස්ස පරිණාමෙන්තො ද්වෙ ආපත්තියො ආපජ්ජති. පරිණාමෙති, පයොගෙ දුක්කටං; පරිණාමිතෙ ආපත්ති පාචිත්තියස්ස.
Jānaṃ saṅghikaṃ lābhaṃ pariṇataṃ puggalassa pariṇāmento dve āpattiyo āpajjati. Pariṇāmeti, payoge dukkaṭaṃ; pariṇāmite āpatti pācittiyassa.
සහධම්මිකවග්ගො අට්ඨමො.
Sahadhammikavaggo aṭṭhamo.
