| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༩. སཙྪིཀརཎཱིཡསུཏྟཾ
9. Sacchikaraṇīyasuttaṃ
༡༨༩. ‘‘ཙཏྟཱརོམེ , བྷིཀྑཝེ, སཙྪིཀརཎཱིཡཱ དྷམྨཱ། ཀཏམེ ཙཏྟཱརོ? ཨཏྠི , བྷིཀྑཝེ, དྷམྨཱ ཀཱཡེན སཙྪིཀརཎཱིཡཱ; ཨཏྠི, བྷིཀྑཝེ, དྷམྨཱ སཏིཡཱ སཙྪིཀརཎཱིཡཱ; ཨཏྠི, བྷིཀྑཝེ, དྷམྨཱ ཙཀྑུནཱ སཙྪིཀརཎཱིཡཱ; ཨཏྠི, བྷིཀྑཝེ, དྷམྨཱ པཉྙཱཡ སཙྪིཀརཎཱིཡཱ། ཀཏམེ ཙ, བྷིཀྑཝེ, དྷམྨཱ ཀཱཡེན སཙྪིཀརཎཱིཡཱ? ཨཊྛ ཝིམོཀྑཱ, བྷིཀྑཝེ, ཀཱཡེན སཙྪིཀརཎཱིཡཱ།
189. ‘‘Cattārome , bhikkhave, sacchikaraṇīyā dhammā. Katame cattāro? Atthi , bhikkhave, dhammā kāyena sacchikaraṇīyā; atthi, bhikkhave, dhammā satiyā sacchikaraṇīyā; atthi, bhikkhave, dhammā cakkhunā sacchikaraṇīyā; atthi, bhikkhave, dhammā paññāya sacchikaraṇīyā. Katame ca, bhikkhave, dhammā kāyena sacchikaraṇīyā? Aṭṭha vimokkhā, bhikkhave, kāyena sacchikaraṇīyā.
‘‘ཀཏམེ ཙ, བྷིཀྑཝེ, དྷམྨཱ སཏིཡཱ སཙྪིཀརཎཱིཡཱ? པུབྦེནིཝཱསོ, བྷིཀྑཝེ, སཏིཡཱ སཙྪིཀརཎཱིཡོ།
‘‘Katame ca, bhikkhave, dhammā satiyā sacchikaraṇīyā? Pubbenivāso, bhikkhave, satiyā sacchikaraṇīyo.
‘‘ཀཏམེ ཙ, བྷིཀྑཝེ, དྷམྨཱ ཙཀྑུནཱ སཙྪིཀརཎཱིཡཱ? སཏྟཱནཾ ཙུཏཱུཔཔཱཏོ, བྷིཀྑཝེ, ཙཀྑུནཱ སཙྪིཀརཎཱིཡོ།
‘‘Katame ca, bhikkhave, dhammā cakkhunā sacchikaraṇīyā? Sattānaṃ cutūpapāto, bhikkhave, cakkhunā sacchikaraṇīyo.
‘‘ཀཏམེ ཙ, བྷིཀྑཝེ, དྷམྨཱ པཉྙཱཡ སཙྪིཀརཎཱིཡཱ? ཨཱསཝཱནཾ ཁཡོ, བྷིཀྑཝེ, པཉྙཱཡ སཙྪིཀརཎཱིཡོ། ཨིམེ ཁོ, བྷིཀྑཝེ, ཙཏྟཱརོ སཙྪིཀརཎཱིཡཱ དྷམྨཱ’’ཏི། ནཝམཾ།
‘‘Katame ca, bhikkhave, dhammā paññāya sacchikaraṇīyā? Āsavānaṃ khayo, bhikkhave, paññāya sacchikaraṇīyo. Ime kho, bhikkhave, cattāro sacchikaraṇīyā dhammā’’ti. Navamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༩. སཙྪིཀརཎཱིཡསུཏྟཝཎྞནཱ • 9. Sacchikaraṇīyasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༩. སཙྪིཀརཎཱིཡསུཏྟཝཎྞནཱ • 9. Sacchikaraṇīyasuttavaṇṇanā
