| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៧. ធម្មចក្កកថា
7. Dhammacakkakathā
១. សច្ចវារោ
1. Saccavāro
៣៩. ឯកំ សមយំ ភគវា ពារាណសិយំ វិហរតិ…បេ.… ឥតិ ហិទំ អាយស្មតោ កោណ្ឌញ្ញស្ស ‘‘អញ្ញាសិកោណ្ឌញ្ញោ’’ ត្វេវ នាមំ អហោសិ។
39. Ekaṃ samayaṃ bhagavā bārāṇasiyaṃ viharati…pe… iti hidaṃ āyasmato koṇḍaññassa ‘‘aññāsikoṇḍañño’’ tveva nāmaṃ ahosi.
[ក] ‘‘ឥទំ ទុក្ខំ អរិយសច្ច’’ន្តិ បុព្ពេ អននុស្សុតេសុ ធម្មេសុ ចក្ខុំ ឧទបាទិ, ញាណំ ឧទបាទិ, បញ្ញា ឧទបាទិ, វិជ្ជា ឧទបាទិ, អាលោកោ ឧទបាទិ។
[Ka] ‘‘idaṃ dukkhaṃ ariyasacca’’nti pubbe ananussutesu dhammesu cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.
ចក្ខុំ ឧទបាទីតិ – កេនដ្ឋេន? ញាណំ ឧទបាទីតិ – កេនដ្ឋេន? បញ្ញា ឧទបាទីតិ – កេនដ្ឋេន? វិជ្ជា ឧទបាទីតិ – កេនដ្ឋេន? អាលោកោ ឧទបាទីតិ – កេនដ្ឋេន? ចក្ខុំ ឧទបាទីតិ – ទស្សនដ្ឋេន។ ញាណំ ឧទបាទីតិ – ញាតដ្ឋេន។ បញ្ញា ឧទបាទីតិ – បជាននដ្ឋេន ។ វិជ្ជា ឧទបាទីតិ – បដិវេធដ្ឋេន។ អាលោកោ ឧទបាទីតិ – ឱភាសដ្ឋេន។
Cakkhuṃ udapādīti – kenaṭṭhena? Ñāṇaṃ udapādīti – kenaṭṭhena? Paññā udapādīti – kenaṭṭhena? Vijjā udapādīti – kenaṭṭhena? Āloko udapādīti – kenaṭṭhena? Cakkhuṃ udapādīti – dassanaṭṭhena. Ñāṇaṃ udapādīti – ñātaṭṭhena. Paññā udapādīti – pajānanaṭṭhena . Vijjā udapādīti – paṭivedhaṭṭhena. Āloko udapādīti – obhāsaṭṭhena.
ចក្ខុំ ធម្មោ, ទស្សនដ្ឋោ អត្ថោ។ ញាណំ ធម្មោ, ញាតដ្ឋោ អត្ថោ។ បញ្ញា ធម្មោ, បជាននដ្ឋោ អត្ថោ។ វិជ្ជា ធម្មោ, បដិវេធដ្ឋោ អត្ថោ។ អាលោកោ ធម្មោ, ឱភាសដ្ឋោ អត្ថោ។ ឥមេ បញ្ច ធម្មា បញ្ច អត្ថា ទុក្ខវត្ថុកា សច្ចវត្ថុកា សច្ចារម្មណា សច្ចគោចរា សច្ចសង្គហិតា សច្ចបរិយាបន្នា សច្ចេ សមុទាគតា សច្ចេ ឋិតា សច្ចេ បតិដ្ឋិតា។
Cakkhuṃ dhammo, dassanaṭṭho attho. Ñāṇaṃ dhammo, ñātaṭṭho attho. Paññā dhammo, pajānanaṭṭho attho. Vijjā dhammo, paṭivedhaṭṭho attho. Āloko dhammo, obhāsaṭṭho attho. Ime pañca dhammā pañca atthā dukkhavatthukā saccavatthukā saccārammaṇā saccagocarā saccasaṅgahitā saccapariyāpannā sacce samudāgatā sacce ṭhitā sacce patiṭṭhitā.
