| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
13. сад̣̇д̇хаммаббад̇ируубагасуд̇д̇аван̣н̣анаа
13. Saddhammappatirūpakasuttavaṇṇanā
156. д̇зрасамз ан̃н̃ааяа сан̣тахим̣сууд̇и арахад̇д̇з бад̇идтахим̣су. сад̣̇д̇хаммаббад̇ируубаганд̇и д̣̇вз сад̣̇д̇хаммаббад̇ируубагаани ад̇хиг̇амасад̣̇д̇хаммаббад̇ируубаган̃жа барияад̇д̇исад̣̇д̇хаммаббад̇ируубаган̃жа. д̇ад̇т̇а –
156. Terasame aññāya saṇṭhahiṃsūti arahatte patiṭṭhahiṃsu. Saddhammappatirūpakanti dve saddhammappatirūpakāni adhigamasaddhammappatirūpakañca pariyattisaddhammappatirūpakañca. Tattha –
‘‘обхаасз жзва н̃аан̣з жа, бийд̇ияаа жа вигамбад̇и;
‘‘Obhāse ceva ñāṇe ca, pītiyā ca vikampati;
бассад̣̇д̇хияаа сукз жзва, язхи жид̇д̇ам̣ бавзд̇хад̇и.
Passaddhiyā sukhe ceva, yehi cittaṃ pavedhati.
‘‘ад̇химогкз жа баг̇г̇аахз, убадтаанз жа гамбад̇и;
‘‘Adhimokkhe ca paggāhe, upaṭṭhāne ca kampati;
убзгкааваж̇ж̇анааяа жзва, убзгкааяа жа ниганд̇ияаа.
Upekkhāvajjanāya ceva, upekkhāya ca nikantiyā.
‘‘имаани д̣̇аса таанаани, бан̃н̃аа яасса барижид̇аа;
‘‘Imāni dasa ṭhānāni, paññā yassa paricitā;
д̇хаммуд̣̇д̇хажжагусало ход̇и, на жа саммоха г̇ажчад̇ий’’д̇и. (бади. ма. 2.7); –
Dhammuddhaccakusalo hoti, na ca sammoha gacchatī’’ti. (paṭi. ma. 2.7); –
ид̣̇ам̣ вибассанаан̃аан̣асса убаггилзсаж̇аад̇ам̣ ад̇хиг̇амасад̣̇д̇хаммаббад̇ируубагам̣ наама. д̇иссо бана сан̇г̇ийд̇ияо анаарул̣хам̣ д̇хаад̇угат̇аа аарамман̣агат̇аа асубхагат̇аа н̃аан̣авад̇т̇угат̇аа виж̇ж̇аагаран̣д̣агод̇и имзхи бан̃жахи гат̇аавад̇т̇уухи бариб̣аахирам̣ г̇ул̣хавинаяам̣ г̇ул̣хавзссанд̇арам̣ г̇ул̣хамахосад̇хам̣ ван̣н̣абидагам̣ ан̇г̇улимаалабидагам̣ радтабаалаг̇аж̇ж̇ид̇ам̣ аал̣авагаг̇аж̇ж̇ид̇ам̣ взд̣̇аллабидаганд̇и аб̣уд̣̇д̇хаважанам̣ барияад̇д̇исад̣̇д̇хаммаббад̇ируубагам̣ наама.
Idaṃ vipassanāñāṇassa upakkilesajātaṃ adhigamasaddhammappatirūpakaṃ nāma. Tisso pana saṅgītiyo anāruḷhaṃ dhātukathā ārammaṇakathā asubhakathā ñāṇavatthukathā vijjākaraṇḍakoti imehi pañcahi kathāvatthūhi paribāhiraṃ guḷhavinayaṃ guḷhavessantaraṃ guḷhamahosadhaṃ vaṇṇapiṭakaṃ aṅgulimālapiṭakaṃ raṭṭhapālagajjitaṃ āḷavakagajjitaṃ vedallapiṭakanti abuddhavacanaṃ pariyattisaddhammappatirūpakaṃ nāma.
