| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၈. သဟဓမ္မိကဝဂ္ဂော
8. Sahadhammikavaggo
၁၇၂. ဘိက္ခူဟိ သဟဓမ္မိကံ ဝုစ္စမာနော – ‘‘န တာဝာဟံ, အာဝုသော, ဧတသ္မိံ သိက္ခာပဒေ သိက္ခိသ္သာမိ ယာဝ န အညံ ဘိက္ခုံ ဗ္ယတ္တံ ဝိနယဓရံ ပရိပုစ္ဆိသ္သာမီ’’တိ ဘဏန္တော ဒ္ဝေ အာပတ္တိယော အာပဇ္ဇတိ။ ဘဏတိ, ပယောဂေ ဒုက္ကဋံ; ဘဏိတေ အာပတ္တိ ပာစိတ္တိယသ္သ။
172. Bhikkhūhi sahadhammikaṃ vuccamāno – ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchissāmī’’ti bhaṇanto dve āpattiyo āpajjati. Bhaṇati, payoge dukkaṭaṃ; bhaṇite āpatti pācittiyassa.
ဝိနယံ ဝိဝဏ္ဏေန္တော ဒ္ဝေ အာပတ္တိယော အာပဇ္ဇတိ။ ဝိဝဏ္ဏေတိ, ပယောဂေ ဒုက္ကဋံ; ဝိဝဏ္ဏိတေ အာပတ္တိ ပာစိတ္တိယသ္သ။
Vinayaṃ vivaṇṇento dve āpattiyo āpajjati. Vivaṇṇeti, payoge dukkaṭaṃ; vivaṇṇite āpatti pācittiyassa.
မောဟေန္တော ဒ္ဝေ အာပတ္တိယော အာပဇ္ဇတိ။ အနာရောပိတေ မောဟေ မောဟေတိ, အာပတ္တိ ဒုက္ကဋသ္သ; အာရောပိတေ မောဟေ မောဟေတိ, အာပတ္တိ ပာစိတ္တိယသ္သ။
Mohento dve āpattiyo āpajjati. Anāropite mohe moheti, āpatti dukkaṭassa; āropite mohe moheti, āpatti pācittiyassa.
ဘိက္ခုသ္သ ကုပိတော အနတ္တမနော ပဟာရံ ဒေန္တော ဒ္ဝေ အာပတ္တိယော အာပဇ္ဇတိ။ ပဟရတိ, ပယောဂေ ဒုက္ကဋံ; ပဟတေ အာပတ္တိ ပာစိတ္တိယသ္သ ။
Bhikkhussa kupito anattamano pahāraṃ dento dve āpattiyo āpajjati. Paharati, payoge dukkaṭaṃ; pahate āpatti pācittiyassa .
ဘိက္ခုသ္သ ကုပိတော အနတ္တမနော တလသတ္တိကံ ဥဂ္ဂိရန္တော ဒ္ဝေ အာပတ္တိယော အာပဇ္ဇတိ။ ဥဂ္ဂိရတိ, ပယောဂေ ဒုက္ကဋံ; ဥဂ္ဂိရိတေ အာပတ္တိ ပာစိတ္တိယသ္သ။
Bhikkhussa kupito anattamano talasattikaṃ uggiranto dve āpattiyo āpajjati. Uggirati, payoge dukkaṭaṃ; uggirite āpatti pācittiyassa.
ဘိက္ခုံ အမူလကေန သင္ဃာဒိသေသေန အနုဒ္ဓံသေန္တော ဒ္ဝေ အာပတ္တိယော အာပဇ္ဇတိ။ အနုဒ္ဓံသေတိ, ပယောဂေ ဒုက္ကဋံ; အနုဒ္ဓံသိတေ အာပတ္တိ ပာစိတ္တိယသ္သ။
Bhikkhuṃ amūlakena saṅghādisesena anuddhaṃsento dve āpattiyo āpajjati. Anuddhaṃseti, payoge dukkaṭaṃ; anuddhaṃsite āpatti pācittiyassa.