៤០. ធម្មចក្កន្តិ កេនដ្ឋេន ធម្មចក្កំ? ធម្មញ្ច បវត្តេតិ ចក្កញ្ចាតិ – ធម្មចក្កំ។ ចក្កញ្ច បវត្តេតិ ធម្មញ្ចាតិ – ធម្មចក្កំ។ ធម្មេន បវត្តេតីតិ – ធម្មចក្កំ។ ធម្មចរិយាយ បវត្តេតីតិ – ធម្មចក្កំ។ ធម្មេ ឋិតោ បវត្តេតីតិ – ធម្មចក្កំ។ ធម្មេ បតិដ្ឋិតោ បវត្តេតីតិ – ធម្មចក្កំ។ ធម្មេ បតិដ្ឋាបេន្តោ បវត្តេតីតិ – ធម្មចក្កំ។ ធម្មេ វសិប្បត្តោ បវត្តេតីតិ – ធម្មចក្កំ។ ធម្មេ វសិំ បាបេន្តោ បវត្តេតីតិ – ធម្មចក្កំ ។ ធម្មេ បារមិប្បត្តោ បវត្តេតីតិ – ធម្មចក្កំ។ ធម្មេ បារមិំ បាបេន្តោ បវត្តេតីតិ – ធម្មចក្កំ។ ធម្មេ វេសារជ្ជប្បត្តោ បវត្តេតីតិ – ធម្មចក្កំ។ ធម្មេ វេសារជ្ជំ បាបេន្តោ បវត្តេតីតិ – ធម្មចក្កំ។ ធម្មំ សក្ករោន្តោ បវត្តេតីតិ – ធម្មចក្កំ។ ធម្មំ គរុំ ករោន្តោ 1 បវត្តេតីតិ – ធម្មចក្កំ។ ធម្មំ មានេន្តោ បវត្តេតីតិ – ធម្មចក្កំ។ ធម្មំ បូជេន្តោ បវត្តេតីតិ – ធម្មចក្កំ ។ ធម្មំ អបចាយមានោ បវត្តេតីតិ – ធម្មចក្កំ។ ធម្មទ្ធជោ បវត្តេតីតិ – ធម្មចក្កំ។ ធម្មកេតុ បវត្តេតីតិ – ធម្មចក្កំ។ ធម្មាធិបតេយ្យោ បវត្តេតីតិ – ធម្មចក្កំ។ តំ ខោ បន ធម្មចក្កំ អប្បដិវត្តិយំ សមណេន វា ព្រាហ្មណេន វា ទេវេន វា មារេន វា ព្រហ្មុនា វា កេនចិ វា លោកស្មិន្តិ – ធម្មចក្កំ។
40.Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammacariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ. Dhamme patiṭṭhāpento pavattetīti – dhammacakkaṃ. Dhamme vasippatto pavattetīti – dhammacakkaṃ. Dhamme vasiṃ pāpento pavattetīti – dhammacakkaṃ . Dhamme pāramippatto pavattetīti – dhammacakkaṃ. Dhamme pāramiṃ pāpento pavattetīti – dhammacakkaṃ. Dhamme vesārajjappatto pavattetīti – dhammacakkaṃ. Dhamme vesārajjaṃ pāpento pavattetīti – dhammacakkaṃ. Dhammaṃ sakkaronto pavattetīti – dhammacakkaṃ. Dhammaṃ garuṃ karonto 2 pavattetīti – dhammacakkaṃ. Dhammaṃ mānento pavattetīti – dhammacakkaṃ. Dhammaṃ pūjento pavattetīti – dhammacakkaṃ . Dhammaṃ apacāyamāno pavattetīti – dhammacakkaṃ. Dhammaddhajo pavattetīti – dhammacakkaṃ. Dhammaketu pavattetīti – dhammacakkaṃ. Dhammādhipateyyo pavattetīti – dhammacakkaṃ. Taṃ kho pana dhammacakkaṃ appaṭivattiyaṃ samaṇena vā brāhmaṇena vā devena vā mārena vā brahmunā vā kenaci vā lokasminti – dhammacakkaṃ.
