| Library / Tipiṭaka / තිපිටක • Tipiṭaka / කඞ්ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
9. රූපියසංවොහාරසික්ඛාපදවණ්ණනා
9. Rūpiyasaṃvohārasikkhāpadavaṇṇanā
කතාදිවසෙනාති කතඅකතකතාකතවසෙන. සුවණ්ණාදිචතුබ්බිධම්පි නිස්සග්ගියවත්ථු ඉධ රූපියග්ගහණෙන ගහිතන්ති ආහ ‘‘ජාතරූපරජතපරිවත්තන’’න්ති. ඉදඤ්ච උක්කට්ඨපරිච්ඡෙදෙන වුත්තන්ති දට්ඨබ්බං. තෙනාහ ‘‘පුරිමසික්ඛාපදෙන හී’’තිආදි. පරිවත්තනන්ති සාදිතරූපියස්ස පරිවත්තනං. පුරිමනයානුසාරෙනාති ‘‘අහං, භන්තෙ, නානප්පකාරකං රූපියසංවොහාරං සමාපජ්ජිං, ඉදං මෙ නිස්සග්ගිය’’න්තිආදිනා (පාරා. 589).
Katādivasenāti kataakatakatākatavasena. Suvaṇṇādicatubbidhampi nissaggiyavatthu idha rūpiyaggahaṇena gahitanti āha ‘‘jātarūparajataparivattana’’nti. Idañca ukkaṭṭhaparicchedena vuttanti daṭṭhabbaṃ. Tenāha ‘‘purimasikkhāpadena hī’’tiādi. Parivattananti sāditarūpiyassa parivattanaṃ. Purimanayānusārenāti ‘‘ahaṃ, bhante, nānappakārakaṃ rūpiyasaṃvohāraṃ samāpajjiṃ, idaṃ me nissaggiya’’ntiādinā (pārā. 589).
රූපියසංවොහාරවත්ථුස්මින්ති පටිග්ගහණස්සෙව පටික්ඛිත්තත්තා පටිග්ගහිතපරිවත්තනෙ දොසං අදිස්වා රූපියපරිවත්තනෙ. තස්ස වාති පරිවත්තිතස්ස වා. ධනස්ස වාති අත්තනො මූලධනස්ස වා . අත්තනො වා හි අරූපියෙන පරස්ස රූපියං චෙතාපෙය්ය, අත්තනො වා රූපියෙන පරස්ස අරූපියං, උභයථාපි රූපියසංවොහාරො කතොව හොතීති.
Rūpiyasaṃvohāravatthusminti paṭiggahaṇasseva paṭikkhittattā paṭiggahitaparivattane dosaṃ adisvā rūpiyaparivattane. Tassa vāti parivattitassa vā. Dhanassa vāti attano mūladhanassa vā . Attano vā hi arūpiyena parassa rūpiyaṃ cetāpeyya, attano vā rūpiyena parassa arūpiyaṃ, ubhayathāpi rūpiyasaṃvohāro katova hotīti.
රූපියසංවොහාරසික්ඛාපදවණ්ණනා නිට්ඨිතා.
Rūpiyasaṃvohārasikkhāpadavaṇṇanā niṭṭhitā.