ဘိက္ခုသ္သ သဉ္စိစ္စ ကုက္ကုစ္စံ ဥပဒဟန္တော ဒ္ဝေ အာပတ္တိယော အာပဇ္ဇတိ။ ဥပဒဟတိ, ပယောဂေ ဒုက္ကဋံ; ဥပဒဟိတေ အာပတ္တိ ပာစိတ္တိယသ္သ။
Bhikkhussa sañcicca kukkuccaṃ upadahanto dve āpattiyo āpajjati. Upadahati, payoge dukkaṭaṃ; upadahite āpatti pācittiyassa.
ဘိက္ခူနံ ဘဏ္ဍနဇာတာနံ ကလဟဇာတာနံ ဝိဝာဒာပန္နာနံ ဥပသ္သုတိံ တိဋ္ဌန္တော ဒ္ဝေ အာပတ္တိယော အာပဇ္ဇတိ။ ‘‘သောသ္သာမီ’’တိ ဂစ္ဆတိ, အာပတ္တိ ဒုက္ကဋသ္သ; ယတ္ထ ဌိတော သုဏာတိ, အာပတ္တိ ပာစိတ္တိယသ္သ။
Bhikkhūnaṃ bhaṇḍanajātānaṃ kalahajātānaṃ vivādāpannānaṃ upassutiṃ tiṭṭhanto dve āpattiyo āpajjati. ‘‘Sossāmī’’ti gacchati, āpatti dukkaṭassa; yattha ṭhito suṇāti, āpatti pācittiyassa.
ဓမ္မိကာနံ ကမ္မာနံ ဆန္ဒံ ဒတ္ဝာ ပစ္ဆာ ခီယနဓမ္မံ အာပဇ္ဇန္တော ဒ္ဝေ အာပတ္တိယော အာပဇ္ဇတိ။ ခိယ္ယတိ, ပယောဂေ ဒုက္ကဋံ; ခိယ္ယိတေ အာပတ္တိ ပာစိတ္တိယသ္သ။
Dhammikānaṃ kammānaṃ chandaṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
သင္ဃေ ဝိနိစ္ဆယကထာယ ဝတ္တမာနာယ ဆန္ဒံ အဒတ္ဝာ ဥဋ္ဌာယာသနာ ပက္ကမန္တော ဒ္ဝေ အာပတ္တိယော အာပဇ္ဇတိ။ ပရိသာယ ဟတ္ထပာသံ ဝိဇဟန္တသ္သ အာပတ္တိ ဒုက္ကဋသ္သ; ဝိဇဟိတေ အာပတ္တိ ပာစိတ္တိယသ္သ။
Saṅghe vinicchayakathāya vattamānāya chandaṃ adatvā uṭṭhāyāsanā pakkamanto dve āpattiyo āpajjati. Parisāya hatthapāsaṃ vijahantassa āpatti dukkaṭassa; vijahite āpatti pācittiyassa.
သမဂ္ဂေန သင္ဃေန စီဝရံ ဒတ္ဝာ ပစ္ဆာ ခီယနဓမ္မံ အာပဇ္ဇန္တော ဒ္ဝေ အာပတ္တိယော အာပဇ္ဇတိ။ ခိယ္ယတိ, ပယောဂေ ဒုက္ကဋံ; ခိယ္ယိတေ အာပတ္တိ ပာစိတ္တိယသ္သ။
Samaggena saṅghena cīvaraṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
ဇာနံ သင္ဃိကံ လာဘံ ပရိဏတံ ပုဂ္ဂလသ္သ ပရိဏာမေန္တော ဒ္ဝေ အာပတ္တိယော အာပဇ္ဇတိ။ ပရိဏာမေတိ, ပယောဂေ ဒုက္ကဋံ; ပရိဏာမိတေ အာပတ္တိ ပာစိတ္တိယသ္သ။
Jānaṃ saṅghikaṃ lābhaṃ pariṇataṃ puggalassa pariṇāmento dve āpattiyo āpajjati. Pariṇāmeti, payoge dukkaṭaṃ; pariṇāmite āpatti pācittiyassa.
သဟဓမ္မိကဝဂ္ဂော အဋ္ဌမော။
Sahadhammikavaggo aṭṭhamo.
