5. Raṃsisaññakattheraapadānaṃ

30.

‘‘Pabbate himavantamhi, vāsaṃ kappesahaṃ pure;

Ajinuttaravāsohaṃ, vasāmi pabbatantare.

31.

‘‘Suvaṇṇavaṇṇaṃ sambuddhaṃ, sataraṃsiṃva bhāṇumaṃ;

Vanantaragataṃ disvā, sālarājaṃva pupphitaṃ.

32.

‘‘Raṃsyā ² cittaṃ pasādetvā, vipassissa mahesino;

Paggayha añjaliṃ vandiṃ, sirasā ukkuṭī ⁴ ahaṃ.

33.

‘‘Ekanavutito kappe, yaṃ kammamakariṃ tadā;

Duggatiṃ nābhijānāmi, raṃsisaññāyidaṃ phalaṃ.

34.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā raṃsisaññako thero imā gāthāyo abhāsitthāti.

Raṃsisaññakattherassāpadānaṃ pañcamaṃ.