| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೩. ರತ್ತಿಪುಪ್ಫಿಯತ್ಥೇರಅಪದಾನಂ
3. Rattipupphiyattheraapadānaṃ
೧೩.
13.
‘‘ಮಿಗಲುದ್ದೋ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ।
‘‘Migaluddo pure āsiṃ, araññe kānane ahaṃ;
ವಿಪಸ್ಸಿಂ ಅದ್ದಸಂ ಬುದ್ಧಂ, ದೇವದೇವಂ ನರಾಸಭಂ॥
Vipassiṃ addasaṃ buddhaṃ, devadevaṃ narāsabhaṃ.
೧೪.
14.
‘‘ರತ್ತಿಕಂ ಪುಪ್ಫಿತಂ ದಿಸ್ವಾ, ಕುಟಜಂ ಧರಣೀರುಹಂ।
‘‘Rattikaṃ pupphitaṃ disvā, kuṭajaṃ dharaṇīruhaṃ;
ಸಮೂಲಂ ಪಗ್ಗಹೇತ್ವಾನ, ಉಪನೇಸಿಂ ಮಹೇಸಿನೋ॥
Samūlaṃ paggahetvāna, upanesiṃ mahesino.
೧೫.
15.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ।
‘‘Ekanavutito kappe, yaṃ pupphamabhiropayiṃ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫದಾನಸ್ಸಿದಂ ಫಲಂ॥
Duggatiṃ nābhijānāmi, pupphadānassidaṃ phalaṃ.
೧೬.
16.
‘‘ಇತೋ ಚ ಅಟ್ಠಮೇ ಕಪ್ಪೇ, ಸುಪ್ಪಸನ್ನಸನಾಮಕೋ।
‘‘Ito ca aṭṭhame kappe, suppasannasanāmako;
ಸತ್ತರತನಸಮ್ಪನ್ನೋ, ರಾಜಾಹೋಸಿಂ ಮಹಬ್ಬಲೋ॥
Sattaratanasampanno, rājāhosiṃ mahabbalo.
೧೭.
17.
‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥
‘‘Paṭisambhidā catasso…pe… kataṃ buddhassa sāsanaṃ’’.
ಇತ್ಥಂ ಸುದಂ ಆಯಸ್ಮಾ ರತ್ತಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।
Itthaṃ sudaṃ āyasmā rattipupphiyo thero imā gāthāyo abhāsitthāti.
ರತ್ತಿಪುಪ್ಫಿಯತ್ಥೇರಸ್ಸಾಪದಾನಂ ತತಿಯಂ।
Rattipupphiyattherassāpadānaṃ tatiyaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಅಪದಾನ-ಅಟ್ಠಕಥಾ • Apadāna-aṭṭhakathā / ೩. ರತ್ತಿಪುಪ್ಫಿಯತ್ಥೇರಅಪದಾನವಣ್ಣನಾ • 3. Rattipupphiyattheraapadānavaṇṇanā