ж̇аад̇аруубаббад̇ируубаганд̇и суван̣н̣арасавид̇хаанам̣ аарагуудамаяам̣ суван̣н̣аван̣н̣ам̣ аабхаран̣аж̇аад̇ам̣. чан̣агаалзсу хи мануссаа ‘‘аабхаран̣абхан̣д̣агам̣ г̇ан̣хиссаамаа’’д̇и аабан̣ам̣ г̇ажчанд̇и. ат̇а нз аабан̣игаа звам̣ вад̣̇анд̇и, ‘‘сажз д̇умхз аабхаран̣ад̇т̇игаа, имаани г̇ан̣хат̇а. имаани хи гханаани жзва ван̣н̣аванд̇аани жа аббаг̇гхаани жаа’’д̇и. д̇з д̇зсам̣ суд̇ваа, ‘‘гааран̣ам̣ имз вад̣̇анд̇и, имаани бил̣анд̇хид̇ваа саггаа нагкад̇д̇ам̣ гийл̣ид̇ум̣, собханд̇и жзва аббаг̇гхаани жаа’’д̇и д̇аани г̇ахзд̇ваа г̇ажчанд̇и. суван̣н̣абхан̣д̣ам̣ авиггияамаанам̣ нид̣̇ахид̇ваа табзд̇аб̣б̣ам̣ ход̇и. звам̣ д̇ам̣ ж̇аад̇аруубаббад̇ируубагз уббаннз анд̇арад̇хааяад̇и наама.
Jātarūpappatirūpakanti suvaṇṇarasavidhānaṃ ārakūṭamayaṃ suvaṇṇavaṇṇaṃ ābharaṇajātaṃ. Chaṇakālesu hi manussā ‘‘ābharaṇabhaṇḍakaṃ gaṇhissāmā’’ti āpaṇaṃ gacchanti. Atha ne āpaṇikā evaṃ vadanti, ‘‘sace tumhe ābharaṇatthikā, imāni gaṇhatha. Imāni hi ghanāni ceva vaṇṇavantāni ca appagghāni cā’’ti. Te tesaṃ sutvā, ‘‘kāraṇaṃ ime vadanti, imāni piḷandhitvā sakkā nakkhattaṃ kīḷituṃ, sobhanti ceva appagghāni cā’’ti tāni gahetvā gacchanti. Suvaṇṇabhaṇḍaṃ avikkiyamānaṃ nidahitvā ṭhapetabbaṃ hoti. Evaṃ taṃ jātarūpappatirūpake uppanne antaradhāyati nāma.
ат̇а сад̣̇д̇хаммасса анд̇арад̇хаанам̣ ход̇ийд̇и ад̇хиг̇амасад̣̇д̇хаммасса бадибад̇д̇исад̣̇д̇хаммасса барияад̇д̇исад̣̇д̇хаммассаад̇и д̇ивид̇хассааби сад̣̇д̇хаммасса анд̇арад̇хаанам̣ ход̇и. батамаб̣од̇хияан̃хи бхигкуу бадисамбхид̣̇аббад̇д̇аа ахзсум̣. ат̇а гаалз г̇ажчанд̇з бадисамбхид̣̇аа баабун̣ид̇ум̣ на сагким̣су, чал̣абхин̃н̃аа ахзсум̣. д̇ад̇о ча абхин̃н̃аа баабун̣ид̇ум̣ асаггонд̇аа д̇иссо виж̇ж̇аа баабун̣им̣су. ид̣̇аани гаалз г̇ажчанд̇з д̇иссо виж̇ж̇аа баабун̣ид̇ум̣ асаггонд̇аа аасавагкаяамад̇д̇ам̣ баабун̣иссанд̇и. д̇амби асаггонд̇аа анааг̇аамипалам̣, д̇амби асаггонд̇аа сагад̣̇ааг̇аамипалам̣, д̇амби асаггонд̇аа сод̇аабад̇д̇ипалам̣. г̇ажчанд̇з гаалз сод̇аабад̇д̇ипаламби бад̇д̇ум̣ на сагкиссанд̇и. ат̇а нзсам̣ яад̣̇аа вибассанаа имзхи убаггилзсзхи убаггилидтаа аарад̣̇д̇хамад̇д̇аава тассад̇и, д̇ад̣̇аа ад̇хиг̇амасад̣̇д̇хаммо анд̇арахид̇о наама бхависсад̇и.
