| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
१०. सगाथकसुत्तं
10. Sagāthakasuttaṃ
१६६. सावत्थियं विहरति…पे॰… ‘‘दारुणो, भिक्खवे, लाभसक्कारसिलोको…पे॰… अधिगमाय। इधाहं, भिक्खवे, एकच्चं पुग्गलं पस्सामि सक्कारेन अभिभूतं परियादिण्णचित्तं, कायस्स भेदा परं मरणा अपायं दुग्गतिं विनिपातं निरयं उपपन्नं। इध पनाहं, भिक्खवे , एकच्चं पुग्गलं पस्सामि असक्कारेन अभिभूतं परियादिण्णचित्तं, कायस्स भेदा परं मरणा अपायं दुग्गतिं विनिपातं निरयं उपपन्नं। इध पनाहं, भिक्खवे, एकच्चं पुग्गलं पस्सामि सक्कारेन च असक्कारेन च तदुभयेन अभिभूतं परियादिण्णचित्तं, कायस्स भेदा परं मरणा अपायं दुग्गतिं विनिपातं निरयं उपपन्नं। एवं दारुणो खो, भिक्खवे, लाभसक्कारसिलोको…पे॰… एवञ्हि वो, भिक्खवे, सिक्खितब्ब’’न्ति।
166. Sāvatthiyaṃ viharati…pe… ‘‘dāruṇo, bhikkhave, lābhasakkārasiloko…pe… adhigamāya. Idhāhaṃ, bhikkhave, ekaccaṃ puggalaṃ passāmi sakkārena abhibhūtaṃ pariyādiṇṇacittaṃ, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannaṃ. Idha panāhaṃ, bhikkhave , ekaccaṃ puggalaṃ passāmi asakkārena abhibhūtaṃ pariyādiṇṇacittaṃ, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannaṃ. Idha panāhaṃ, bhikkhave, ekaccaṃ puggalaṃ passāmi sakkārena ca asakkārena ca tadubhayena abhibhūtaṃ pariyādiṇṇacittaṃ, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannaṃ. Evaṃ dāruṇo kho, bhikkhave, lābhasakkārasiloko…pe… evañhi vo, bhikkhave, sikkhitabba’’nti.
इदमवोच भगवा। इदं वत्वान सुगतो अथापरं एतदवोच सत्था –
Idamavoca bhagavā. Idaṃ vatvāna sugato athāparaṃ etadavoca satthā –
‘‘यस्स सक्करियमानस्स, असक्कारेन चूभयं।
‘‘Yassa sakkariyamānassa, asakkārena cūbhayaṃ;
‘‘तं झायिनं साततिकं, सुखुमं दिट्ठिविपस्सकं।
‘‘Taṃ jhāyinaṃ sātatikaṃ, sukhumaṃ diṭṭhivipassakaṃ;
उपादानक्खयारामं, आहु सप्पुरिसो इती’’ति॥ दसमं।
Upādānakkhayārāmaṃ, āhu sappuriso itī’’ti. dasamaṃ;
पठमो वग्गो।
Paṭhamo vaggo.
तस्सुद्दानं –
Tassuddānaṃ –
दारुणो बळिसं कुम्मं, दीघलोमि च मीळ्हकं।
Dāruṇo baḷisaṃ kummaṃ, dīghalomi ca mīḷhakaṃ;
असनि दिद्धं सिङ्गालं, वेरम्भेन सगाथकन्ति॥
Asani diddhaṃ siṅgālaṃ, verambhena sagāthakanti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १०. सगाथकसुत्तवण्णना • 10. Sagāthakasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १०. सगाथकसुत्तवण्णना • 10. Sagāthakasuttavaṇṇanā