សទ្ធិន្ទ្រិយំ ធម្មោ។ តំ ធម្មំ បវត្តេតីតិ – ធម្មចក្កំ។ វីរិយិន្ទ្រិយំ ធម្មោ។ តំ ធម្មំ បវត្តេតីតិ – ធម្មចក្កំ។ សតិន្ទ្រិយំ ធម្មោ។ តំ ធម្មំ បវត្តេតីតិ – ធម្មចក្កំ។ សមាធិន្ទ្រិយំ ធម្មោ។ តំ ធម្មំ បវត្តេតីតិ – ធម្មចក្កំ។ បញ្ញិន្ទ្រិយំ ធម្មោ។ តំ ធម្មំ បវត្តេតីតិ – ធម្មចក្កំ។ សទ្ធាពលំ ធម្មោ។ តំ ធម្មំ បវត្តេតីតិ – ធម្មចក្កំ។ វីរិយពលំ ធម្មោ។ តំ ធម្មំ បវត្តេតីតិ – ធម្មចក្កំ។ សតិពលំ ធម្មោ។ តំ ធម្មំ បវត្តេតីតិ – ធម្មចក្កំ។ សមាធិពលំ ធម្មោ។ តំ ធម្មំ បវត្តេតីតិ – ធម្មចក្កំ។ បញ្ញាពលំ ធម្មោ។ តំ ធម្មំ បវត្តេតីតិ – ធម្មចក្កំ។ សតិសម្ពោជ្ឈង្គោ ធម្មោ។ តំ ធម្មំ បវត្តេតីតិ – ធម្មចក្កំ។ ធម្មវិចយសម្ពោជ្ឈង្គោ ធម្មោ។ តំ ធម្មំ បវត្តេតីតិ – ធម្មចក្កំ។ វីរិយសម្ពោជ្ឈង្គោ ធម្មោ។ តំ ធម្មំ បវត្តេតីតិ – ធម្មចក្កំ។ បីតិសម្ពោជ្ឈង្គោ ធម្មោ។ តំ ធម្មំ បវត្តេតីតិ – ធម្មចក្កំ។ បស្សទ្ធិសម្ពោជ្ឈង្គោ ធម្មោ។ តំ ធម្មំ បវត្តេតីតិ – ធម្មចក្កំ។ សមាធិសម្ពោជ្ឈង្គោ ធម្មោ។ តំ ធម្មំ បវត្តេតីតិ – ធម្មចក្កំ។ ឧបេក្ខាសម្ពោជ្ឈង្គោ ធម្មោ។ តំ ធម្មំ បវត្តេតីតិ – ធម្មចក្កំ ។ សម្មាទិដ្ឋិ ធម្មោ។ តំ ធម្មំ បវត្តេតីតិ – ធម្មចក្កំ។ សម្មាសង្កប្បោ ធម្មោ។ តំ ធម្មំ បវត្តេតីតិ – ធម្មចក្កំ។ សម្មាវាចា ធម្មោ។ តំ ធម្មំ បវត្តេតីតិ – ធម្មចក្កំ។ សម្មាកម្មន្តោ ធម្មោ។ តំ ធម្មំ បវត្តេតីតិ – ធម្មចក្កំ។ សម្មាអាជីវោ ធម្មោ។ តំ ធម្មំ បវត្តេតីតិ – ធម្មចក្កំ។ សម្មាវាយាមោ ធម្មោ។ តំ ធម្មំ បវត្តេតីតិ – ធម្មចក្កំ។ សម្មាសតិ ធម្មោ។ តំ ធម្មំ បវត្តេតីតិ – ធម្មចក្កំ។ សម្មាសមាធិ ធម្មោ។ តំ ធម្មំ បវត្តេតីតិ – ធម្មចក្កំ។
