| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
៨. សហធម្មិកវគ្គោ
8. Sahadhammikavaggo
១៧២. ភិក្ខូហិ សហធម្មិកំ វុច្ចមានោ – ‘‘ន តាវាហំ, អាវុសោ, ឯតស្មិំ សិក្ខាបទេ សិក្ខិស្សាមិ យាវ ន អញ្ញំ ភិក្ខុំ ព្យត្តំ វិនយធរំ បរិបុច្ឆិស្សាមី’’តិ ភណន្តោ ទ្វេ អាបត្តិយោ អាបជ្ជតិ។ ភណតិ, បយោគេ ទុក្កដំ; ភណិតេ អាបត្តិ បាចិត្តិយស្ស។
172. Bhikkhūhi sahadhammikaṃ vuccamāno – ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchissāmī’’ti bhaṇanto dve āpattiyo āpajjati. Bhaṇati, payoge dukkaṭaṃ; bhaṇite āpatti pācittiyassa.
វិនយំ វិវណ្ណេន្តោ ទ្វេ អាបត្តិយោ អាបជ្ជតិ។ វិវណ្ណេតិ, បយោគេ ទុក្កដំ; វិវណ្ណិតេ អាបត្តិ បាចិត្តិយស្ស។
Vinayaṃ vivaṇṇento dve āpattiyo āpajjati. Vivaṇṇeti, payoge dukkaṭaṃ; vivaṇṇite āpatti pācittiyassa.
មោហេន្តោ ទ្វេ អាបត្តិយោ អាបជ្ជតិ។ អនារោបិតេ មោហេ មោហេតិ, អាបត្តិ ទុក្កដស្ស; អារោបិតេ មោហេ មោហេតិ, អាបត្តិ បាចិត្តិយស្ស។
Mohento dve āpattiyo āpajjati. Anāropite mohe moheti, āpatti dukkaṭassa; āropite mohe moheti, āpatti pācittiyassa.
ភិក្ខុស្ស កុបិតោ អនត្តមនោ បហារំ ទេន្តោ ទ្វេ អាបត្តិយោ អាបជ្ជតិ។ បហរតិ, បយោគេ ទុក្កដំ; បហតេ អាបត្តិ បាចិត្តិយស្ស ។
Bhikkhussa kupito anattamano pahāraṃ dento dve āpattiyo āpajjati. Paharati, payoge dukkaṭaṃ; pahate āpatti pācittiyassa .
ភិក្ខុស្ស កុបិតោ អនត្តមនោ តលសត្តិកំ ឧគ្គិរន្តោ ទ្វេ អាបត្តិយោ អាបជ្ជតិ។ ឧគ្គិរតិ, បយោគេ ទុក្កដំ; ឧគ្គិរិតេ អាបត្តិ បាចិត្តិយស្ស។
Bhikkhussa kupito anattamano talasattikaṃ uggiranto dve āpattiyo āpajjati. Uggirati, payoge dukkaṭaṃ; uggirite āpatti pācittiyassa.
ភិក្ខុំ អមូលកេន សង្ឃាទិសេសេន អនុទ្ធំសេន្តោ ទ្វេ អាបត្តិយោ អាបជ្ជតិ។ អនុទ្ធំសេតិ, បយោគេ ទុក្កដំ; អនុទ្ធំសិតេ អាបត្តិ បាចិត្តិយស្ស។
Bhikkhuṃ amūlakena saṅghādisesena anuddhaṃsento dve āpattiyo āpajjati. Anuddhaṃseti, payoge dukkaṭaṃ; anuddhaṃsite āpatti pācittiyassa.
ភិក្ខុស្ស សញ្ចិច្ច កុក្កុច្ចំ ឧបទហន្តោ ទ្វេ អាបត្តិយោ អាបជ្ជតិ។ ឧបទហតិ, បយោគេ ទុក្កដំ; ឧបទហិតេ អាបត្តិ បាចិត្តិយស្ស។
Bhikkhussa sañcicca kukkuccaṃ upadahanto dve āpattiyo āpajjati. Upadahati, payoge dukkaṭaṃ; upadahite āpatti pācittiyassa.
ភិក្ខូនំ ភណ្ឌនជាតានំ កលហជាតានំ វិវាទាបន្នានំ ឧបស្សុតិំ តិដ្ឋន្តោ ទ្វេ អាបត្តិយោ អាបជ្ជតិ។ ‘‘សោស្សាមី’’តិ គច្ឆតិ, អាបត្តិ ទុក្កដស្ស; យត្ថ ឋិតោ សុណាតិ, អាបត្តិ បាចិត្តិយស្ស។
Bhikkhūnaṃ bhaṇḍanajātānaṃ kalahajātānaṃ vivādāpannānaṃ upassutiṃ tiṭṭhanto dve āpattiyo āpajjati. ‘‘Sossāmī’’ti gacchati, āpatti dukkaṭassa; yattha ṭhito suṇāti, āpatti pācittiyassa.
ធម្មិកានំ កម្មានំ ឆន្ទំ ទត្វា បច្ឆា ខីយនធម្មំ អាបជ្ជន្តោ ទ្វេ អាបត្តិយោ អាបជ្ជតិ។ ខិយ្យតិ, បយោគេ ទុក្កដំ; ខិយ្យិតេ អាបត្តិ បាចិត្តិយស្ស។
Dhammikānaṃ kammānaṃ chandaṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
សង្ឃេ វិនិច្ឆយកថាយ វត្តមានាយ ឆន្ទំ អទត្វា ឧដ្ឋាយាសនា បក្កមន្តោ ទ្វេ អាបត្តិយោ អាបជ្ជតិ។ បរិសាយ ហត្ថបាសំ វិជហន្តស្ស អាបត្តិ ទុក្កដស្ស; វិជហិតេ អាបត្តិ បាចិត្តិយស្ស។
Saṅghe vinicchayakathāya vattamānāya chandaṃ adatvā uṭṭhāyāsanā pakkamanto dve āpattiyo āpajjati. Parisāya hatthapāsaṃ vijahantassa āpatti dukkaṭassa; vijahite āpatti pācittiyassa.
សមគ្គេន សង្ឃេន ចីវរំ ទត្វា បច្ឆា ខីយនធម្មំ អាបជ្ជន្តោ ទ្វេ អាបត្តិយោ អាបជ្ជតិ។ ខិយ្យតិ, បយោគេ ទុក្កដំ; ខិយ្យិតេ អាបត្តិ បាចិត្តិយស្ស។
Samaggena saṅghena cīvaraṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
ជានំ សង្ឃិកំ លាភំ បរិណតំ បុគ្គលស្ស បរិណាមេន្តោ ទ្វេ អាបត្តិយោ អាបជ្ជតិ។ បរិណាមេតិ, បយោគេ ទុក្កដំ; បរិណាមិតេ អាបត្តិ បាចិត្តិយស្ស។
Jānaṃ saṅghikaṃ lābhaṃ pariṇataṃ puggalassa pariṇāmento dve āpattiyo āpajjati. Pariṇāmeti, payoge dukkaṭaṃ; pariṇāmite āpatti pācittiyassa.
សហធម្មិកវគ្គោ អដ្ឋមោ។
Sahadhammikavaggo aṭṭhamo.