Atha saddhammassa antaradhānaṃ hotīti adhigamasaddhammassa paṭipattisaddhammassa pariyattisaddhammassāti tividhassāpi saddhammassa antaradhānaṃ hoti. Paṭhamabodhiyañhi bhikkhū paṭisambhidappattā ahesuṃ. Atha kāle gacchante paṭisambhidā pāpuṇituṃ na sakkhiṃsu, chaḷabhiññā ahesuṃ. Tato cha abhiññā pāpuṇituṃ asakkontā tisso vijjā pāpuṇiṃsu. Idāni kāle gacchante tisso vijjā pāpuṇituṃ asakkontā āsavakkhayamattaṃ pāpuṇissanti. Tampi asakkontā anāgāmiphalaṃ, tampi asakkontā sakadāgāmiphalaṃ, tampi asakkontā sotāpattiphalaṃ. Gacchante kāle sotāpattiphalampi pattuṃ na sakkhissanti. Atha nesaṃ yadā vipassanā imehi upakkilesehi upakkiliṭṭhā āraddhamattāva ṭhassati, tadā adhigamasaddhammo antarahito nāma bhavissati.
батамаб̣од̇хияан̃хи бхигкуу жад̇уннам̣ бадисамбхид̣̇аанам̣ анужчавигам̣ бадибад̇д̇им̣ буураяим̣су. г̇ажчанд̇з гаалз д̇ам̣ асаггонд̇аа чаннам̣ абхин̃н̃аанам̣, д̇амби асаггонд̇аа д̇иссаннам̣ виж̇ж̇аанам̣, д̇амби асаггонд̇аа арахад̇д̇апаламад̇д̇асса. г̇ажчанд̇з бана гаалз арахад̇д̇асса анужчавигам̣ бадибад̇д̇им̣ буурзд̇ум̣ асаггонд̇аа анааг̇аамипаласса анужчавигам̣ бадибад̇д̇им̣ буурзссанд̇и , д̇амби асаггонд̇аа сагад̣̇ааг̇аамипаласса, д̇амби асаггонд̇аа сод̇аабад̇д̇ипаласса. яад̣̇аа бана сод̇аабад̇д̇ипалассаби анужчавигам̣ бадибад̣̇ам̣ буурзд̇ум̣ асаггонд̇аа сийлабаарисуд̣̇д̇химад̇д̇зва тассанд̇и, д̇ад̣̇аа бадибад̇д̇исад̣̇д̇хаммо анд̇арахид̇о наама бхависсад̇и.
Paṭhamabodhiyañhi bhikkhū catunnaṃ paṭisambhidānaṃ anucchavikaṃ paṭipattiṃ pūrayiṃsu. Gacchante kāle taṃ asakkontā channaṃ abhiññānaṃ, tampi asakkontā tissannaṃ vijjānaṃ, tampi asakkontā arahattaphalamattassa. Gacchante pana kāle arahattassa anucchavikaṃ paṭipattiṃ pūretuṃ asakkontā anāgāmiphalassa anucchavikaṃ paṭipattiṃ pūressanti , tampi asakkontā sakadāgāmiphalassa, tampi asakkontā sotāpattiphalassa. Yadā pana sotāpattiphalassapi anucchavikaṃ paṭipadaṃ pūretuṃ asakkontā sīlapārisuddhimatteva ṭhassanti, tadā paṭipattisaddhammo antarahito nāma bhavissati.