Saddhindriyaṃ dhammo. Taṃ dhammaṃ pavattetīti – dhammacakkaṃ. Vīriyindriyaṃ dhammo. Taṃ dhammaṃ pavattetīti – dhammacakkaṃ. Satindriyaṃ dhammo. Taṃ dhammaṃ pavattetīti – dhammacakkaṃ. Samādhindriyaṃ dhammo. Taṃ dhammaṃ pavattetīti – dhammacakkaṃ. Paññindriyaṃ dhammo. Taṃ dhammaṃ pavattetīti – dhammacakkaṃ. Saddhābalaṃ dhammo. Taṃ dhammaṃ pavattetīti – dhammacakkaṃ. Vīriyabalaṃ dhammo. Taṃ dhammaṃ pavattetīti – dhammacakkaṃ. Satibalaṃ dhammo. Taṃ dhammaṃ pavattetīti – dhammacakkaṃ. Samādhibalaṃ dhammo. Taṃ dhammaṃ pavattetīti – dhammacakkaṃ. Paññābalaṃ dhammo. Taṃ dhammaṃ pavattetīti – dhammacakkaṃ. Satisambojjhaṅgo dhammo. Taṃ dhammaṃ pavattetīti – dhammacakkaṃ. Dhammavicayasambojjhaṅgo dhammo. Taṃ dhammaṃ pavattetīti – dhammacakkaṃ. Vīriyasambojjhaṅgo dhammo. Taṃ dhammaṃ pavattetīti – dhammacakkaṃ. Pītisambojjhaṅgo dhammo. Taṃ dhammaṃ pavattetīti – dhammacakkaṃ. Passaddhisambojjhaṅgo dhammo. Taṃ dhammaṃ pavattetīti – dhammacakkaṃ. Samādhisambojjhaṅgo dhammo. Taṃ dhammaṃ pavattetīti – dhammacakkaṃ. Upekkhāsambojjhaṅgo dhammo. Taṃ dhammaṃ pavattetīti – dhammacakkaṃ . Sammādiṭṭhi dhammo. Taṃ dhammaṃ pavattetīti – dhammacakkaṃ. Sammāsaṅkappo dhammo. Taṃ dhammaṃ pavattetīti – dhammacakkaṃ. Sammāvācā dhammo. Taṃ dhammaṃ pavattetīti – dhammacakkaṃ. Sammākammanto dhammo. Taṃ dhammaṃ pavattetīti – dhammacakkaṃ. Sammāājīvo dhammo. Taṃ dhammaṃ pavattetīti – dhammacakkaṃ. Sammāvāyāmo dhammo. Taṃ dhammaṃ pavattetīti – dhammacakkaṃ. Sammāsati dhammo. Taṃ dhammaṃ pavattetīti – dhammacakkaṃ. Sammāsamādhi dhammo. Taṃ dhammaṃ pavattetīti – dhammacakkaṃ.
