| Library / Tipiṭaka / തിപിടക • Tipiṭaka / കങ്ഖാവിതരണീ-അഭിനവ-ടീകാ • Kaṅkhāvitaraṇī-abhinava-ṭīkā |
൮. സഹധമ്മികവഗ്ഗോ
8. Sahadhammikavaggo
൧. സഹധമ്മികസിക്ഖാപദവണ്ണനാ
1. Sahadhammikasikkhāpadavaṇṇanā
സഹധമ്മികം വുച്ചമാനോതി സഹധമ്മികേന വുച്ചമാനോ. കരണത്ഥേ ചേതം ഉപയോഗവചനം. ‘‘പഞ്ചഹി സഹധമ്മികേഹി സിക്ഖിതബ്ബത്താ, തേസം വാ സന്തകത്താ ‘സഹധമ്മിക’ന്തി ലദ്ധനാമേന ബുദ്ധപഞ്ഞത്തേന സിക്ഖാപദേന വുച്ചമാനോതി അത്ഥോ’’തി (കങ്ഖാ॰ അട്ഠ॰ ദുബ്ബചസിക്ഖാപദവണ്ണനാ; പാരാ॰ അട്ഠ॰ ൨.൪൨൫-൪൨൬) ദുബ്ബചസിക്ഖാപദേ വുത്തത്താ ‘‘സഹധമ്മികം വുച്ചമാനോതി ഇമസ്സത്ഥോ ദുബ്ബചസിക്ഖാപദേ വുത്തോ’’തി വുത്തം. അനാദരിയഭയാതി അനാദരകരണേ ഭയാ, തത്ഥ പാചിത്തിയഭയാതി അത്ഥോ. ലേസേന ഏവം വദന്തസ്സാതി ഉജുകം ‘‘ന സിക്ഖിസ്സാമീ’’തി അവത്വാ ‘‘യാവ ന അഞ്ഞം ഭിക്ഖു’’ന്തിആദിനാ ലേസേന വദന്തസ്സ.
Sahadhammikaṃ vuccamānoti sahadhammikena vuccamāno. Karaṇatthe cetaṃ upayogavacanaṃ. ‘‘Pañcahi sahadhammikehi sikkhitabbattā, tesaṃ vā santakattā ‘sahadhammika’nti laddhanāmena buddhapaññattena sikkhāpadena vuccamānoti attho’’ti (kaṅkhā. aṭṭha. dubbacasikkhāpadavaṇṇanā; pārā. aṭṭha. 2.425-426) dubbacasikkhāpade vuttattā ‘‘sahadhammikaṃ vuccamānoti imassattho dubbacasikkhāpade vutto’’ti vuttaṃ. Anādariyabhayāti anādarakaraṇe bhayā, tattha pācittiyabhayāti attho. Lesena evaṃ vadantassāti ujukaṃ ‘‘na sikkhissāmī’’ti avatvā ‘‘yāva na aññaṃ bhikkhu’’ntiādinā lesena vadantassa.
സഹധമ്മികസിക്ഖാപദവണ്ണനാ നിട്ഠിതാ.
Sahadhammikasikkhāpadavaṇṇanā niṭṭhitā.
