| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៦. សគាថាសុត្តវណ្ណនា
6. Sagāthāsuttavaṇṇanā
១០០. ឆដ្ឋេ គូថោ គូថេន សំសន្ទតិ សមេតីតិ សមុទ្ទន្តរេ ជនបទន្តរេ ចក្កវាឡន្តរេ ឋិតោបិ វណ្ណេនបិ គន្ធេនបិ រសេនបិ នានត្តំ អនុបគច្ឆន្តោ សំសន្ទតិ សមេតិ, ឯកសទិសោវ ហោតិ និរន្តរោ។ សេសេសុបិ ឯសេវ នយោ។ អយំ បន អនិដ្ឋឧបមា ហីនជ្ឈាសយានំ ហីនអជ្ឈាសយស្ស សរិក្ខភាវទស្សនត្ថំ អាហដា, ខីរាទិវិសិដ្ឋោបមា កល្យាណជ្ឈាសយានំ អជ្ឈាសយស្ស សរិក្ខភាវទស្សនត្ថំ។
100. Chaṭṭhe gūtho gūthena saṃsandati sametīti samuddantare janapadantare cakkavāḷantare ṭhitopi vaṇṇenapi gandhenapi rasenapi nānattaṃ anupagacchanto saṃsandati sameti, ekasadisova hoti nirantaro. Sesesupi eseva nayo. Ayaṃ pana aniṭṭhaupamā hīnajjhāsayānaṃ hīnaajjhāsayassa sarikkhabhāvadassanatthaṃ āhaṭā, khīrādivisiṭṭhopamā kalyāṇajjhāsayānaṃ ajjhāsayassa sarikkhabhāvadassanatthaṃ.
សំសគ្គាតិ ទស្សនសវនសំសគ្គាទិវត្ថុកេន តណ្ហាស្នេហេន។ វនថោ ជាតោតិ កិលេសវនំ ជាតំ ។ អសំសគ្គេន ឆិជ្ជតីតិ ឯកតោ ឋាននិសជ្ជាទីនិ អករោន្តស្ស អសំសគ្គេន អទស្សនេន ឆិជ្ជតិ។ សាធុជីវីតិ បរិសុទ្ធជីវិតំ ជីវមានោ។ សហាវសេតិ សហវាសំ វសេយ្យ។ ឆដ្ឋំ។
Saṃsaggāti dassanasavanasaṃsaggādivatthukena taṇhāsnehena. Vanatho jātoti kilesavanaṃ jātaṃ . Asaṃsaggena chijjatīti ekato ṭhānanisajjādīni akarontassa asaṃsaggena adassanena chijjati. Sādhujīvīti parisuddhajīvitaṃ jīvamāno. Sahāvaseti sahavāsaṃ vaseyya. Chaṭṭhaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៦. សគាថាសុត្តំ • 6. Sagāthāsuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៦. សគាថាសុត្តវណ្ណនា • 6. Sagāthāsuttavaṇṇanā