អាធិបតេយ្យដ្ឋេន ឥន្ទ្រិយំ ធម្មោ។ តំ ធម្មំ បវត្តេតីតិ – ធម្មចក្កំ។ អកម្បិយដ្ឋេន ពលំ ធម្មោ។ តំ ធម្មំ បវត្តេតីតិ – ធម្មចក្កំ។ និយ្យានិកដ្ឋេន ពោជ្ឈង្គោ ធម្មោ។ តំ ធម្មំ បវត្តេតីតិ – ធម្មចក្កំ។ ហេតុដ្ឋេន មគ្គោ ធម្មោ។ តំ ធម្មំ បវត្តេតីតិ – ធម្មចក្កំ។ ឧបដ្ឋានដ្ឋេន សតិបដ្ឋានា ធម្មោ។ តំ ធម្មំ បវត្តេតីតិ – ធម្មចក្កំ។ បទហនដ្ឋេន សម្មប្បធានា ធម្មោ។ តំ ធម្មំ បវត្តេតីតិ – ធម្មចក្កំ។ ឥជ្ឈនដ្ឋេន ឥទ្ធិបាទា ធម្មោ។ តំ ធម្មំ បវត្តេតីតិ – ធម្មចក្កំ។ តថដ្ឋេន សច្ចា ធម្មោ។ តំ ធម្មំ បវត្តេតីតិ – ធម្មចក្កំ។ អវិក្ខេបដ្ឋេន សមថោ ធម្មោ។ តំ ធម្មំ បវត្តេតីតិ – ធម្មចក្កំ។ អនុបស្សនដ្ឋេន វិបស្សនា ធម្មោ។ តំ ធម្មំ បវត្តេតីតិ – ធម្មចក្កំ។ ឯករសដ្ឋេន សមថវិបស្សនា ធម្មោ។ តំ ធម្មំ បវត្តេតីតិ – ធម្មចក្កំ។ អនតិវត្តនដ្ឋេន យុគនទ្ធំ ធម្មោ។ តំ ធម្មំ បវត្តេតីតិ – ធម្មចក្កំ។ សំវរដ្ឋេន សីលវិសុទ្ធិ ធម្មោ។ តំ ធម្មំ បវត្តេតីតិ – ធម្មចក្កំ។ អវិក្ខេបដ្ឋេន ចិត្តវិសុទ្ធិ ធម្មោ។ តំ ធម្មំ បវត្តេតីតិ – ធម្មចក្កំ។ ទស្សនដ្ឋេន ទិដ្ឋិវិសុទ្ធិ ធម្មោ។ តំ ធម្មំ បវត្តេតីតិ – ធម្មចក្កំ។ មុត្តដ្ឋេន វិមោក្ខោ ធម្មោ។ តំ ធម្មំ បវត្តេតីតិ – ធម្មចក្កំ។ បដិវេធដ្ឋេន វិជ្ជា ធម្មោ។ តំ ធម្មំ បវត្តេតីតិ – ធម្មចក្កំ។ បរិច្ចាគដ្ឋេន វិមុត្តិ ធម្មោ ។ តំ ធម្មំ បវត្តេតីតិ – ធម្មចក្កំ។ សមុច្ឆេទដ្ឋេន ខយេ ញាណំ ធម្មោ។ តំ ធម្មំ បវត្តេតីតិ – ធម្មចក្កំ។ បដិប្បស្សទ្ធដ្ឋេន អនុប្បាទេ ញាណំ ធម្មោ។ តំ ធម្មំ បវត្តេតីតិ – ធម្មចក្កំ។ ឆន្ទោ មូលដ្ឋេន ធម្មោ។ តំ ធម្មោ បវត្តេតីតិ – ធម្មចក្កំ។ មនសិការោ សមុដ្ឋានដ្ឋេន ធម្មោ។ តំ ធម្មំ បវត្តេតីតិ – ធម្មចក្កំ។ ផស្សោ សមោធានដ្ឋេន ធម្មោ។ តំ ធម្មំ បវត្តេតីតិ – ធម្មចក្កំ។ វេទនា សមោសរណដ្ឋេន ធម្មោ។ តំ ធម្មំ បវត្តេតីតិ – ធម្មចក្កំ។ សមាធិ បមុខដ្ឋេន ធម្មោ។ តំ ធម្មំ បវត្តេតីតិ – ធម្មចក្កំ។ សតិ អាធិបតេយ្យដ្ឋេន ធម្មោ។ តំ ធម្មំ បវត្តេតីតិ – ធម្មចក្កំ។ បញ្ញា តតុត្តរដ្ឋេន ធម្មោ។ តំ ធម្មំ បវត្តេតីតិ – ធម្មចក្កំ។ វិមុត្តិ សារដ្ឋេន ធម្មោ។ តំ ធម្មំ បវត្តេតីតិ – ធម្មចក្កំ។ អមតោគធំ និព្ពានំ បរិយោសានដ្ឋេន ធម្មោ។ តំ ធម្មំ បវត្តេតីតិ – ធម្មចក្កំ។