яаава бана д̇збидагам̣ б̣уд̣̇д̇хаважанам̣ вад̇д̇ад̇и, на д̇аава саасанам̣ анд̇арахид̇анд̇и вад̇д̇ум̣ ваддад̇и. д̇идтанд̇у д̇ийн̣и ваа, абхид̇хаммабидагз анд̇арахид̇з ид̇арзсу д̣̇вийсу д̇идтанд̇зсуби анд̇арахид̇анд̇и на вад̇д̇аб̣б̣амзва. д̣̇вийсу анд̇арахид̇зсу винаяабидагамад̇д̇з тид̇зби, д̇ад̇рааби канд̇хагабариваарзсу анд̇арахид̇зсу убхад̇овибхан̇г̇амад̇д̇з, махаавинаяз анд̇арахид̇з д̣̇вийсу баад̇имогкзсу вад̇д̇амаанзсуби саасанам̣ ананд̇арахид̇амзва. яад̣̇аа бана д̣̇вз баад̇имогкаа анд̇арад̇хааяиссанд̇и, ат̇а барияад̇д̇исад̣̇д̇хаммасса анд̇арад̇хаанам̣ бхависсад̇и. д̇асмим̣ анд̇арахид̇з саасанам̣ анд̇арахид̇ам̣ наама ход̇и. барияад̇д̇ияаа хи анд̇арахид̇ааяа бадибад̇д̇и анд̇арад̇хааяад̇и, бадибад̇д̇ияаа анд̇арахид̇ааяа ад̇хиг̇амо анд̇арад̇хааяад̇и. гим̣ гааран̣аа? аяан̃хи барияад̇д̇и бадибад̇д̇ияаа бажжаяо ход̇и, бадибад̇д̇и ад̇хиг̇амасса. ид̇и бадибад̇д̇ид̇оби барияад̇д̇имзва бамаан̣ам̣.
Yāva pana tepiṭakaṃ buddhavacanaṃ vattati, na tāva sāsanaṃ antarahitanti vattuṃ vaṭṭati. Tiṭṭhantu tīṇi vā, abhidhammapiṭake antarahite itaresu dvīsu tiṭṭhantesupi antarahitanti na vattabbameva. Dvīsu antarahitesu vinayapiṭakamatte ṭhitepi, tatrāpi khandhakaparivāresu antarahitesu ubhatovibhaṅgamatte, mahāvinaye antarahite dvīsu pātimokkhesu vattamānesupi sāsanaṃ anantarahitameva. Yadā pana dve pātimokkhā antaradhāyissanti, atha pariyattisaddhammassa antaradhānaṃ bhavissati. Tasmiṃ antarahite sāsanaṃ antarahitaṃ nāma hoti. Pariyattiyā hi antarahitāya paṭipatti antaradhāyati, paṭipattiyā antarahitāya adhigamo antaradhāyati. Kiṃ kāraṇā? Ayañhi pariyatti paṭipattiyā paccayo hoti, paṭipatti adhigamassa. Iti paṭipattitopi pariyattimeva pamāṇaṃ.
