| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
রোজমল্লাদিৰত্থুকথা
Rojamallādivatthukathā
৩০১-২. রোজৰত্থু উত্তানত্থমেৰ। তত্থ সঙ্করং অকংসূতি কতিকং অকংসু। উল়ারং খো তে ইদন্তি সুন্দরং খো তে ইদং। নাহং ভন্তে আনন্দ বহুকতোতি নাহং বুদ্ধাদিগতপসাদবহুমানেন ইধাগতোতি দস্সেতি। সব্বঞ্চ ডাকন্তি সপ্পিআদীহি পক্কং ৰা অপক্কং ৰা যংকিঞ্চি ডাকং। পিট্ঠখাদনীযন্তি পিট্ঠমযং খাদনীযং; রোজো কির ইদং উভযম্পি সতসহস্সং ৰযং কত্ৰা পটিযাদাপেসি।
301-2. Rojavatthu uttānatthameva. Tattha saṅkaraṃ akaṃsūti katikaṃ akaṃsu. Uḷāraṃ kho te idanti sundaraṃ kho te idaṃ. Nāhaṃ bhante ānanda bahukatoti nāhaṃ buddhādigatapasādabahumānena idhāgatoti dasseti. Sabbañca ḍākanti sappiādīhi pakkaṃ vā apakkaṃ vā yaṃkiñci ḍākaṃ. Piṭṭhakhādanīyanti piṭṭhamayaṃ khādanīyaṃ; rojo kira idaṃ ubhayampi satasahassaṃ vayaṃ katvā paṭiyādāpesi.
৩০৩. মঞ্জুকাতি মধুরৰচনা। পটিভানেয্যকাতি সকে সিপ্পে পটিভানসম্পন্না। দক্খাতি ছেকা, অনলসা ৰা। পরিযোদাতসিপ্পাতি নিদ্দোসসিপ্পা। নাল়িযাৰাপকেনাতি নাল়িযা চ আৰাপকেন চ। আৰাপকো নাম যত্থ লদ্ধং লদ্ধং আৰপন্তি, পক্খিপন্তীতি ৰুত্তং হোতি। ন চ ভিক্খৰে নহাপিতপুব্বেন খুরভণ্ডন্তি এত্থ গহেত্ৰা পরিহরিতুমেৰ ন ৰট্টতি, অঞ্ঞস্স সন্তকেন কেসে ছেদেতুং ৰট্টতি। সচে ৰেতনং গহেত্ৰা ছিন্দতি, ন ৰট্টতি। যো অনহাপিতপুব্বো তস্স পরিহরিতুম্পি ৰট্টতি, তং ৰা অঞ্ঞং ৰা গহেত্ৰা কেসে ছেদেতুম্পি ৰট্টতি।
303.Mañjukāti madhuravacanā. Paṭibhāneyyakāti sake sippe paṭibhānasampannā. Dakkhāti chekā, analasā vā. Pariyodātasippāti niddosasippā. Nāḷiyāvāpakenāti nāḷiyā ca āvāpakena ca. Āvāpako nāma yattha laddhaṃ laddhaṃ āvapanti, pakkhipantīti vuttaṃ hoti. Na ca bhikkhave nahāpitapubbena khurabhaṇḍanti ettha gahetvā pariharitumeva na vaṭṭati, aññassa santakena kese chedetuṃ vaṭṭati. Sace vetanaṃ gahetvā chindati, na vaṭṭati. Yo anahāpitapubbo tassa pariharitumpi vaṭṭati, taṃ vā aññaṃ vā gahetvā kese chedetumpi vaṭṭati.
৩০৪. ভাগং দত্ৰাতি দসমভাগং দত্ৰা; ইদং কির জম্বুদীপে পোরাণকচারিত্তং, তস্মা দসকোট্ঠাসে কত্ৰা একো কোট্ঠাসো ভূমিসামিকানং দাতব্বো।
304.Bhāgaṃ datvāti dasamabhāgaṃ datvā; idaṃ kira jambudīpe porāṇakacārittaṃ, tasmā dasakoṭṭhāse katvā eko koṭṭhāso bhūmisāmikānaṃ dātabbo.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
১৮৩. রোজমল্লৰত্থু • 183. Rojamallavatthu
১৮৪. ৰুড্ঢপব্বজিতৰত্থু • 184. Vuḍḍhapabbajitavatthu
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
রোজমল্লৰত্থুকথাৰণ্ণনা • Rojamallavatthukathāvaṇṇanā
ৰুড্ঢপব্বজিতৰত্থুকথাৰণ্ণনা • Vuḍḍhapabbajitavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / রোজমল্লাদিৰত্থুকথাৰণ্ণনা • Rojamallādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৮৩. রোজমল্লাদিৰত্থুকথা • 183. Rojamallādivatthukathā