Ādhipateyyaṭṭhena indriyaṃ dhammo. Taṃ dhammaṃ pavattetīti – dhammacakkaṃ. Akampiyaṭṭhena balaṃ dhammo. Taṃ dhammaṃ pavattetīti – dhammacakkaṃ. Niyyānikaṭṭhena bojjhaṅgo dhammo. Taṃ dhammaṃ pavattetīti – dhammacakkaṃ. Hetuṭṭhena maggo dhammo. Taṃ dhammaṃ pavattetīti – dhammacakkaṃ. Upaṭṭhānaṭṭhena satipaṭṭhānā dhammo. Taṃ dhammaṃ pavattetīti – dhammacakkaṃ. Padahanaṭṭhena sammappadhānā dhammo. Taṃ dhammaṃ pavattetīti – dhammacakkaṃ. Ijjhanaṭṭhena iddhipādā dhammo. Taṃ dhammaṃ pavattetīti – dhammacakkaṃ. Tathaṭṭhena saccā dhammo. Taṃ dhammaṃ pavattetīti – dhammacakkaṃ. Avikkhepaṭṭhena samatho dhammo. Taṃ dhammaṃ pavattetīti – dhammacakkaṃ. Anupassanaṭṭhena vipassanā dhammo. Taṃ dhammaṃ pavattetīti – dhammacakkaṃ. Ekarasaṭṭhena samathavipassanā dhammo. Taṃ dhammaṃ pavattetīti – dhammacakkaṃ. Anativattanaṭṭhena yuganaddhaṃ dhammo. Taṃ dhammaṃ pavattetīti – dhammacakkaṃ. Saṃvaraṭṭhena sīlavisuddhi dhammo. Taṃ dhammaṃ pavattetīti – dhammacakkaṃ. Avikkhepaṭṭhena cittavisuddhi dhammo. Taṃ dhammaṃ pavattetīti – dhammacakkaṃ. Dassanaṭṭhena diṭṭhivisuddhi dhammo. Taṃ dhammaṃ pavattetīti – dhammacakkaṃ. Muttaṭṭhena vimokkho dhammo. Taṃ dhammaṃ pavattetīti – dhammacakkaṃ. Paṭivedhaṭṭhena vijjā dhammo. Taṃ dhammaṃ pavattetīti – dhammacakkaṃ. Pariccāgaṭṭhena vimutti dhammo . Taṃ dhammaṃ pavattetīti – dhammacakkaṃ. Samucchedaṭṭhena khaye ñāṇaṃ dhammo. Taṃ dhammaṃ pavattetīti – dhammacakkaṃ. Paṭippassaddhaṭṭhena anuppāde ñāṇaṃ dhammo. Taṃ dhammaṃ pavattetīti – dhammacakkaṃ. Chando mūlaṭṭhena dhammo. Taṃ dhammo pavattetīti – dhammacakkaṃ. Manasikāro samuṭṭhānaṭṭhena dhammo. Taṃ dhammaṃ pavattetīti – dhammacakkaṃ. Phasso samodhānaṭṭhena dhammo. Taṃ dhammaṃ pavattetīti – dhammacakkaṃ. Vedanā samosaraṇaṭṭhena dhammo. Taṃ dhammaṃ pavattetīti – dhammacakkaṃ. Samādhi pamukhaṭṭhena dhammo. Taṃ dhammaṃ pavattetīti – dhammacakkaṃ. Sati ādhipateyyaṭṭhena dhammo. Taṃ dhammaṃ pavattetīti – dhammacakkaṃ. Paññā tatuttaraṭṭhena dhammo. Taṃ dhammaṃ pavattetīti – dhammacakkaṃ. Vimutti sāraṭṭhena dhammo. Taṃ dhammaṃ pavattetīti – dhammacakkaṃ. Amatogadhaṃ nibbānaṃ pariyosānaṭṭhena dhammo. Taṃ dhammaṃ pavattetīti – dhammacakkaṃ.
