| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༩. རཱུཔིཡསཾཝོཧཱརསིཀྑཱཔདཝཎྞནཱ
9. Rūpiyasaṃvohārasikkhāpadavaṇṇanā
ཀཏཱདིཝསེནཱཏི ཀཏཨཀཏཀཏཱཀཏཝསེན། སུཝཎྞཱདིཙཏུབྦིདྷམྤི ནིསྶགྒིཡཝཏྠུ ཨིདྷ རཱུཔིཡགྒཧཎེན གཧིཏནྟི ཨཱཧ ‘‘ཛཱཏརཱུཔརཛཏཔརིཝཏྟན’’ནྟི། ཨིདཉྩ ཨུཀྐཊྛཔརིཙྪེདེན ཝུཏྟནྟི དཊྛབྦཾ། ཏེནཱཧ ‘‘པུརིམསིཀྑཱཔདེན ཧཱི’’ཏིཨཱདི། པརིཝཏྟནནྟི སཱདིཏརཱུཔིཡསྶ པརིཝཏྟནཾ། པུརིམནཡཱནུསཱརེནཱཏི ‘‘ཨཧཾ, བྷནྟེ, ནཱནཔྤཀཱརཀཾ རཱུཔིཡསཾཝོཧཱརཾ སམཱཔཛྫིཾ, ཨིདཾ མེ ནིསྶགྒིཡ’’ནྟིཨཱདིནཱ (པཱརཱ॰ ༥༨༩)།
Katādivasenāti kataakatakatākatavasena. Suvaṇṇādicatubbidhampi nissaggiyavatthu idha rūpiyaggahaṇena gahitanti āha ‘‘jātarūparajataparivattana’’nti. Idañca ukkaṭṭhaparicchedena vuttanti daṭṭhabbaṃ. Tenāha ‘‘purimasikkhāpadena hī’’tiādi. Parivattananti sāditarūpiyassa parivattanaṃ. Purimanayānusārenāti ‘‘ahaṃ, bhante, nānappakārakaṃ rūpiyasaṃvohāraṃ samāpajjiṃ, idaṃ me nissaggiya’’ntiādinā (pārā. 589).
རཱུཔིཡསཾཝོཧཱརཝཏྠུསྨིནྟི པཊིགྒཧཎསྶེཝ པཊིཀྑིཏྟཏྟཱ པཊིགྒཧིཏཔརིཝཏྟནེ དོསཾ ཨདིསྭཱ རཱུཔིཡཔརིཝཏྟནེ། ཏསྶ ཝཱཏི པརིཝཏྟིཏསྶ ཝཱ། དྷནསྶ ཝཱཏི ཨཏྟནོ མཱུལདྷནསྶ ཝཱ ། ཨཏྟནོ ཝཱ ཧི ཨརཱུཔིཡེན པརསྶ རཱུཔིཡཾ ཙེཏཱཔེཡྻ, ཨཏྟནོ ཝཱ རཱུཔིཡེན པརསྶ ཨརཱུཔིཡཾ, ཨུབྷཡཐཱཔི རཱུཔིཡསཾཝོཧཱརོ ཀཏོཝ ཧོཏཱིཏི།
Rūpiyasaṃvohāravatthusminti paṭiggahaṇasseva paṭikkhittattā paṭiggahitaparivattane dosaṃ adisvā rūpiyaparivattane. Tassa vāti parivattitassa vā. Dhanassa vāti attano mūladhanassa vā . Attano vā hi arūpiyena parassa rūpiyaṃ cetāpeyya, attano vā rūpiyena parassa arūpiyaṃ, ubhayathāpi rūpiyasaṃvohāro katova hotīti.
རཱུཔིཡསཾཝོཧཱརསིཀྑཱཔདཝཎྞནཱ ནིཊྛིཏཱ།
Rūpiyasaṃvohārasikkhāpadavaṇṇanā niṭṭhitā.
