| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৭. সত্তরসমৰগ্গো
17. Sattarasamavaggo
(১৬৮) ৩. সব্বমিদং কম্মতোতিকথা
(168) 3. Sabbamidaṃ kammatotikathā
৭৮৩. সব্বমিদং কম্মতোতি? আমন্তা। কম্মম্পি কম্মতোতি? ন হেৰং ৰত্তব্বে…পে॰… সব্বমিদং কম্মতোতি? আমন্তা। সব্বমিদং পুব্বেকতহেতূতি? ন হেৰং ৰত্তব্বে…পে॰… সব্বমিদং কম্মতোতি? আমন্তা। সব্বমিদং কম্মৰিপাকতোতি? ন হেৰং ৰত্তব্বে…পে॰…।
783. Sabbamidaṃ kammatoti? Āmantā. Kammampi kammatoti? Na hevaṃ vattabbe…pe… sabbamidaṃ kammatoti? Āmantā. Sabbamidaṃ pubbekatahetūti? Na hevaṃ vattabbe…pe… sabbamidaṃ kammatoti? Āmantā. Sabbamidaṃ kammavipākatoti? Na hevaṃ vattabbe…pe….
৭৮৪. সব্বমিদং কম্মৰিপাকতোতি? আমন্তা। কম্মৰিপাকেন পাণং হনেয্যাতি? আমন্তা। পাণাতিপাতো সফলোতি? আমন্তা। কম্মৰিপাকো সফলোতি? ন হেৰং ৰত্তব্বে…পে॰… কম্মৰিপাকো অফলোতি? আমন্তা। পাণাতিপাতো অফলোতি? ন হেৰং ৰত্তব্বে…পে॰…।
784. Sabbamidaṃ kammavipākatoti? Āmantā. Kammavipākena pāṇaṃ haneyyāti? Āmantā. Pāṇātipāto saphaloti? Āmantā. Kammavipāko saphaloti? Na hevaṃ vattabbe…pe… kammavipāko aphaloti? Āmantā. Pāṇātipāto aphaloti? Na hevaṃ vattabbe…pe….
কম্মৰিপাকেন অদিন্নং আদিযেয্য…পে॰… মুসা ভণেয্য… পিসুণং ভণেয্য… ফরুসং ভণেয্য… সম্ফং পলপেয্য… সন্ধিং ছিন্দেয্য… নিল্লোপং হরেয্য… একাগারিকং করেয্য… পরিপন্থে তিট্ঠেয্য… পরদারং গচ্ছেয্য… গামঘাতকং করেয্য… নিগমঘাতকং করেয্য… কম্মৰিপাকেন দানং দদেয্য… চীৰরং দদেয্য … পিণ্ডপাতং দদেয্য… সেনাসনং দদেয্য… গিলানপচ্চযভেসজ্জপরিক্খারং দদেয্যাতি? আমন্তা। গিলানপচ্চযভেসজ্জপরিক্খারো সফলোতি? আমন্তা। কম্মৰিপাকো সফলোতি? ন হেৰং ৰত্তব্বে…পে॰… কম্মৰিপাকো অফলোতি? আমন্তা। গিলানপচ্চযভেসজ্জপরিক্খারো অফলোতি? ন হেৰং ৰত্তব্বে…পে॰…।
Kammavipākena adinnaṃ ādiyeyya…pe… musā bhaṇeyya… pisuṇaṃ bhaṇeyya… pharusaṃ bhaṇeyya… samphaṃ palapeyya… sandhiṃ chindeyya… nillopaṃ hareyya… ekāgārikaṃ kareyya… paripanthe tiṭṭheyya… paradāraṃ gaccheyya… gāmaghātakaṃ kareyya… nigamaghātakaṃ kareyya… kammavipākena dānaṃ dadeyya… cīvaraṃ dadeyya … piṇḍapātaṃ dadeyya… senāsanaṃ dadeyya… gilānapaccayabhesajjaparikkhāraṃ dadeyyāti? Āmantā. Gilānapaccayabhesajjaparikkhāro saphaloti? Āmantā. Kammavipāko saphaloti? Na hevaṃ vattabbe…pe… kammavipāko aphaloti? Āmantā. Gilānapaccayabhesajjaparikkhāro aphaloti? Na hevaṃ vattabbe…pe….
৭৮৫. ন ৰত্তব্বং – ‘‘সব্বমিদং কম্মতো’’তি? আমন্তা। ননু ৰুত্তং ভগৰতা –
785. Na vattabbaṃ – ‘‘sabbamidaṃ kammato’’ti? Āmantā. Nanu vuttaṃ bhagavatā –
‘‘কম্মেন কিত্তিং লভতে পসংসং,
‘‘Kammena kittiṃ labhate pasaṃsaṃ,
কম্মেন জানিঞ্চ ৰধঞ্চ বন্ধং।
Kammena jāniñca vadhañca bandhaṃ;
তং কম্মং নানাকরণং ৰিদিত্ৰা,
Taṃ kammaṃ nānākaraṇaṃ viditvā,
কস্মা ৰদে নত্থি কম্মন্তি লোকে’’তি॥
Kasmā vade natthi kammanti loke’’ti.
অত্থেৰ সুত্তন্তোতি? আমন্তা। তেন হি ‘‘সব্বমিদং কম্মতো’’তি।
Attheva suttantoti? Āmantā. Tena hi ‘‘sabbamidaṃ kammato’’ti.
সব্বমিদং কম্মতোতিকথা নিট্ঠিতা।
Sabbamidaṃ kammatotikathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৩. সব্বমিদং কম্মতোতিকথাৰণ্ণনা • 3. Sabbamidaṃ kammatotikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৩. সব্বমিদংকম্মতোতিকথাৰণ্ণনা • 3. Sabbamidaṃkammatotikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৩. সব্বমিদংকম্মতোতিকথাৰণ্ণনা • 3. Sabbamidaṃkammatotikathāvaṇṇanā