‘‘តំ ខោ បនិទំ ទុក្ខំ អរិយសច្ចំ បរិញ្ញេយ្យ’’ន្តិ…បេ.… បរិញ្ញាតន្តិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ.… អាលោកោ ឧទបាទិ។
‘‘Taṃ kho panidaṃ dukkhaṃ ariyasaccaṃ pariññeyya’’nti…pe… pariññātanti pubbe ananussutesu dhammesu cakkhuṃ udapādi…pe… āloko udapādi.
ចក្ខុំ ឧទបាទីតិ – កេនដ្ឋេន…បេ.… អាលោកោ ឧទបាទីតិ – កេនដ្ឋេន? ចក្ខុំ ឧទបាទីតិ – ទស្សនដ្ឋេន…បេ.… អាលោកោ ឧទបាទីតិ – ឱភាសដ្ឋេន។ ចក្ខុំ ធម្មោ, ទស្សនដ្ឋោ អត្ថោ…បេ.… អាលោកោ ធម្មោ, ឱភាសដ្ឋោ អត្ថោ។ ឥមេ បញ្ច ធម្មា បញ្ច អត្ថា ទុក្ខវត្ថុកា សច្ចវត្ថុកា សច្ចារម្មណា សច្ចគោចរា សច្ចសង្គហិតា សច្ចបរិយាបន្នា សច្ចេ សមុទាគតា សច្ចេ ឋិតា សច្ចេ បតិដ្ឋិតា។
Cakkhuṃ udapādīti – kenaṭṭhena…pe… āloko udapādīti – kenaṭṭhena? Cakkhuṃ udapādīti – dassanaṭṭhena…pe… āloko udapādīti – obhāsaṭṭhena. Cakkhuṃ dhammo, dassanaṭṭho attho…pe… āloko dhammo, obhāsaṭṭho attho. Ime pañca dhammā pañca atthā dukkhavatthukā saccavatthukā saccārammaṇā saccagocarā saccasaṅgahitā saccapariyāpannā sacce samudāgatā sacce ṭhitā sacce patiṭṭhitā.
ធម្មចក្កន្តិ កេនដ្ឋេន ធម្មចក្កំ? ធម្មញ្ច បវត្តេតិ ចក្កញ្ចាតិ – ធម្មចក្កំ។ ចក្កញ្ច បវត្តេតិ ធម្មញ្ចាតិ – ធម្មចក្កំ។ ធម្មេន បវត្តេតីតិ – ធម្មចក្កំ។ ធម្មបរិយាយ បវត្តេតីតិ – ធម្មចក្កំ។ ធម្មេ ឋិតោ បវត្តេតីតិ – ធម្មចក្កំ។ ធម្មេ បតិដ្ឋិតោ បវត្តេតីតិ – ធម្មចក្កំ…បេ.… អមតោគធំ និព្ពានំ បរិយោសានដ្ឋេន ធម្មោ តំ ធម្មំ បវត្តេតីតិ – ធម្មចក្កំ។
Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammapariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ…pe… amatogadhaṃ nibbānaṃ pariyosānaṭṭhena dhammo taṃ dhammaṃ pavattetīti – dhammacakkaṃ.