нану жа гассабасаммаасамб̣уд̣̇д̇хагаалз габило наама анаараад̇хагабхигку ‘‘баад̇имогкам̣ уд̣̇д̣̇исиссаамий’’д̇и б̣ийж̇аним̣ г̇ахзд̇ваа аасанз нисинно ‘‘ад̇т̇и имасмим̣ вад̇д̇анд̇аа’’д̇и бужчи, ат̇а д̇асса бхаязна язсамби баад̇имогко вад̇д̇ад̇и, д̇зби ‘‘маяам̣ вад̇д̇аамаа’’д̇и авад̇ваа ‘‘на вад̇д̇аамаа’’д̇и вад̣̇им̣су, со б̣ийж̇аним̣ табзд̇ваа удтааяаасанаа г̇ад̇о, д̇ад̣̇аа саммаасамб̣уд̣̇д̇хасса саасанам̣ осаггид̇анд̇и? гин̃жааби осаггид̇ам̣, барияад̇д̇и бана зганд̇знзва бамаан̣ам̣. яат̇аа хи махад̇о д̇ал̣аагасса баал̣ияаа т̇ирааяа уд̣̇агам̣ на тассад̇ийд̇и на вад̇д̇аб̣б̣ам̣, уд̣̇агз сад̇и бад̣̇умаад̣̇ийни бубпаани на бубписсанд̇ийд̇и на вад̇д̇аб̣б̣ам̣, звамзва махаад̇ал̣аагасса т̇ирабаал̣исад̣̇исз д̇збидагз б̣уд̣̇д̇хаважанз сад̇и махаад̇ал̣аагз уд̣̇агасад̣̇исаа бадибад̇д̇ибуурагаа гулабуд̇д̇аа над̇т̇ийд̇и на вад̇д̇аб̣б̣аа, д̇зсу сад̇и махаад̇ал̣аагз бад̣̇умаад̣̇ийни бубпаани вияа сод̇аабаннаад̣̇аяо арияабуг̇г̇алаа над̇т̇ийд̇и на вад̇д̇аб̣б̣аад̇и звам̣ зганд̇ад̇о барияад̇д̇иязва бамаан̣ам̣.
Nanu ca kassapasammāsambuddhakāle kapilo nāma anārādhakabhikkhu ‘‘pātimokkhaṃ uddisissāmī’’ti bījaniṃ gahetvā āsane nisinno ‘‘atthi imasmiṃ vattantā’’ti pucchi, atha tassa bhayena yesampi pātimokkho vattati, tepi ‘‘mayaṃ vattāmā’’ti avatvā ‘‘na vattāmā’’ti vadiṃsu, so bījaniṃ ṭhapetvā uṭṭhāyāsanā gato, tadā sammāsambuddhassa sāsanaṃ osakkitanti? Kiñcāpi osakkitaṃ, pariyatti pana ekanteneva pamāṇaṃ. Yathā hi mahato taḷākassa pāḷiyā thirāya udakaṃ na ṭhassatīti na vattabbaṃ, udake sati padumādīni pupphāni na pupphissantīti na vattabbaṃ, evameva mahātaḷākassa thirapāḷisadise tepiṭake buddhavacane sati mahātaḷāke udakasadisā paṭipattipūrakā kulaputtā natthīti na vattabbā, tesu sati mahātaḷāke padumādīni pupphāni viya sotāpannādayo ariyapuggalā natthīti na vattabbāti evaṃ ekantato pariyattiyeva pamāṇaṃ.
бат̇авийд̇хаад̇ууд̇и д̣̇вз сад̇асахассаани жад̇д̇аари жа нахуд̇аани б̣ахалаа махаабат̇авий. аабод̇хаад̇ууд̇и бат̇авид̇о бадтааяа яаава субхагин̣хаб̣рахмалогаа уг̇г̇ад̇ам̣ габбавинаасагам̣ уд̣̇агам̣. д̇зж̇од̇хаад̇ууд̇и бат̇авид̇о бадтааяа яаава аабхассараб̣рахмалогаа уг̇г̇ад̇о габбавинаасаго аг̇г̇и. вааяод̇хаад̇ууд̇и бат̇авид̇о бадтааяа яаава взхабпалаб̣рахмалогаа уг̇г̇ад̇о габбавинаасаго вааяу. зд̇зсу хи згад̇хаммоби сад̇т̇у саасанам̣ анд̇арад̇хаабзд̇ум̣ на саггод̇и, д̇асмаа звамааха. ид̇хзва д̇з уббаж̇ж̇анд̇ийд̇и лохад̇о лохакаад̣̇агам̣ малам̣ вияа имасмим̣ маяхам̣язва саасанз д̇з уббаж̇ж̇анд̇и. могхабурисаад̇и д̇ужчабурисаа.
