| Library / Tipiṭaka / ติปิฎก • Tipiṭaka / เถรคาถาปาฬิ • Theragāthāpāḷi |
๑๔. สพฺพกามิเตฺถรคาถา
14. Sabbakāmittheragāthā
๔๕๓.
453.
นานากุณปปริปูโร, วิสฺสวโนฺต ตโต ตโตฯ
Nānākuṇapaparipūro, vissavanto tato tato.
๔๕๔.
454.
‘‘มิคํ นิลีนํ กูเฎน, พฬิเสเนว อมฺพุชํ;
‘‘Migaṃ nilīnaṃ kūṭena, baḷiseneva ambujaṃ;
วานรํ วิย เลเปน, พาธยนฺติ ปุถุชฺชนํฯ
Vānaraṃ viya lepena, bādhayanti puthujjanaṃ.
๔๕๕.
455.
‘‘รูปา สทฺทา รสา คนฺธา, โผฎฺฐพฺพา จ มโนรมา;
‘‘Rūpā saddā rasā gandhā, phoṭṭhabbā ca manoramā;
ปญฺจ กามคุณา เอเต, อิตฺถิรูปสฺมิ ทิสฺสเรฯ
Pañca kāmaguṇā ete, itthirūpasmi dissare.
๔๕๖.
456.
‘‘เย เอตา อุปเสวนฺติ, รตฺตจิตฺตา ปุถุชฺชนา;
‘‘Ye etā upasevanti, rattacittā puthujjanā;
วเฑฺฒนฺติ กฎสิํ โฆรํ, อาจินนฺติ ปุนพฺภวํฯ
Vaḍḍhenti kaṭasiṃ ghoraṃ, ācinanti punabbhavaṃ.
๔๕๗.
457.
‘‘โย เจตา ปริวเชฺชติ, สปฺปเสฺสว ปทา สิโร;
‘‘Yo cetā parivajjeti, sappasseva padā siro;
โสมํ วิสตฺติกํ โลเก, สโต สมติวตฺตติฯ
Somaṃ visattikaṃ loke, sato samativattati.
๔๕๘.
458.
‘‘กาเมสฺวาทีนวํ ทิสฺวา, เนกฺขมฺมํ ทฎฺฐุ เขมโต;
‘‘Kāmesvādīnavaṃ disvā, nekkhammaṃ daṭṭhu khemato;
นิสฺสโฎ สพฺพกาเมหิ, ปโตฺต เม อาสวกฺขโย’’ติฯ
Nissaṭo sabbakāmehi, patto me āsavakkhayo’’ti.
… สพฺพกามิเตฺถโร…ฯ
… Sabbakāmitthero….
ฉกฺกนิปาโต นิฎฺฐิโตฯ
Chakkanipāto niṭṭhito.
ตตฺรุทฺทานํ –
Tatruddānaṃ –
อุรุเวฬกสฺสโป จ, เถโร เตกิจฺฉการิ จ;
Uruveḷakassapo ca, thero tekicchakāri ca;
กาติยาโน มิคชาโล, เชโนฺต สุมนสวฺหโย;
Kātiyāno migajālo, jento sumanasavhayo;
นฺหาตมุนิ พฺรหฺมทโตฺต, สิริมโณฺฑ สพฺพกามี จ;
Nhātamuni brahmadatto, sirimaṇḍo sabbakāmī ca;
คาถาโย จตุราสีติ, เถรา เจตฺถ จตุทฺทสาติฯ
Gāthāyo caturāsīti, therā cettha catuddasāti.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เถรคาถา-อฎฺฐกถา • Theragāthā-aṭṭhakathā / ๑๔. สพฺพกามิเตฺถรคาถาวณฺณนา • 14. Sabbakāmittheragāthāvaṇṇanā
