| Library / Tipiṭaka / તિપિટક • Tipiṭaka / પરિવારપાળિ • Parivārapāḷi |
૮. સહધમ્મિકવગ્ગો
8. Sahadhammikavaggo
૧૭૨. ભિક્ખૂહિ સહધમ્મિકં વુચ્ચમાનો – ‘‘ન તાવાહં, આવુસો, એતસ્મિં સિક્ખાપદે સિક્ખિસ્સામિ યાવ ન અઞ્ઞં ભિક્ખું બ્યત્તં વિનયધરં પરિપુચ્છિસ્સામી’’તિ ભણન્તો દ્વે આપત્તિયો આપજ્જતિ. ભણતિ, પયોગે દુક્કટં; ભણિતે આપત્તિ પાચિત્તિયસ્સ.
172. Bhikkhūhi sahadhammikaṃ vuccamāno – ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchissāmī’’ti bhaṇanto dve āpattiyo āpajjati. Bhaṇati, payoge dukkaṭaṃ; bhaṇite āpatti pācittiyassa.
વિનયં વિવણ્ણેન્તો દ્વે આપત્તિયો આપજ્જતિ. વિવણ્ણેતિ, પયોગે દુક્કટં; વિવણ્ણિતે આપત્તિ પાચિત્તિયસ્સ.
Vinayaṃ vivaṇṇento dve āpattiyo āpajjati. Vivaṇṇeti, payoge dukkaṭaṃ; vivaṇṇite āpatti pācittiyassa.
મોહેન્તો દ્વે આપત્તિયો આપજ્જતિ. અનારોપિતે મોહે મોહેતિ, આપત્તિ દુક્કટસ્સ; આરોપિતે મોહે મોહેતિ, આપત્તિ પાચિત્તિયસ્સ.
Mohento dve āpattiyo āpajjati. Anāropite mohe moheti, āpatti dukkaṭassa; āropite mohe moheti, āpatti pācittiyassa.
ભિક્ખુસ્સ કુપિતો અનત્તમનો પહારં દેન્તો દ્વે આપત્તિયો આપજ્જતિ. પહરતિ, પયોગે દુક્કટં; પહતે આપત્તિ પાચિત્તિયસ્સ .
Bhikkhussa kupito anattamano pahāraṃ dento dve āpattiyo āpajjati. Paharati, payoge dukkaṭaṃ; pahate āpatti pācittiyassa .
ભિક્ખુસ્સ કુપિતો અનત્તમનો તલસત્તિકં ઉગ્ગિરન્તો દ્વે આપત્તિયો આપજ્જતિ. ઉગ્ગિરતિ, પયોગે દુક્કટં; ઉગ્ગિરિતે આપત્તિ પાચિત્તિયસ્સ.
Bhikkhussa kupito anattamano talasattikaṃ uggiranto dve āpattiyo āpajjati. Uggirati, payoge dukkaṭaṃ; uggirite āpatti pācittiyassa.
ભિક્ખું અમૂલકેન સઙ્ઘાદિસેસેન અનુદ્ધંસેન્તો દ્વે આપત્તિયો આપજ્જતિ. અનુદ્ધંસેતિ, પયોગે દુક્કટં; અનુદ્ધંસિતે આપત્તિ પાચિત્તિયસ્સ.
Bhikkhuṃ amūlakena saṅghādisesena anuddhaṃsento dve āpattiyo āpajjati. Anuddhaṃseti, payoge dukkaṭaṃ; anuddhaṃsite āpatti pācittiyassa.
ભિક્ખુસ્સ સઞ્ચિચ્ચ કુક્કુચ્ચં ઉપદહન્તો દ્વે આપત્તિયો આપજ્જતિ. ઉપદહતિ, પયોગે દુક્કટં; ઉપદહિતે આપત્તિ પાચિત્તિયસ્સ.
Bhikkhussa sañcicca kukkuccaṃ upadahanto dve āpattiyo āpajjati. Upadahati, payoge dukkaṭaṃ; upadahite āpatti pācittiyassa.
ભિક્ખૂનં ભણ્ડનજાતાનં કલહજાતાનં વિવાદાપન્નાનં ઉપસ્સુતિં તિટ્ઠન્તો દ્વે આપત્તિયો આપજ્જતિ. ‘‘સોસ્સામી’’તિ ગચ્છતિ, આપત્તિ દુક્કટસ્સ; યત્થ ઠિતો સુણાતિ, આપત્તિ પાચિત્તિયસ્સ.
Bhikkhūnaṃ bhaṇḍanajātānaṃ kalahajātānaṃ vivādāpannānaṃ upassutiṃ tiṭṭhanto dve āpattiyo āpajjati. ‘‘Sossāmī’’ti gacchati, āpatti dukkaṭassa; yattha ṭhito suṇāti, āpatti pācittiyassa.
ધમ્મિકાનં કમ્માનં છન્દં દત્વા પચ્છા ખીયનધમ્મં આપજ્જન્તો દ્વે આપત્તિયો આપજ્જતિ. ખિય્યતિ, પયોગે દુક્કટં; ખિય્યિતે આપત્તિ પાચિત્તિયસ્સ.
Dhammikānaṃ kammānaṃ chandaṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
સઙ્ઘે વિનિચ્છયકથાય વત્તમાનાય છન્દં અદત્વા ઉટ્ઠાયાસના પક્કમન્તો દ્વે આપત્તિયો આપજ્જતિ. પરિસાય હત્થપાસં વિજહન્તસ્સ આપત્તિ દુક્કટસ્સ; વિજહિતે આપત્તિ પાચિત્તિયસ્સ.
Saṅghe vinicchayakathāya vattamānāya chandaṃ adatvā uṭṭhāyāsanā pakkamanto dve āpattiyo āpajjati. Parisāya hatthapāsaṃ vijahantassa āpatti dukkaṭassa; vijahite āpatti pācittiyassa.
સમગ્ગેન સઙ્ઘેન ચીવરં દત્વા પચ્છા ખીયનધમ્મં આપજ્જન્તો દ્વે આપત્તિયો આપજ્જતિ. ખિય્યતિ, પયોગે દુક્કટં; ખિય્યિતે આપત્તિ પાચિત્તિયસ્સ.
Samaggena saṅghena cīvaraṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
જાનં સઙ્ઘિકં લાભં પરિણતં પુગ્ગલસ્સ પરિણામેન્તો દ્વે આપત્તિયો આપજ્જતિ. પરિણામેતિ, પયોગે દુક્કટં; પરિણામિતે આપત્તિ પાચિત્તિયસ્સ.
Jānaṃ saṅghikaṃ lābhaṃ pariṇataṃ puggalassa pariṇāmento dve āpattiyo āpajjati. Pariṇāmeti, payoge dukkaṭaṃ; pariṇāmite āpatti pācittiyassa.
સહધમ્મિકવગ્ગો અટ્ઠમો.
Sahadhammikavaggo aṭṭhamo.