Pathavīdhātūti dve satasahassāni cattāri ca nahutāni bahalā mahāpathavī. Āpodhātūti pathavito paṭṭhāya yāva subhakiṇhabrahmalokā uggataṃ kappavināsakaṃ udakaṃ. Tejodhātūti pathavito paṭṭhāya yāva ābhassarabrahmalokā uggato kappavināsako aggi. Vāyodhātūti pathavito paṭṭhāya yāva vehapphalabrahmalokā uggato kappavināsako vāyu. Etesu hi ekadhammopi satthu sāsanaṃ antaradhāpetuṃ na sakkoti, tasmā evamāha. Idheva te uppajjantīti lohato lohakhādakaṃ malaṃ viya imasmiṃ mayhaṃyeva sāsane te uppajjanti. Moghapurisāti tucchapurisā.
аад̣̇игзнзва обилавад̇ийд̇и зд̇т̇а аад̣̇игзнаад̇и аад̣̇аанзна г̇ахан̣зна. обилавад̇ийд̇и нимуж̇ж̇ад̇и. ид̣̇ам̣ вуд̇д̇ам̣ ход̇и – яат̇аа уд̣̇агажараа нааваа бхан̣д̣ам̣ г̇ан̣ханд̇ий нимуж̇ж̇ад̇и, звам̣ барияад̇д̇иаад̣̇ийнам̣ бууран̣зна сад̣̇д̇хаммасса анд̇арад̇хаанам̣ на ход̇и. барияад̇д̇ияаа хи хааяамаанааяа бадибад̇д̇и хааяад̇и, бадибад̇д̇ияаа хааяамаанааяа ад̇хиг̇амо хааяад̇и. барияад̇д̇ияаа буураяамаанааяа барияад̇д̇ид̇хараа буг̇г̇алаа бадибад̇д̇им̣ буурзнд̇и, бадибад̇д̇ибуурагаа ад̇хиг̇амам̣ буурзнд̇и. ид̇и наважанд̣̇о вияа барияад̇д̇ияаад̣̇ийсу вад̣дхамаанаасу маяхам̣ саасанам̣ вад̣дхад̇и язваад̇и д̣̇ассзд̇и.
Ādikeneva opilavatīti ettha ādikenāti ādānena gahaṇena. Opilavatīti nimujjati. Idaṃ vuttaṃ hoti – yathā udakacarā nāvā bhaṇḍaṃ gaṇhantī nimujjati, evaṃ pariyattiādīnaṃ pūraṇena saddhammassa antaradhānaṃ na hoti. Pariyattiyā hi hāyamānāya paṭipatti hāyati, paṭipattiyā hāyamānāya adhigamo hāyati. Pariyattiyā pūrayamānāya pariyattidharā puggalā paṭipattiṃ pūrenti, paṭipattipūrakā adhigamaṃ pūrenti. Iti navacando viya pariyattiyādīsu vaḍḍhamānāsu mayhaṃ sāsanaṃ vaḍḍhati yevāti dasseti.
ид̣̇аани язхи д̇хаммзхи сад̣̇д̇хаммасса анд̇арад̇хаанан̃жзва тид̇и жа ход̇и, д̇з д̣̇ассзнд̇о бан̃жа код̇иаад̣̇имааха. д̇ад̇т̇а оггаманийяаад̇и аваггаманийяаа, хздтааг̇аманийяаад̇и ад̇т̇о. сад̇т̇ари аг̇аараваад̇иаад̣̇ийсу аг̇аараваад̇и г̇аараварахид̇аа. аббад̇иссаад̇и аббад̇иссаяаа анийжавуд̇д̇игаа. д̇ад̇т̇а яо жзд̇ияан̇г̇ан̣ам̣ аароханд̇о чад̇д̇ам̣ д̇хаарзд̇и, убааханам̣ д̇хаарзд̇и, ан̃н̃ад̇о ологзд̇ваа гат̇ам̣ гат̇знд̇о г̇ажчад̇и, аяам̣ сад̇т̇ари аг̇аараво наама.
