| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၉. ရူပိယသံဝောဟာရသိက္ခာပဒဝဏ္ဏနာ
9. Rūpiyasaṃvohārasikkhāpadavaṇṇanā
ကတာဒိဝသေနာတိ ကတအကတကတာကတဝသေန။ သုဝဏ္ဏာဒိစတုဗ္ဗိဓမ္ပိ နိသ္သဂ္ဂိယဝတ္ထု ဣဓ ရူပိယဂ္ဂဟဏေန ဂဟိတန္တိ အာဟ ‘‘ဇာတရူပရဇတပရိဝတ္တန’’န္တိ။ ဣဒဉ္စ ဥက္ကဋ္ဌပရိစ္ဆေဒေန ဝုတ္တန္တိ ဒဋ္ဌဗ္ဗံ။ တေနာဟ ‘‘ပုရိမသိက္ခာပဒေန ဟီ’’တိအာဒိ။ ပရိဝတ္တနန္တိ သာဒိတရူပိယသ္သ ပရိဝတ္တနံ။ ပုရိမနယာနုသာရေနာတိ ‘‘အဟံ, ဘန္တေ, နာနပ္ပကာရကံ ရူပိယသံဝောဟာရံ သမာပဇ္ဇိံ, ဣဒံ မေ နိသ္သဂ္ဂိယ’’န္တိအာဒိနာ (ပာရာ. ၅၈၉)။
Katādivasenāti kataakatakatākatavasena. Suvaṇṇādicatubbidhampi nissaggiyavatthu idha rūpiyaggahaṇena gahitanti āha ‘‘jātarūparajataparivattana’’nti. Idañca ukkaṭṭhaparicchedena vuttanti daṭṭhabbaṃ. Tenāha ‘‘purimasikkhāpadena hī’’tiādi. Parivattananti sāditarūpiyassa parivattanaṃ. Purimanayānusārenāti ‘‘ahaṃ, bhante, nānappakārakaṃ rūpiyasaṃvohāraṃ samāpajjiṃ, idaṃ me nissaggiya’’ntiādinā (pārā. 589).
ရူပိယသံဝောဟာရဝတ္ထုသ္မိန္တိ ပဋိဂ္ဂဟဏသ္သေဝ ပဋိက္ခိတ္တတ္တာ ပဋိဂ္ဂဟိတပရိဝတ္တနေ ဒောသံ အဒိသ္ဝာ ရူပိယပရိဝတ္တနေ။ တသ္သ ဝာတိ ပရိဝတ္တိတသ္သ ဝာ။ ဓနသ္သ ဝာတိ အတ္တနော မူလဓနသ္သ ဝာ ။ အတ္တနော ဝာ ဟိ အရူပိယေန ပရသ္သ ရူပိယံ စေတာပေယ္ယ, အတ္တနော ဝာ ရူပိယေန ပရသ္သ အရူပိယံ, ဥဘယထာပိ ရူပိယသံဝောဟာရော ကတောဝ ဟောတီတိ။
Rūpiyasaṃvohāravatthusminti paṭiggahaṇasseva paṭikkhittattā paṭiggahitaparivattane dosaṃ adisvā rūpiyaparivattane. Tassa vāti parivattitassa vā. Dhanassa vāti attano mūladhanassa vā . Attano vā hi arūpiyena parassa rūpiyaṃ cetāpeyya, attano vā rūpiyena parassa arūpiyaṃ, ubhayathāpi rūpiyasaṃvohāro katova hotīti.
ရူပိယသံဝောဟာရသိက္ခာပဒဝဏ္ဏနာ နိဋ္ဌိတာ။
Rūpiyasaṃvohārasikkhāpadavaṇṇanā niṭṭhitā.