[ខ-ឃ] ‘‘ឥទំ ទុក្ខសមុទយំ អរិយសច្ច’’ន្តិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ.… អាលោកោ ឧទបាទិ…បេ.… ‘‘តំ ខោ បនិទំ ទុក្ខសមុទយំ អរិយសច្ចំ បហាតព្ព’’ន្តិ…បេ.… ‘‘បហីន’’ន្តិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ.… អាលោកោ ឧទបាទិ។
[Kha-gha] ‘‘idaṃ dukkhasamudayaṃ ariyasacca’’nti pubbe ananussutesu dhammesu cakkhuṃ udapādi…pe… āloko udapādi…pe… ‘‘taṃ kho panidaṃ dukkhasamudayaṃ ariyasaccaṃ pahātabba’’nti…pe… ‘‘pahīna’’nti pubbe ananussutesu dhammesu cakkhuṃ udapādi…pe… āloko udapādi.
ចក្ខុំ ឧទបាទីតិ – កេនដ្ឋេន…បេ.… អាលោកោ ឧទបាទីតិ – កេនដ្ឋេន? ចក្ខុំ ឧទបាទីតិ – ទស្សនដ្ឋេន…បេ.… អាលោកោ ឧទបាទីតិ – ឱភាសដ្ឋេន។
Cakkhuṃ udapādīti – kenaṭṭhena…pe… āloko udapādīti – kenaṭṭhena? Cakkhuṃ udapādīti – dassanaṭṭhena…pe… āloko udapādīti – obhāsaṭṭhena.
ចក្ខុំ ធម្មោ, ទស្សនដ្ឋោ អត្ថោ…បេ.… អាលោកោ ធម្មោ, ឱភាសដ្ឋោ អត្ថោ។ ឥមេ បញ្ច ធម្មា បញ្ច អត្ថា សមុទយវត្ថុកា សច្ចវត្ថុកា…បេ.… និរោធវត្ថុកា សច្ចវត្ថុកា…បេ.… មគ្គវត្ថុកា សច្ចវត្ថុកា សច្ចារម្មណា សច្ចគោចរា សច្ចសង្គហិតា សច្ចបរិយាបន្នា សច្ចេ សមុទាគតា សច្ចេ ឋិតា សច្ចេ បតិដ្ឋិតា។
Cakkhuṃ dhammo, dassanaṭṭho attho…pe… āloko dhammo, obhāsaṭṭho attho. Ime pañca dhammā pañca atthā samudayavatthukā saccavatthukā…pe… nirodhavatthukā saccavatthukā…pe… maggavatthukā saccavatthukā saccārammaṇā saccagocarā saccasaṅgahitā saccapariyāpannā sacce samudāgatā sacce ṭhitā sacce patiṭṭhitā.
ធម្មចក្កន្តិ កេនដ្ឋេន ធម្មចក្កំ? ធម្មញ្ច បវត្តេតិ ចក្កញ្ចាតិ – ធម្មចក្កំ។ ចក្កញ្ច បវត្តេតិ ធម្មញ្ចាតិ – ធម្មចក្កំ។ ធម្មេន បវត្តេតីតិ – ធម្មចក្កំ។ ធម្មចរិយាយ បវត្តេតីតិ – ធម្មចក្កំ។ ធម្មេ ឋិតោ បវត្តេតីតិ – ធម្មចក្កំ។ ធម្មេ បតិដ្ឋិតោ បវត្តេតីតិ – ធម្មចក្កំ…បេ.… អមតោគធំ និព្ពានំ បរិយោសានដ្ឋេន ធម្មោ។ តំ ធម្មំ បវត្តេតីតិ – ធម្មចក្កំ។
Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammacariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ…pe… amatogadhaṃ nibbānaṃ pariyosānaṭṭhena dhammo. Taṃ dhammaṃ pavattetīti – dhammacakkaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / ១. សច្ចវារវណ្ណនា • 1. Saccavāravaṇṇanā