Idāni yehi dhammehi saddhammassa antaradhānañceva ṭhiti ca hoti, te dassento pañca khotiādimāha. Tattha okkamanīyāti avakkamanīyā, heṭṭhāgamanīyāti attho. Satthari agāravātiādīsu agāravāti gāravarahitā. Appatissāti appatissayā anīcavuttikā. Tattha yo cetiyaṅgaṇaṃ ārohanto chattaṃ dhāreti, upāhanaṃ dhāreti, aññato oloketvā kathaṃ kathento gacchati, ayaṃ satthari agāravo nāma.
яо д̇хаммассаванасса гаалз сан̇гхудтз д̣̇ахарасааман̣зрзхи бариваарид̇о нисийд̣̇ад̇и, ан̃н̃аани ваа навагаммаад̣̇ийни гарод̇и, д̇хаммассаванаг̇г̇з нисинно нид̣̇д̣̇ааяад̇и, вигкид̇д̇о ваа ан̃н̃ам̣ гат̇знд̇о нисийд̣̇ад̇и, аяам̣ д̇хаммз аг̇аараво наама.
Yo dhammassavanassa kāle saṅghuṭṭhe daharasāmaṇerehi parivārito nisīdati, aññāni vā navakammādīni karoti, dhammassavanagge nisinno niddāyati, vikkhitto vā aññaṃ kathento nisīdati, ayaṃ dhamme agāravo nāma.
яо т̇зрубадтаанам̣ г̇анд̇ваа, аванд̣̇ид̇ваа нисийд̣̇ад̇и, хад̇т̇абаллад̇т̇игам̣ д̣̇уссабаллад̇т̇игам̣ гарод̇и, ан̃н̃ам̣ ваа бана хад̇т̇абаад̣̇агуггужжам̣ гарод̇и, вуд̣дхаанам̣ санд̇игз анаж̇жхидто гат̇зд̇и, аяам̣ сан̇гхз аг̇аараво наама.
Yo therupaṭṭhānaṃ gantvā, avanditvā nisīdati, hatthapallatthikaṃ dussapallatthikaṃ karoti, aññaṃ vā pana hatthapādakukkuccaṃ karoti, vuḍḍhānaṃ santike anajjhiṭṭho katheti, ayaṃ saṅghe agāravo nāma.
д̇иссо бана сигкаа абуурзнд̇ова сигкааяа аг̇аараво наама ход̇и. адта самаабад̇д̇ияо аниб̣б̣ад̇д̇знд̇о д̇аасам̣ ваа бана ниб̣б̣ад̇д̇анад̇т̇ааяа баяог̇ам̣ агаронд̇о самаад̇хисмим̣ аг̇аараво наама. суггабагко вуд̇д̇авибаллаасзнзва взд̣̇ид̇аб̣б̣од̇и. д̇зрасамам̣.
Tisso pana sikkhā apūrentova sikkhāya agāravo nāma hoti. Aṭṭha samāpattiyo anibbattento tāsaṃ vā pana nibbattanatthāya payogaṃ akaronto samādhismiṃ agāravo nāma. Sukkapakkho vuttavipallāseneva veditabboti. Terasamaṃ.
гассабасам̣яуд̇д̇аван̣н̣анаа нидтид̇аа.
Kassapasaṃyuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 13. сад̣̇д̇хаммаббад̇ируубагасуд̇д̇ам̣ • 13. Saddhammappatirūpakasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 13. сад̣̇д̇хаммаббад̇ируубагасуд̇д̇аван̣н̣анаа • 13. Saddhammappatirūpakasuttavaṇṇanā
