| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༨. སཧདྷམྨིཀཝགྒོ
8. Sahadhammikavaggo
༡. སཧདྷམྨིཀསིཀྑཱཔདཝཎྞནཱ
1. Sahadhammikasikkhāpadavaṇṇanā
སཧདྷམྨིཀཾ ཝུཙྩམཱནོཏི སཧདྷམྨིཀེན ཝུཙྩམཱནོ། ཀརཎཏྠེ ཙེཏཾ ཨུཔཡོགཝཙནཾ། ‘‘པཉྩཧི སཧདྷམྨིཀེཧི སིཀྑིཏབྦཏྟཱ, ཏེསཾ ཝཱ སནྟཀཏྟཱ ‘སཧདྷམྨིཀ’ནྟི ལདྡྷནཱམེན བུདྡྷཔཉྙཏྟེན སིཀྑཱཔདེན ཝུཙྩམཱནོཏི ཨཏྠོ’’ཏི (ཀངྑཱ॰ ཨཊྛ॰ དུབྦཙསིཀྑཱཔདཝཎྞནཱ; པཱརཱ॰ ཨཊྛ॰ ༢.༤༢༥-༤༢༦) དུབྦཙསིཀྑཱཔདེ ཝུཏྟཏྟཱ ‘‘སཧདྷམྨིཀཾ ཝུཙྩམཱནོཏི ཨིམསྶཏྠོ དུབྦཙསིཀྑཱཔདེ ཝུཏྟོ’’ཏི ཝུཏྟཾ། ཨནཱདརིཡབྷཡཱཏི ཨནཱདརཀརཎེ བྷཡཱ, ཏཏྠ པཱཙིཏྟིཡབྷཡཱཏི ཨཏྠོ། ལེསེན ཨེཝཾ ཝདནྟསྶཱཏི ཨུཛུཀཾ ‘‘ན སིཀྑིསྶཱམཱི’’ཏི ཨཝཏྭཱ ‘‘ཡཱཝ ན ཨཉྙཾ བྷིཀྑུ’’ནྟིཨཱདིནཱ ལེསེན ཝདནྟསྶ།
Sahadhammikaṃ vuccamānoti sahadhammikena vuccamāno. Karaṇatthe cetaṃ upayogavacanaṃ. ‘‘Pañcahi sahadhammikehi sikkhitabbattā, tesaṃ vā santakattā ‘sahadhammika’nti laddhanāmena buddhapaññattena sikkhāpadena vuccamānoti attho’’ti (kaṅkhā. aṭṭha. dubbacasikkhāpadavaṇṇanā; pārā. aṭṭha. 2.425-426) dubbacasikkhāpade vuttattā ‘‘sahadhammikaṃ vuccamānoti imassattho dubbacasikkhāpade vutto’’ti vuttaṃ. Anādariyabhayāti anādarakaraṇe bhayā, tattha pācittiyabhayāti attho. Lesena evaṃ vadantassāti ujukaṃ ‘‘na sikkhissāmī’’ti avatvā ‘‘yāva na aññaṃ bhikkhu’’ntiādinā lesena vadantassa.
སཧདྷམྨིཀསིཀྑཱཔདཝཎྞནཱ ནིཊྛིཏཱ།
Sahadhammikasikkhāpadavaṇṇanā niṭṭhitā.
