| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១២. ទ្វាទសមវគ្គោ
12. Dvādasamavaggo
(១១៨) ៣. សទ្ទោ វិបាកោតិកថា
(118) 3. Saddo vipākotikathā
៦៣៦. សទ្ទោ វិបាកោតិ? អាមន្តា។ សុខវេទនិយោ ទុក្ខវេទនិយោ អទុក្ខមសុខវេទនិយោ, សុខាយ វេទនាយ សម្បយុត្តោ, ទុក្ខាយ វេទនាយ សម្បយុត្តោ , អទុក្ខមសុខាយ វេទនាយ សម្បយុត្តោ, ផស្សេន សម្បយុត្តោ, វេទនាយ សម្បយុត្តោ, សញ្ញាយ សម្បយុត្តោ, ចេតនាយ សម្បយុត្តោ, ចិត្តេន សម្បយុត្តោ, សារម្មណោ; អត្ថិ តស្ស អាវដ្ដនា អាភោគោ សមន្នាហារោ មនសិការោ ចេតនា បត្ថនា បណិធីតិ? ន ហេវំ វត្តព្ពេ…បេ.… ននុ ន សុខវេទនិយោ ន ទុក្ខវេទនិយោ…បេ.… អនារម្មណោ, នត្ថិ តស្ស អាវដ្ដនា…បេ.… បណិធីតិ? អាមន្តា។ ហញ្ចិ ន សុខវេទនិយោ…បេ.… អនារម្មណោ, នត្ថិ តស្ស អាវដ្ដនា…បេ.… បណិធិ, នោ ច វត រេ វត្តព្ពេ – ‘‘សទ្ទោ វិបាកោ’’តិ។
636. Saddo vipākoti? Āmantā. Sukhavedaniyo dukkhavedaniyo adukkhamasukhavedaniyo, sukhāya vedanāya sampayutto, dukkhāya vedanāya sampayutto , adukkhamasukhāya vedanāya sampayutto, phassena sampayutto, vedanāya sampayutto, saññāya sampayutto, cetanāya sampayutto, cittena sampayutto, sārammaṇo; atthi tassa āvaṭṭanā ābhogo samannāhāro manasikāro cetanā patthanā paṇidhīti? Na hevaṃ vattabbe…pe… nanu na sukhavedaniyo na dukkhavedaniyo…pe… anārammaṇo, natthi tassa āvaṭṭanā…pe… paṇidhīti? Āmantā. Hañci na sukhavedaniyo…pe… anārammaṇo, natthi tassa āvaṭṭanā…pe… paṇidhi, no ca vata re vattabbe – ‘‘saddo vipāko’’ti.
ផស្សោ វិបាកោ, ផស្សោ សុខវេទនិយោ…បេ.… សារម្មណោ, អត្ថិ តស្ស អាវដ្ដនា…បេ.… បណិធីតិ? អាមន្តា។ សទ្ទោ វិបាកោ, សទ្ទោ សុខវេទនិយោ…បេ.… សារម្មណោ, អត្ថិ តស្ស អាវដ្ដនា…បេ.… បណិធីតិ? ន ហេវំ វត្តព្ពេ…បេ.…។
Phasso vipāko, phasso sukhavedaniyo…pe… sārammaṇo, atthi tassa āvaṭṭanā…pe… paṇidhīti? Āmantā. Saddo vipāko, saddo sukhavedaniyo…pe… sārammaṇo, atthi tassa āvaṭṭanā…pe… paṇidhīti? Na hevaṃ vattabbe…pe….
សទ្ទោ វិបាកោ, សទ្ទោ ន សុខវេទនិយោ…បេ.… អនារម្មណោ, នត្ថិ តស្ស អាវដ្ដនា…បេ.… បណិធីតិ? អាមន្តា។ ផស្សោ វិបាកោ, ផស្សោ ន សុខវេទនិយោ, ន ទុក្ខវេទនិយោ…បេ.… អនារម្មណោ, នត្ថិ តស្ស អាវដ្ដនា…បេ.… បណិធីតិ? ន ហេវំ វត្តព្ពេ…បេ.…។
Saddo vipāko, saddo na sukhavedaniyo…pe… anārammaṇo, natthi tassa āvaṭṭanā…pe… paṇidhīti? Āmantā. Phasso vipāko, phasso na sukhavedaniyo, na dukkhavedaniyo…pe… anārammaṇo, natthi tassa āvaṭṭanā…pe… paṇidhīti? Na hevaṃ vattabbe…pe….
៦៣៧. ន វត្តព្ពំ – ‘‘សទ្ទោ វិបាកោ’’តិ? អាមន្តា។ ននុ វុត្តំ ភគវតា – ‘‘សោ តស្ស កម្មស្ស កតត្តា ឧបចិតត្តា ឧស្សន្នត្តា វិបុលត្តា ព្រហ្មស្សរោ ហោតិ ករវិកភាណី’’តិ 1! អត្ថេវ សុត្តន្តោតិ? អាមន្តា ។ តេន ហិ សទ្ទោ វិបាកោតិ។
637. Na vattabbaṃ – ‘‘saddo vipāko’’ti? Āmantā. Nanu vuttaṃ bhagavatā – ‘‘so tassa kammassa katattā upacitattā ussannattā vipulattā brahmassaro hoti karavikabhāṇī’’ti 2! Attheva suttantoti? Āmantā . Tena hi saddo vipākoti.
សទ្ទោ វិបាកោតិកថា និដ្ឋិតា។
Saddo vipākotikathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៣. សទ្ទោ វិបាកោតិកថាវណ្ណនា • 3. Saddo vipākotikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៣. សទ្ទោវិបាកោតិកថាវណ្ណនា • 3. Saddovipākotikathāvaṇṇanā
