| Library / Tipiṭaka / तिपिटक • Tipiṭaka / अपदानपाळि • Apadānapāḷi |
३. रत्तिपुप्फियत्थेरअपदानं
3. Rattipupphiyattheraapadānaṃ
१३.
13.
‘‘मिगलुद्दो पुरे आसिं, अरञ्ञे कानने अहं।
‘‘Migaluddo pure āsiṃ, araññe kānane ahaṃ;
विपस्सिं अद्दसं बुद्धं, देवदेवं नरासभं॥
Vipassiṃ addasaṃ buddhaṃ, devadevaṃ narāsabhaṃ.
१४.
14.
‘‘रत्तिकं पुप्फितं दिस्वा, कुटजं धरणीरुहं।
‘‘Rattikaṃ pupphitaṃ disvā, kuṭajaṃ dharaṇīruhaṃ;
समूलं पग्गहेत्वान, उपनेसिं महेसिनो॥
Samūlaṃ paggahetvāna, upanesiṃ mahesino.
१५.
15.
‘‘एकनवुतितो कप्पे, यं पुप्फमभिरोपयिं।
‘‘Ekanavutito kappe, yaṃ pupphamabhiropayiṃ;
दुग्गतिं नाभिजानामि, पुप्फदानस्सिदं फलं॥
Duggatiṃ nābhijānāmi, pupphadānassidaṃ phalaṃ.
१६.
16.
‘‘इतो च अट्ठमे कप्पे, सुप्पसन्नसनामको।
‘‘Ito ca aṭṭhame kappe, suppasannasanāmako;
सत्तरतनसम्पन्नो, राजाहोसिं महब्बलो॥
Sattaratanasampanno, rājāhosiṃ mahabbalo.
१७.
17.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा रत्तिपुप्फियो थेरो इमा गाथायो अभासित्थाति।
Itthaṃ sudaṃ āyasmā rattipupphiyo thero imā gāthāyo abhāsitthāti.
रत्तिपुप्फियत्थेरस्सापदानं ततियं।
Rattipupphiyattherassāpadānaṃ tatiyaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ३. रत्तिपुप्फियत्थेरअपदानवण्णना • 3. Rattipupphiyattheraapadānavaṇṇanā
