| Library / Tipiṭaka / તિપિટક • Tipiṭaka / પટિસમ્ભિદામગ્ગ-અટ્ઠકથા • Paṭisambhidāmagga-aṭṭhakathā |
૨. સચ્ચકથા
2. Saccakathā
સચ્ચકથાવણ્ણના
Saccakathāvaṇṇanā
૮. ઇદાનિ યુગનદ્ધગુણસ્સ અરિયમગ્ગસ્સ વસેન સચ્ચટ્ઠં સચ્ચપટિવેધવિસેસં સચ્ચલક્ખણાદિવિધાનઞ્ચ દસ્સેન્તેન કથિતાય સુત્તન્તપુબ્બઙ્ગમાય સચ્ચકથાય અપુબ્બત્થાનુવણ્ણના. તત્થ સુત્તન્તે તાવ તથાનીતિ યથાસભાવવસેન તચ્છાનિ. યથાસભાવભૂતાનેવ હિ ધમ્મજાતાનિ સચ્ચટ્ઠેન સચ્ચાનિ. સચ્ચટ્ઠો પઠમઞાણનિદ્દેસવણ્ણનાયં વુત્તો. અવિતથાનીતિ વુત્તસભાવે વિપરિયાયવિરહિતાનિ. ન હિ સચ્ચાનિ અસચ્ચાનિ નામ હોન્તિ. અનઞ્ઞથાનીતિ અઞ્ઞસભાવવિરહિતાનિ. ન હિ અસચ્ચાનિ સચ્ચાનિ નામ હોન્તિ. ઇદં દુક્ખન્તિ, ભિક્ખવે, તથમેતન્તિ ભિક્ખવે, ઇદં દુક્ખન્તિ યં વુચ્ચતિ, એતં યથાસભાવત્તા તથં. દુક્ખમેવ હિ દુક્ખં. વુત્તસભાવે વિપરિયાયાભાવતો અવિતથં. ન હિ દુક્ખં અદુક્ખં નામ હોતિ. અઞ્ઞસભાવવિરહિતત્તા અનઞ્ઞથં. ન હિ દુક્ખં સમુદયાદિસભાવં હોતિ. સમુદયાદીસુપિ એસેવ નયો.
8. Idāni yuganaddhaguṇassa ariyamaggassa vasena saccaṭṭhaṃ saccapaṭivedhavisesaṃ saccalakkhaṇādividhānañca dassentena kathitāya suttantapubbaṅgamāya saccakathāya apubbatthānuvaṇṇanā. Tattha suttante tāva tathānīti yathāsabhāvavasena tacchāni. Yathāsabhāvabhūtāneva hi dhammajātāni saccaṭṭhena saccāni. Saccaṭṭho paṭhamañāṇaniddesavaṇṇanāyaṃ vutto. Avitathānīti vuttasabhāve vipariyāyavirahitāni. Na hi saccāni asaccāni nāma honti. Anaññathānīti aññasabhāvavirahitāni. Na hi asaccāni saccāni nāma honti. Idaṃ dukkhanti, bhikkhave, tathametanti bhikkhave, idaṃ dukkhanti yaṃ vuccati, etaṃ yathāsabhāvattā tathaṃ. Dukkhameva hi dukkhaṃ. Vuttasabhāve vipariyāyābhāvato avitathaṃ. Na hi dukkhaṃ adukkhaṃ nāma hoti. Aññasabhāvavirahitattā anaññathaṃ. Na hi dukkhaṃ samudayādisabhāvaṃ hoti. Samudayādīsupi eseva nayo.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / પટિસમ્ભિદામગ્ગપાળિ • Paṭisambhidāmaggapāḷi / ૨. સચ્ચકથા • 2. Saccakathā
